25
1 Uřa d ina d awařen iweznen n Suliman nni ittɛawaden urin ten iryazen n Ḥizqiya, ajeǧid n Yahuda.
2 Aqa d ccan n AREBBI maḥend ad issar ict n tmesřact,
maca ccan n ijeǧiden anbac deg ict n tmesřact. ■
3 Řuɛřa n ujenna d řaǧaɣ n temmurt,
d wuř n ijeǧiden war ǧin i ubeqqec.
4 Kkes kuffu zi nnuqart,
u ggur ad dd-teffeɣ ict n řqecɛet i wemziř.
5 Sbeɛɛed iɛeffanen zi zzat n wudem n ujeǧid,
uca xenni ad ittwassemten řɛarc nnes s tsegda. ■
6 War tfeyyec zzat i wudem n ujeǧid,
war ttbeddi mani ttbeddan imeqqranen.
7 Maɣar iḥřa, ad ac inin: “Gaɛɛed-dd da!”,
uřa ma ad cek ssehwan zzat i wudem n ijj n umcenneɛ
nni ẓrin tiṭṭawin nnek. ■
8 War ttqeǧiq ad tedɛid,
maɣar min texsed ad tegged ɣar uneggar nnes,
mařa amqarreb nnek ad cek issefḍeḥ? ■
9 Carreɛ ak-d umqarreb nnek,
maca war ssuffuɣ ssirr n wenneɣni,
10 ḥima wenni d as ittesřan war cek issḥeccem ca,
maɣar řexdenni war izemmar ad tᵉttwasbeɛɛed řefḍiḥet nnek ɛad.
11 Am tteffaḥin n wureɣ x ṭṭbasa n nnuqart,
ammu ǧan wawařen ssiwřen ten s řeqyas nnes.
12 Am ict n txadent n wureɣ u am ict n tseddect n wureɣ iɣřan qaɛ,
ammu i iǧa uwebbex amiɣis ɣar umezzuɣ ittesřan.
13 Am wedfeř asemmaḍ deg ijj n wass n tmeyra,
ammu i iǧa umsexxar ittamnen deg wenni t issekkan,
maɣar issfaqa řeɛmar n bab nnes. ■
14 Am iseynuten d usemmiḍ břa anẓar,
ammu aryaz nni ittɛeffar deg ict n terzeft war isekkwin.
15 S ttasiɛ n řxaḍar ittwaseqneɛ řḥakem,
ijj n yiřes amiẓid ittareẓẓa ixsan. ■
16 Mařa tufid tamment, ecc min teḥwajed waha,
niɣ ad taff teccid ktar zi min teḥwajed,
u balak ad tt-i-dd tɛuqqed.
17 War ssrusa aḍar nnek aṭṭas di taddart n umqarreb nnek,
niɣ ad cek ijjiwen u ad cek iɛiff.
18 Am wefḍis d ssif d fřitca iqeḍɛen,
ammu i iǧa weryaz nni icehhden s ẓur x umqarreb nnes. ■
19 Am tiɣmest yarẓen u am uḍar inqraḍen,
ammu i iǧa utecři x wenni war di iǧi ttiqet deg wass n řeḥṣaret.
20 Am wenni ittekksen apartessu nnes deg ijj n wass ismeḍ
u am řxeǧ i tteggen x niṭrun,
ammu i iǧa wenni ittɣennajen izřan zzat i yijjen s wuř icḍen. ■
21 Mařa iǧuẓ wenni cek icarrhen, xenni ewc as aɣrum,
mařa iffud, ewc as ad isu, ■
22 maɣar ammu i tyarrwed cek řefḥem itteḥduduqen x uzeǧif nnes,
u SIDI ad cek ixeǧeṣ.
23 Asemmiḍ zi ccamal ittawi-dd anẓar,
iřes aɣeddar ittawi-dd ijj n wudem ixeyyqen.
24 Iḥřa ad tzedɣed deg ict teɣmart n tzeqqa,
uřa x tazeddiɣt ak-d ict n temɣart ittemcubbucen
deg ict n taddart tcarc. ■
25 Am waman iṣemmaḍen i yijj n řeɛmar yuḥeř,
ammu i iǧa řexbar aṣebḥan zeg ict n temmurt tiggʷej.
26 Am ijj n řɛunṣar ittwafesden u am ijj n wanu ɣeccen t,
ammu i iǧa umsegged ittzeɛziɛen zzat i wudem n iɛeffanen.
27 Macca n waṭṭas n tamment war iǧi ca mliḥ,
maca tarezzut di tmesřayin yewɛaren d ccan.
28 Am ict n tendint ihedmen břa řḥiḍ,
ammu i iǧa ijj n weryaz war itteṭṭef buḥbeř nnes. ■