23
1 Mařa teqqimed ɣar ṭṭabřa ɣar ijj n řḥakem maḥend ad tecced akides,
ḥḍa mliḥ min iǧan zzatek.
2 Egg ijj n řmus x yiři nnek,
mařa cek d ijj n bu-řemɣaret n uɛeddis.
3 War ttegg meẓri di macca nnes icnan,
maɣar aqa-t d macca n tuxxuna.
4 War ssiḥiř ixef nnek ḥima ad tdewřed d bu-wagřa,
ejj řefhamet n yixef nnek ad tarsa.
5 Mařa ṭṭawent tiṭṭawin ɣares, aqa war din agřa ɛad!
Maɣar ad igg afriwen i yixef nnes,
ad iḍwa ɣar ujenna amecnaw ijj n ugider.
6 War ttᵉtt aɣrum n wenni di teǧa tiṭṭ taɛeffant,
war meẓri di macca nnes icnan.
7 Maɣar am mammec t tuɣa ittxarraṣ,
ammu i t ittegg.
Iqqar: “Ecc, teswed!”,
maca uř nnes war akidek iǧi.
8 Azeɛɛif i teccid, ad t-i-dd-tɛuqqed,
awařen iṣebḥen nnek tḍeyyɛed ten.
9 War ssawař deg umezzuɣ n ijj n ubuhaři,
maɣar netta ad isseḥqar awařen n weftan nnek. ■
10 War smuṭṭuy aymir n wecḥař uya,
war ttadef deg iyyaren n iyujiřen, ■
11 maɣar amfekki nsen d ameqqran,
netta ad dd-yaɣ tasɣart nsen zzayek.
12 Arr uř nnek ɣar uwebbex,
uřa d imezzuɣen nnek ɣar wawařen n tussna.
13 War tᵉṭṭef ttarbiyyet x uḥudri,
waxxa teccated t s weɛmud, war ittmetti. ■
14 Cek ggur ad t tewted s weɛmud,
u ad tessnejmed řeɛmar nnes zi řaxart.
15 Mmi inu, mařa uř nnek d amiɣis,
ad ifarḥ uřa d uř inu akides.
16 Tiẓẓař inu ad negzent s řefraḥet,
mařa iyencicen nnek ssiwřen min iǧan iseggden. □
17 Ejj uř nnek war ittisim zeg imednab,
maca ejj i-t ad yarr azeǧif ɣar tiggʷudi n SIDI ass imun! ■
18 Maɣar xenni aqa din tiwecca,
u řayas nnek war ittareẓẓi. ■
19 Seř-dd cek, a mmi, iři d amiɣis,
uca ndeh uř nnek ɣar webrid.
20 War ttɣimi ɣar iskarjiyyen,
uřa ɣar inni ilehhfen deg weysum, ■
21 maɣar askarjiy d amelhuf ad dewřen d imezřaḍ,
u anudem issyiriḍ deg iḥřucen.
22 Seř-dd cek ɣar babac wenni cek i dd-ijjin,
u war sseḥqiri yemmac mařa tewsar. ■
23 Seɣ-dd tidett, war tt teznuza ca,
ammu uřa d tiɣit d uwebbex d řefhamet. ■
24 Babas n umsegged ad ifarḥ s waṭṭas,
wenni dd-ijjin ijj mmis d amiɣis, ad as ifarḥ. ■
25 Ejj ad ifarḥ babac uřa d yemmac,
ejj tenni cek i dd-yurwen ad tfarḥ.
26 Ewc ayi uř nnek, a mmi,
ejj tiṭṭawin nnek ad afent arḍa deg ibriden inu.
27 Maɣar tamɣart farq-ccɣeř d ict n tesraft yuǧɣen,
u tamɣart zi barra d ijj n řɛunṣar iḥsar ař ṭṭarf. ■
28 Wah, nettat tᵉttḥama am ijj n uxewwan,
nettat tarenni deg iɣeddaren jar iwdan.
29 Wi i ɣar iǧa wecḍan? Wi i ɣar iǧa zzeřḍ?
Wi i ɣar iǧa umcubbec? Wi i ɣar iǧa ucetci?
Wi i ɣar iǧan iyezzimen břa ssibbet?
Wi i ɣar ǧant tiṭṭawin bbarewyent?
30 Ɣar inni ittɣiman ɣar binu ař tameddit,
ɣar yenni dd-yusin ḥima ad qqasen binu ixeǧḍen. ■
31 War xezzar ɣar binu, xmi ittezwiɣ,
ittřiqřiq di řkas u netta ihwen i tissit.
32 Ɣar uneggar ittɣima izeɛɛef am ijj n ufiɣar,
ittrucca ssem am třefsa.
33 Tiṭṭawin nnek ad twařant timɣarin tibarraniyyin,
u uř nnek ad issiweř s uxarweḍ.
34 Cek ad tiřid amecnaw ijjen i itteṭṭṣen di řwest n řebḥar,
am ijjen i itteṭṭṣen di tqiccat n teḥnact n uɣarrabu
35 ad tinid: “Wtin ayi, maca war yezmeɣ,
dexmen ayi, maca war uciɣ ak-d walu.
Meřmi i dd ɣa faqeɣ? Necc ad arzuɣ ɛawed ɣar binu!”