24
1 War ttasem zeg iryazen iɛeffanen, war arezzu ca tmunet akidsen. ■
2 Maɣar uř nsen itteqqer ɣar ureddeǧ,
u iyencicen nsen ssawařen arẓiyyet. ■
3 Taddart tᵉttwabna s tiɣit,
tᵉttwasemten s řefhamet,
4 s tussna ttwaɛemmaren ixxamen n daxeř,
s marra agřa iɣřan d wagřa iřiqqen.
5 Aryaz amiɣis ijhed,
aryaz n tussna yarenni di jjehd nnes, ■
6 maɣar ittxeṣṣa ad ittwandeh umenɣi s udebbar,
u s řemɣaret n umcawar ad yiři usenjem. ■
7 Tiɣit tuɛřa x ubuhaři,
netta war ggur ad yarzem aqemmun nnes di tewwart n tendint. ■
8 Wenni ittxarriṣen di řɣar,
ad as řaɣan ‘arrays n bu-teḥřaymect’.
9 Řemwayař n uxarreṣ n ubuhaři d ddenb,
u amestehziy d nnɛi i bnadem.
10 Mařa tarxud zeg ixef nnek deg wass n řeḥṣaret,
ammu uřa d jjhed nnek ad tᵉttwaḥṣar.
11 Senjem inni ittwaṭṭfen maḥend ad ttwanɣen,
inni ten ittawyen ɣar mani ten i ɣa nɣen, sbedd i-ten! ■
12 Mařa cek ad tinid: “Xzar, aqa war nessin walu x man aya!”,
ma wenni iwezznen uřawen, war t issargib?
Wenni iḥeṭṭan řeɛmar nnek, issen i-t!
Netta ad ixeǧeṣ bnadem ɛlaḥsab řxedmet nnes. ■
13 Ecc tamment, a mmi, maɣar nettat teṣbeḥ,
u tamment n teɣrast aqa d tmiẓidt i waneɣ nnek.
14 Ammu i teǧa tussna n tiɣit i řeɛmar nnek.
Mařa tufid tt, xenni teǧa tiwecca, u trajit nnek war tᵉttwaqeṭṭeɛ ca. ■
15 A aɛeffan, war tᵉttḥama x tzeddiɣt n umsegged,
war heddem amcan n wareyyeḥ nnes!
16 Maɣar amsegged ad iwḍa sebɛa n twařawin, ad dd-ikkar ɛawed,
maca iɛeffanen ad nnqarḍen s řɣar. ■
17 War farreḥ i uweṭṭu n řeɛdu nnek,
mařa netta inqarḍ, ejj uř nnek war ifarreḥ, ■
18 maḥend SIDI war t iẓarr
u man aya ad yiři d řɛib di tiṭṭawin nnes,
u Netta ad xas issḥeyyed aɣḍab nnes.
19 War ttxeyyiq aṭṭas x wenni itteggen řɣar,
war ttasem zeg iɛeffanen, ■
20 maɣar aqa wenni itteggen řɣar war ɣares tiwecca,
řefnar n iɛeffanen ad ittwasexsi. ■
21 A mmi, ggʷed SIDI d ujeǧid,
war ttxeǧeḍ ca ixef nnek ak-d yenni ɣar iǧa řbař nneɣni,
22 maɣar ad dd-yas uḍeyyeɛ nsen deg ijj n umur,
wi issnen aneggaru aɛeffan n iseggʷusa nsen?
23 Uřa d yina d awařen iweznen n imiɣisen.
Asfarz n wudmawen di ddeɛwet war iǧi ca mliḥ. ■
24 Wenni iqqaren i uɛeffan: “Cek d amsegged!”,
wanita ad t neɛřen řegnus, ad t carhen ccuɛub. ■
25 Maca inni ten i ɣa iḥakmen, ad iřin mliḥ,
lbaraka s marra řxar ad ɣarsen dd-tas.
26 Am ijjen wenni issudumen iyencicen,
ammu i yeǧa wenni dd-ittarran s wawařen iseggmen.
27 Sewjed řxedmet nnek barra,
uca kemmeř i-tt i yixef nnek deg iyyar,
uca bna taddart nnek awarni man aya!
28 War ttiři d acehhad břa ssibbet x umqarreb nnek.
Ma iɛeddeř ad tɣarred s iyencicen nnek?
29 War qqar: “Am mammec i d ayi igga netta,
ammu i dd-as i ɣa ggeɣ uřa d necc!”,
maɣar Necc ad dd-xeřfeɣ zi kuř ijjen ɛlaḥsab řxedmet nnes. ■
30 Necc kkeɣ x yeyyar n ijj n umeɛguz,
u x umarjuɛ n uḍiř n ijj n bnadem s wuř nnes war imtinen.
31 Xzar, tgeɛɛed-dd xas marra teyzit,
tedřa tzeggʷart udem n temmurt nnes,
aqa řḥiḍ nnes n weẓru ittwahdem.
32 Řami tt ẓriɣ, ksiɣ tt ɣar wuř inu,
ẓriɣ tt uca ksiɣ tt am ijj n uwebbex.
33 “Ejj ayi ad ṭṭseɣ cwayt drust, cwayt drust n unudem,
cwayt drust n ubuzzeř s ifassen ḍefṣen, ■
34 dinni dd ɣa yas zzeřḍ nnek,
uřa d řeɣben nnek am ijj n weryaz s řesnaḥ.”