1 Wenni iɛezzřen ixef nnes, yarezzu x meẓri nnes,

netta idduqquz x marra min izemmaren ad yiři d adebbar.

2 Abuhaři war d as tᵉtteɛjib řefhamet,

itteɛjib as mɣir aɛarri n wuř nnes.

3 Xmi dd-ittadef uɛeffan, ittas-dd uřa d aseḥqar,

u ak-d řefḍiḥet ittas-dd řɛar.

4 Awařen zeg uqemmum n weryaz am waman yuǧɣen,

ict n tiɣzart ittazzřen, ijj n řɛunṣar n tiɣit.

5 War iǧi ca mliḥ ad tessɛizzed aɛeffan,

maḥend ad tessḥeyyded amsegged di ccreɛ. ^■  

6 Iyencicen n ubuhaři neddhen t ɣar umcebbec,

aqemmum nnes ittřaɣa-dd i weɛmud.

7 Aqemmum n ubuhaři d ahellek nnes,

iyencicen nnes d řfex i řeɛmar nnes. ^■  

8 Awařen n ixbarjiyyen am ḥalawit,

hekkwant deg ixxamen n daxeř n uɛeddis. ^■  

9 Wenni iǧan d amarxu di řxedmet nnes,

aqa t d ijj n tewmat n bab n uředdeǧ.

10 Isem n SIDI d ijj n lburj imten,

amsegged ittazzeř ɣar dinni, uca ittwasakkwaḍ ař din di řaman. ^■  

11 Agřa n bu-wagřa d tandint nnes ijehden,

tanita am ijj n řḥiḍ yuɛřan qaɛ di řbař nnes. ^■  

12 Qbeř ma i ɣa ittwarẓ, ittgeɛɛad wuř n bnadem,

maca awaḍeɛ ittizwař as i ccan. ^■  

13 Wenni dd-ittarran awař qbeř i ɣa iseř,

d man aya d tubbuheřya d řefḍiḥet i netta.

14 Buḥbeř n weryaz ittsenned i-t ɣar řehřac nnes,

maca buḥbeř ittwarẓen, wi izemmaren ad t iksi?

15 Uř n ufehham yarezzu tussna,

amezzuɣ n umiɣis yarezzu tussna.

16 Tarzeft n bnadem tarezzem as tiwwura,

tneddeh i-t zzat i wudem n imeqqranen.

17 Wenni d amezwaru di ddeɛwet nnes ittbanen tsegged,

maca xenni ad dd-yas umqarreb nnes uca ittnecceb di tmesřact. ^■  

18 Taqedduḥt ittejjan imenɣan ttbeddan,

u tbeṭṭa jar inni ɣar teǧa ṣṣulṭa.

19 Ijj n uma nni umi di ggin řɛib, ittwaṭṭef ktar x ict n tendint ijehden,

imenɣan ggin amecnaw zzekrun n řeqṣar.

20 Zi řɣiǧet n uqemmum n ijj n weryaz ittyawan uɛeddis nnes,

ad ijjawen zi ṣṣabet n iyencicen nnes. ^■  

21 Řmewt d tudart deg ufus n yiřes,

kuř ijjen wenni ten ittexsen, ad yecc rɣiǧet nsen. ^■  

22 Wenni yufin tamɣart, yufa min iṣebḥen,

u netta iṭṭef arḍa n SIDI. ^■  

23 S uḥeccem issawař umezřuḍ,

bu-wagřa maca ittarra-dd s řeqsaḥet.

24 Aryaz nni ɣar ǧan imeddukkař aṭṭas, ad iwḍa di tamara,

maca ca n imuren ameddukkeř ittexs i cek ktar zi tawmat. ^■