1 Deg wussan n Aḥaz, mmis n Yutam, mmis n Ɛuzziya, ajeǧid n Yahuda, igeɛɛed Raṣin, ajeǧid n Aram, ak-d Faqaḥ, mmis n Ramalya, ajeǧid n Israil, ɣar Urcalim maḥend ad immneɣ akides. Maca netta war izemmar ad xas iɣelleb. ^■   2 Umi ḥajan i taddart n Dawud, nnan: “Aqa ihwa Aram x Ifrayim!”, yarjij wuř n ujeǧid d wuř n řgens nnes, am mammec ttarjijint tcejjura n wezɣar s usemmiḍ. ^□  

3 Inna SIDI i Icaɛya: “Ffeɣ i umsagar ak-d Aḥaz, cek d mmic Ca’ar-Yacub, ɣar uneggar n uqadus n waman n uyeřman n sennej, wenni iǧan ɣar webrid yuyřen ɣar Weḥwic n Uṣebban. 4 Ini as: ‘Ḥḍa, ars, war tteggʷed ca u war ttejji uř nnek ad yarxu x tnayen n isefḍawen n ukeccuḍ idduxxunen, x uxeyyeq yarɣin n Raṣin d Aram d mmis n Ramalya, 5 umi ixarreṣ Aram di řɣar xak, jmiɛ ak-d Ifrayim u ak-d mmis n Ramalya, inna: 6 ‘Ejj aneɣ ad ngeɛɛed x temmurt n Yahuda uca ad as nessiggʷed uca ad tt nebḍa jar aneɣ u xenni ad negg dinni mmis n Ṭabyil d ajeǧid.’ 7 Ammu i iqqar Sidi inu, SIDI: ‘Aya war ittiři, aya war ittemmsar ca!’ 8 Maɣar azeǧif n Aram d Dimacq u azeǧif n Dimacq d Raṣin uca ɛad mɣir xemsa u-settin n iseggʷusa xenni ad yarẓ Ifrayim ař war ittiři ɛad d řgens, 9 uca azeǧif n Ifrayim d Samarya u azeǧif n Samarya d mmis n Ramalya. Mařa war tuminem, war ggur ad teqqimem tmetnem.”

10 Yarni SIDI ɛad deg wawař ak-d Aḥaz, inna:

11 “Ttar ict n řeɛřamet i yixef nnek zi SIDI, AREBBI nnek. Ttar i-tt swadday di raǧaɣ niɣ ttar i-tt dinni sennej di řuɛřa.”

12 Maca Aḥaz inna: “Necc war tt ttᵉttareɣ ca u war ttqeǧabeɣ SIDI.”

13 Xenni inna netta: “Sřem, kenniw a taddart n Dawud, ma war kenniw iqedd ad tessiḥřem iwdan, aqa kenniw tessiḥřem ɛawed uřa AREBBI inu?

14 S uyenni ad awem iwc Sidi inu simant nnes řeɛřamet. Xzar, taɛzarect ad teysi ddeyset, ad taru Mmis, ad as tegg ‘Ɛimmanu-Il’, ixs ad yini ‘SIDI aqa-t akidneɣ’. ^■  

15 Netta ad icc trussi d tamment ɣares ař ɣa iften ad inḍar min war iḥřin u ad ixḍar min iṣebḥen.

16 Maɣar qbeř i ɣa issen uḥenjir ad inḍar min war iḥřin u ad ixḍar min iṣebḥen, ad texřa temmurt nni n tnayen n ijeǧiden i zi cek tᵉṭṭfed tiggʷudi.

17 Ad issiweḍ SIDI xak u x řgens nnek u x taddart n babac s ufus n ujeǧid n Accur ussan am mammec war dd-usin zeg wass nni di immsebḍa Ifrayim x Yahuda.”

18 “Deg wass nni ad imsar, aqa SIDI ad iṣeffar iẓan i iǧan ɣar ineggura n iɣezran n Miṣra uřa d tzizwa i iǧan di temmurt n Accur.

19 Ad dd-asen uca ad arsen marra di teɣzurin u di tezziyin n řejruf u x marra řḥarrac u x marra iyeřmamen n řwarud.”

20 “Deg wass nni ad awem iřs Sidi inu s řmuss i d icra aɣirin n yeɣzar n Lfuraṭ, s ufus n ujeǧid n Accur, azeǧif d ucewwaf x iḍaren uřa d tmart.”

21 “Deg wass nni aryaz ad yarebba ict n tyenduzt d tnayen n wuǧi. 22 S tyawant n uɣi i ɣa wcent, ad yecc trussi. Trussi d tamment ad yecc marra wi i ɣa iqqimen di temmurt.”

23 “Deg wass nni ad yiři kuř amcam i xef bedden ařef n tzayarin i isekkwan ařef n řewzan n nnuqart, i isennanen d tzeggʷart. ^■   24 Ad uyuren ɣar din s fřitca d řqews, maɣar marra tammurt ad tiři teccur s isennanen d tzeggʷart. 25 Uřa x marra tisawnin nni carrzen s uřizim, war din dd-ttasen ɛad zi ssibbet n tiggʷudi zeg isennanen d tzeggʷart. Tammurt nni ad tiři ḥima ad arren ɣar dinni ifunasen u ḥima ad xas ɛefsen wuǧi.”