20
1 Binu d ijj n umestehziy, ccrab d bu-ssḍeɛ, kuř ijjen wenni zzayes i ɣa iweddaren, ɛemmarṣ war iddikkwiř d amiɣis.
2 Ahuddi n ujeǧid am zzhir n wayrad:
wenni t isseɛaren, ixeṭṭa ak-d řeɛmar nnes.■
3 Asmaḥ deg umcubbec aqa d ccan i weryaz,
maca kuř abuhaři ggur ad idduqqez. ■
4 Ameɛguz war icarrez di řmecta,
xenni ad ittar di řweqt n tmeyra, maca war ittif walu.
5 Ixarriṣen deg wuř n bnadem aman yuǧɣen,
maca ijj n weryaz s řefhamet issen ad ten yayem. ■
6 Aṭṭas n iwdan ttřaɣan x ca n ijjen ‘ameddukkeř d amtiqqi’,
maca aryaz d amtiqqi, man wen t i ɣa yafen?
7 Amsegged iggur di řeṣfayet nnes,
sseɛd n iḥenjiren nnes i ittejja awarni as.
8 Ijj n ujeǧid nni ittɣiman x řkursi n ccreɛ,
ittṣeffa marra řɣar s tiṭṭawin nnes. ■
9 Wi izemmaren ad yini: “Necc ssizedgeɣ uř inu,
necc izdigeɣ zi ddnub inu!”? ■
10 Ijj n řewzen d ijj n řewzen nneɣni, ijj n ifa d ijj n ifa nneɣni,
aqa-ten s tnayen idsen d nnɛi i SIDI. ■
11 Aḥudri ittban di tmegga nnes,
ma řxedmet nnes teṣfa niɣ aqa nican i teǧa.
12 Amezzuɣ ittesřan d tiṭṭ ittwařan,
SIDI igga i-ten s tnayen idsen. ■
13 War ttexs iḍeṣ maḥend war teddikkwiřed d amezřuḍ,
arzem tiṭṭawin nnek, ssyiwen ixef nnek s weɣrum. ■
14 ‘War iḥři, war iḥři!’, iqqar umsewweq,
maca mařa yuyur, ammu i ittcenneɛ ixef nnes.
15 Ureɣ iǧa, uřa d aṭṭas n řmarjan,
maca iyencicen ccuren s tussna d ict n řqecɛet iɣřan aṭṭas. ■
16 Mařa ijjen iddakkwař d aḍman i yijj n ubarrani,
xenni ksi arruḍ nnes u ksi t d ddiyyet i yenni war ittwassnen. ■
17 D amiẓid i bnadem aɣrum nni iṭṭef s ixarriqen,
awarni as maca ad iccur uqemmum nnes s iqayasen. ■
18 Ixemmimen ttekmiřen s ucawar,
x uyenni ndeh amenɣi s udebbar. □
19 Wenni igguren da d diha s texbarjit, issɛarra min innuffaren,
war tsebbeb ak-d wenni issḥinniben s iyencicen nnes iṣebhen. ■
20 Wenni i ɣa ineɛřen x babas d yemmas,
řefnar nnes ad ittwasexsi di taǧest tabarcant. ■
21 Mařa tasɣart tᵉttwakseb deɣya s tazřa deg umezwaru,
war dd-tiweḍ d lbaraka ɣar uneggar. ■
22 War qqar: “Necc ad xeřfeɣ řɣar!”
maca tceř x SIDI u Netta ad cek issenjem. ■
23 Ijj n řewzen d ijj n řewzen nneɣni, aqa aten d nnɛi i SIDI,
řmizanat iɣeccen war ǧin ca mliḥ. ■
24 Iṣuraf n ijj n weryaz aqa aten n SIDI,
xenni mammec i ɣa yegg bnadem ad issen abrid nnes? ■
25 Aqa-tt d taxceft i bnadem i ɣa iřaɣan s uqeǧeq ‘amqeddes’,
u ɛad awarni lwuɛud nnes i igga ad ixarreṣ.
26 Ijj n ujeǧid amiɣis ittṣeffa iɛeffanen,
u ittejja tjarrarin n teřwiḥt itteḥřuǧuḍen i usarwet ad xasen iɛqeb.
27 Twarrit n nnefs n buḥbeř n bnadem d řefnar n SIDI,
inni yarezzun di daxeř n ixxamen n uɛeddis.
28 Tamexsiwt icewwaren d řaman heṭṭan ajeǧid,
u řɛarc nnes issejhed i-t s tmexsiwt icewwaren.
29 Talwizt n iḥudriyyen d jjehd nsen,
u lɛaḍama n iwessura d acewwaf icaben. ■
30 Iyezzimen ittazzřen s idammen ssizdigen bnadem zi řɣar,
u tiyyita ṣeffant uřa d takrict.■