Imseyyaren n Urcalim
3
1 “Maɣar xzar, Sidi, SIDI n řɛeskarat, ad ikkes x Urcalim d Yahuda qaɛ aɛekkaz d qaɛ taɣɣarct, qaɛ tamewciwt s ufus n weɣrum d qaɛ tamewciwt s ufus n waman, 2 bu-teɣruḍt d uɛeskari, řqaḍi d unabi, agezzan d umɣar, 3 azeǧif x xemsin d bu-ccan, amcawar, ayt n bu-ṣṣenɛet d wenni ɣar iǧa řefhamet n tḥessect n uɛezzem. 4 Necc ad xasen ggeɣ iḥuḍriyyen d řḥukkam u arraw ggur ad xasen sellṭen. 5 Xenni di řgens ad ḥsaren ijj i wenneɣni, aryaz i weryaz nneɣni, kuř ijj i umqarreb nnes. Nitni ad hekkweřen ijj i wenneɣni, aḥudri i uwessar, wenni ittwasseḥqaren i wenni ittwacennɛen. 6 Xmi i ɣa icebbar ca n yijjen umas di taddart n babas, ad yini: ‘Cek ɣarek ɛad ijj n upartessu, ittxeṣṣa ad tiřid d amgewwed xaneɣ. Arr řxarbet-a sadu afus nnek!’, □ 7 xenni ad yagi netta deg wass nni, ad yini: ‘Necc war zemmareɣ ad iřiɣ d amesgenfu. War din bu weɣrum u war din bu warruḍ di taddart inu. War d ayi teggem d amgewwed n řgens!’ 8 Maɣar tennedref tendint n Urcalim u tewḍa Yahuda minzi iřes nsen d tmegga nsen aqa aten ḍidd i SIDI maḥend ad sɛaren tiṭṭawin n uɛuǧi nnes. 9 Tifras n iɣembab nsen cehhdent xasen. Am Sadum ssawařen nitni s bṭayṭay x ddnub nsen, war ten ssnuffaren. Uct x řeɛmar nsen, maɣar nitni tteggen řɣar deg yixef nsen.”
10 “Inim i umsegged aqa ad yiři mliḥ, aqa ad ccen řɣiǧet n tmegga nsen.
11 Uct x uɛeffan. Uct xas, maɣar ad t xeǧṣen ɛlaḥsab min ggin ifassen nnes.
12 Inni ideǧen řgens inu aqa aten d iḥenjiren, uca timɣarin ttṣellṭent xas. A řgens inu, inni cek ineddhen, aqa ttɣarran cek, uca řatar n tbridin nnek messḥen t.”
13 “SIDI iwjed ḥima ad icarreɛ, Netta ibedd ḥima ad icarreɛ řegnus.
14 SIDI ad dd-yarfeɛ ddeɛwet ak-d imɣaren n řgens u ak-d řḥukkam nnes, maɣar kenniw tesscemḍem amarjuɛ n uḍiř u min tucarem i imezřaḍ aqa-t di tudrin nwem.”
15 “Min kenniw yuɣin, aqa třebbzem řgens inu u tᵉtteffẓem iɣembab n imezřaḍ?, iqqar Sidi inu, SIDI n řɛeskarat.”
Timɣarin timɛeffarin n Urcalim
16 Ammu i iqqar SIDI: “Minzi yessis n Ṣihyun daysent nnfaxet, ggurent s irawen geɛɛden, s řexzrat ttɣarrant, am ttraḥent u ttqezqizent s iṣuraf u ssṭenṭunent ixeřxařen n iḍaren nsent,
17 s uya ad yarr Sidi jdam x taceqquft n uzeǧif n yessis n Ṣihyun uca ad iɛarra SIDI řɛar nsent.”
18 “Deg wass nni ad asent ikkes Sidi inu marra řehzuṭ nsent: ixeřxařen x iḍaren nsent d řizarat ttwaceddent x tenyart d tezriwin timeẓyanin
19 d texrazin di ṣṣifet n tuddimin d timeqyasin d lltamat 20 d temrisin d ixerxařen d tḥezzamin d tziyyatin ittfuḥen d řeḥruz 21 d txadin n ufus d texrazin n tenzarin 22 d warruḍ n weydud d řizarat d tsebnay d iqurab 23 d tisitin d werruḍ n řeqṭen azdad d tcuccay d funarat n uzeǧif. 24 Deg wemcan n řefwaḥet n balsam ad tiři arriḥet, deg wemcam n tḥezzamt ad yiři wesɣun, deg wemcan n tcenkukin icuwwaren ad yiři uzeǧif aqeccar, deg wemcan n werruḍ iwseɛ ad tiři txancet n wecḍan u deg wemcan n weẓri d uɛeǧem n wecmaḍ x teřmect. 25 Iryazen nnem ad wḍan s ssif u ayt n bu-teɣruḍt nnem deg umenɣi. 26 Tiwwura nnes ad cetcant u ad ceḍnent uca nettat ad teqqim x temmurt s ifassen xwan ...” □