21
1 Uř n ujeǧid am tiɣezratin n waman deg ufus n SIDI. Netta ineddeh i-t, mani ma ixs Netta.
2 Marra ibriden n bnadem nican di tiṭṭawin nnes,
maca SIDI ittqeǧab uřawen. ■
3 Timegga n tsegda d řḥeqq,
d tina i SIDI ḥsen zi tewhibt n tɣarṣt. ■
4 Nnfaxet n tiṭṭawin d uř icenɛen,
ařbar n iɛeffanen d ddenb.
5 Ixemmimen n wenni imeḥḍen ttawyen mɣir ɣar ufeyyeḍ,
maca marra wenni ittqeǧiqen ittawi ɣar řeḥwej waha. ■
6 Asmuni n wagřa s yiřes issxarriqen,
ammu i teǧa twarrit n nnefs iɛeddun deɣya n yinni yarezzun řmewt. ■
7 Lɛunf n iɛeffanen ittjarra i-ten,
maɣar ttagin ad ggen min iseggmen.
8 Abrid n bu-umarwas ittefriɣ,
maca amezdag ittegg min iǧan nican.
9 Iḥřa ad tzedɣed deg ict teɣmart n tzeqqa,
x tzeddiɣt ak-d ict n temɣart ittemcubbucen deg ict n taddart tcarc. ■
10 Řeɛmar n iɛeffanen ittmeẓri di řɣar,
amqarreb nnes war ɣares ittif arḍa di tiṭṭawin nnes.
11 Mařa ittwaxeǧeṣ umestehziy,
iddakkwař wenni war ɣares bu řefhamet d amiɣis,
mařa ssřemden amiɣis, ikessi netta tussna. ■
12 Amsegged ittbeqqec mliḥ taddart n uɛeffan,
iɣeṭṭeř iɛeffanen di arẓiyyet.
13 Wenni ittbellaɛen amezzuɣ nnes ɣar iɣuyyan n umezřuḍ,
uřa d netta ad isɣuyy maca war xas dd-ttarran.
14 Ṣṣedqet di tnuffra teṣřeḥḥu weɣḍab,
tarzeft immewcen deg weḥsin n warruḍ teṣřeḥḥu axeyyeq imɣaren. ■
15 Aqa d řefraḥet i umsegged maḥend ad igg min iǧan nican,
maca d aceřwaw i yenni itteggen řɣecc.
16 Bnadem nni itteffɣen zeg webrid n řeɛqeř,
ad yareyyeḥ deg wegraw n řexyařat n imettan.
17 Wenni ittexsen afarraj, ggur ad iḥwaj,
wenni ittexsen binu d zzect, war iddikkwiř d bu wagřa.
18 Aɛeffan d ddeyyet i imseggaden,
aɣeddar i yenni igguren nican. ■
19 Iḥřa ad tzedɣed di temmurt ixřan,
x tazeddiɣt ak-d ict n temɣart ittemcubbucen u itteqqsen. ■
20 Ijj n řkenz ittwaḥwajen d zzect aqa aten di tzeddiɣt n imiɣisen,
maca bnadem abuhaři iṣarreḍ i-t.
21 Wenni yarezzun x tsegda d tmexsiwt icewwaren,
ittaf tudart d tsegda d ccan.
22 Amiɣis ittgeɛɛad tendint n ayt n bu-teɣřuḍt,
iɣeṭṭeř jjehd n ttiqet nsen di temmurt.
23 Wenni iḥeṭṭan aqemmum d yiřes nnes,
iḥeṭṭa řeɛmar nnes zi řeḥṣarat. ■
24 Wenni d bu-nnfaxet iffuccḥen ttřaɣan as ‘amestehziy’,
netta ittegg s nnfaxet břa řeqyas.
25 Ccehwet n umeɛguz tneqq i-t,
maɣar ifassen nnes ugin ad xedmen.
26 Ass imun ittcehha timesřayin n ucehhi,
maca amsegged ad iwc u war ittɣimi ittᵉṭṭef di ca i yixef nnes. ■
27 Taɣarṣt n uɛeffan d nnɛi,
mahu mařa nitni ad tt awyen s unekkwi iɣeccen. ■
28 Acehhad issxarriqen ggur ad ittwahellek,
maca aryaz nni ittesřan, ggur ad issiweř tidett řebda. ■
29 Aryaz aɛeffan issejhed ixef nnes ak-d wudem nnes,
maca wenni igguren nican issemten ibriden nnes.
30 War teǧi tiɣit uřa d řefhamet,
u war din iǧi bu ucawar qibač i SIDI.
31 Ayis ad as ḥezzmen i wass n umenɣi,
maca řeɣřeb ɣar SIDI.■