19
1 Iḥřa ijj n umezřuḍ igguren di řeṣfayet nnes, x wenni ɣar iǧan iyencicen farɣen, u aqa t d abuhaři i yeǧa. ■
2 Břa tussna uřa d řeɛmar war iǧi ca mliḥ,
wenni ittqeǧqen s iḍaren nnes, ad ixḍa.
3 Tubbuheřya n bnadem issfarraɣ abrid nnes,
u xenni uř nnes ad isɛar x SIDI. ■
4 Agřa ittawi-dd aṭṭas n imeddukkař,
maca amezřuḍ ittraḥ umeddukkeř nnes isemmeḥ dayes. ■
5 Acehhad bu-ixarriqen war ittwaḥesseb ca d amezdag,
wenni dd-yarexxun i ixarriqen, war ggur ad injem. ■
6 Aṭṭas ttzawgen zzat i wudem n umcenneɛ,
kuř ijj ittexs ad yiři d ameddukkeř n weryaz i ɣar iǧa terzifin.
7 Marra aytmas n umezřuḍ carrhen t,
mecḥař ttiggʷejjen xas imeddukkař nnes!
Netta iḍeffar awařen, inni war isekkwin walu. ■
8 Wenni ittarebban uř nnes, ittexs řeɛmar nnes,
wenni iḥeṭṭan řefhamet, ad yaf min icnan.
9 Ijj n ucehhad bu-ixarriqen war ittwaḥesseb ca d amezdag,
wenni yarexxun i ixarriqen, ad ittwahellek.
10 Afeyyec war dd-yusi x ubuhaři,
mammec ɛad x umsexxar maḥend ad iselleṭ x řḥukkam. ■
11 Řeɛqeř n bnadem ittarra i-t ad igg s ttasiɛ n řxaḍar
tusa-dd xas maḥend ad imeyyek x uxeṭṭu nnes.
12 Asxeḍ n ujeǧid am zzhir n weyrad di temẓi nnes,
maca arḍa nnes am nnda x arrbiɛ. ■
13 Mmis abuhaři d arẓiyyet i babas,
amcubbec n temɣart igga am tuddimt n tzeqqa war iqeṭṭin. ■
14 Taddart d wagřa aqa aten d řwart n ibabaten,
maca ict n temɣart ifehhmen aqa-tt n SIDI. ■
15 Řeɛgez yarra bnadem ad iwḍa deg iḍeṣ yuǧɣen,
u řeɛmar iccur s řɣecc ad iǧaẓ. ■
16 Wenni iḥeṭṭan tawṣeyyet, iḥeṭṭa řeɛmar nnes,
wenni war iḥeṭṭin ibriden nnes, ad immet. ■
17 Wenni ittḥinnan x umezřuḍ, yareṭṭeř i SIDI,
u Netta ad as ixeǧeṣ řxedmet nnes.
18 Webbex mmic, mařa ɛad din ca n řayas,
maca war t neqq ca, war ttejji ca ad iksi-dd aya řeɛmar nnek. ■
19 Wenni isɛaren aṭṭas, ad ittwaxeǧeṣ i manayenni,
maɣar mařa texsed ad xas tessbeɛɛded, xenni ad daysent tarenyed.
20 Seř cek ɣar ucawar uca qbeř ttarbiyyet,
maḥend ad tdewřed d amiɣis ɣar uneggar.
21 Aqa din aṭṭas n ixemmimen deg wuř n weryaz,
maca ccwar n SIDI ittɣima ibedd. ■
22 Tamexsiwt icewwaren n bnadem d řeḍrafet nnes,
ammu i iǧa ijj n umezřuḍ ḥsen x ijj n bu-ixarriqen.
23 Tiggʷudi n SIDI tneddeh ɣar tudart,
maɣar itteṭṭeṣ ijjiwen,
war ggur ad ɣares dd-yas ca min war iḥřin. ■
24 Ameɛguz issnuffar afus nnes di ṭṭebṣi,
war t-i-dd-ittarri ɛawed ɣar uqemmum nnes. □ ■
25 Wwet amestehziy, ammu i ɣa iften wenni war ɣares bu řefhamet,
u ɛaqeb afehham, xenni ad ikseb řefhamet. ■
26 Wenni itteggen ɣezzu di babas niɣ wenni issuffuɣen yemmas,
aqa d mmis n řefḍiḥet nni yarran bnadem ad isseḍḥa.
27 Sbedd-dd, a mmi, maḥend ad tesřed ɣar uwebbex,
mařa texsed ad tḥeyyded x wawařen iccuren s tussna.
28 Ijj n ucehhad i war isekkwin iɣeṭṭeř zi řḥeqq,
uca aqemmum n iɛeffanen iṣarreḍ řɣecc.
29 Imestehzayen tᵉttraja aten řeḥkamet,
u tiyitta deg weɛrur i ibuhařiyyen.