Aḥeṭṭu ḍidd i tesɣunin tiɛeffanin ak-d iwdan
6
1 Mmi inu, mařa tdewřed d amarhun i umqarreb nnek, tewcid ticti nnek n ufus i yijj n ubarrani,
2 mařa tdewřed teqqned zeg wawařen n uqemmum nnek,
tᵉttwaḥebbsed zeg wawařen n uqemmum nnek,
3 xenni egg ta, mmi inu, u senjem ixef nnek zeg ufus n umqarreb nnek:
uyur, bendeq xas u zeyyar x wenni cek yudsen.
4 War ttic ca iḍeṣ i tiṭṭawin nnek,
uřa d anudem i wabřiwen nnek. ■
5 Senjem ixef nnek zeg ufus nnes am tɣeyḍet n weɣzar,
am yijj n wejḍiḍ zeg ufus n unegmar.
6 Uyur ɣar tkeḍfet, cek, a ameɛguz ,
xzar mammec tuyur nettat u dweř d amiɣis.
7 Waxxa nettat war ɣares bu umgewwed,
niɣ aweqqaf niɣ řḥakem,
8 waxxa amenni nettat tessewjed aɣrum nnes deg unebdu,
teyru macca nnes di řweqt n tmeyra.
9 Ař meřmi i ɣa teqqimed tezzřed, cek, a ameɛguz?
Meřmi i ɣa tekkared zeg iḍes nnek? ■
10 Arni cwayt n yiḍes, arni cwayt n uwarrec,
arni cwayt n ubuzzeř s ifassen imunen,
11 aqa da ad xak dd-iwḍa zzeřḍ am ijj n uxewwan,
řeɣben nnek am yijj n weryaz ɣar iǧa řesnaḥ.
12 Bnadem i war isekkwin, aryaz n řɣecc,
iggur s ijj n uqemmum iccuren s min iɛewjen.
13 Iɣemmez s tiṭṭawin nnes,
issawař s iḍaren nnes,
ittceyyar s iḍewḍan nnes.
14 Uř nnes iccur s řexdaɛat,
inekkwa řebda řɣar, ittsebbab imenɣiyyen.
15 S uyenni deɣya ad dd-yas uḍeyyeɛ nnes,
deg ict n tecti ad ittwarẓ am war din ittiři ugenfu.
16 Setta n tmesřayin-a icarreh i-tent SIDI,
wah sebɛa aqa atent d nnɛi i řeɛmar nnes:
17 tiṭṭawin n nnfaxet, ijj n yiřes issxarriqen,
uřa d ifassen issazzařen idammen imezdagen, ■
18 uř inekkwan timeɛmač iɣeccen,
iḍaren nni ittqeǧiqen maḥend ad azzřen ɣar min iǧan d aɛeffan, ■
19 acehhad bu-ixarriqen nni dd-ideǧqen i ixarriqen,
uřa wenni ittsebbaben imenɣiyyen jar tawmat.
20 A mmi, ḥḍa tawṣeyyet n babac,
u war menḍar taɣuri n yemmac. ■
21 Qqen i-tent řebda x wuř nnek,
cedd i-tent ɣar yiri nnek. ■
22 Mařa teggured deg webrid, aya ad cek igewwed,
mařa tezzred, aya ad cek iḥḍa,
mařa tfaqed aqa man aya ad kidek issiweř. ■
23 Minzi tawṣeyyet d řefnar d tɣuri d tfawt,
iwebbax n ttarbiyyet aqa aten d abrid n tudart ■
24 nni cek i ɣa iḥḍan zi temɣart taɛeffant,
zi řehrud izewwqen n yiřes n temɣart zi barra. ■
25 War ɛecceq ca aẓri nnes deg wuř nnek,
ḥḍa war cek teḥṣir s wabřiwen nnes,
26 minzi zi ssibbet n ict n temɣart n farq-ccɣeř,
bnadem izemmar ad iksi mɣir ict n txebbazt n weɣrum,
wah tamɣart n ijj n weryaz nneɣni aqa tarezzu řeɛmar iɣřan.
27 Ma izemmar ḥed ad yarbu timessi deg weḥsin n warruḍ nnes,
břa ma ad yarɣ warruḍ nnes? □
28 Ma izemmar ḥed ad yuyur x řefḥem itteḥduduqen,
břa ma ad cemḍen iḍaren nnes?
29 Ammu uřa d wenni i ɣa yadfen ɣar temɣart n umqarreb nnes,
wah kuř ijjen wenni tt i ɣa ihadan, war ittwiḥsib d amezdag.
30 Aceffar war t ttejjin mařa yucar,
ḥima ad issyiwen řeɛmar nnes mařa dayes řaẓ.
31 Maca mařa ittwaf, ammu xas i ɣa ixeǧeṣ sebɛa n tseqqar.
Ittxeṣṣa as ad iwc marra min ɣares di taddart.■
32 Maca wenni itteggen zzina ak-d ict n temɣart, war ɣares bu wuř imten.
Wenni itteggen aya, ittḍarra řeɛmar nnes.
33 Druct d řefḍiḥet ad ten yaf,
řeḥya nnes war imeḥḥi ca.
34 Maɣar tusmi tᵉttawi-dd asɛar n weryaz,
netta war ittessen aḥinni deg wass n wentaqem.
35 War iḥesseb ddeyyet i weṣřeḥ, war tt iqebbeř,
ad yugi waxxa tessemɣarid di terzeft ɛad s waṭṭas.