1 Hallilu-Yah! Ṣebbḥem i SIDI zeg ijenwan,

ṣebbḥem t di řuɛřa. ^■  

2 Ṣebbḥem t, marra lmalakat nnes!

Ṣebbḥem t, marra řɛeskarat nnes!

3 Ṣebbḥem t, tafuct d tziri!

Ṣebbḥem t, marra itran yareqqen!

4 Ṣebbḥem t, ajenna x ijenwan,

uřa d aman nni iǧan tiwa i ujenna.

5 Ejj i-ten ad ṣebbḥen Isem n SIDI,

maɣar Netta yumur u ammu ttwaxeřqen-dd. ^■  

6 Netta idekken i-ten din i řebda,

iwca asen ict n tewṣeyyet i war ggur ad tt nɛeddu ɛemmarṣ. ^■  

7 Ṣebbḥem i SIDI, zi temmurt,

kenniw řhaycat n řebḥar d marra aman yuǧɣen,

8 timessi d tebrurri d wedfeř d ddexxan,

asemmiḍ n tḥaryaḍt nni itteggen awař nnes,

9 idurar d marra tiwriririn,

ticejjura n fruta d marra ticejjura n tengelt,

10 řewḥuc n řexřa d marra řmar,

imuddaren ittbuɛen d ijḍaḍ s wafriwen nsen,

11 kenniw ijeǧiden n temmurt d marra ccuɛub,

kenniw řḥukkam d marra řquḍat x temmurt, ^□  

12 iḥudriyyen uřa d tiḥudriyyen,

iwessura jmiɛ ak-d imeẓyanen!

13 Ejj i-ten ad ṣebbḥen Isem n SIDI,

maɣar Isem nnes waha yuɛřan qaɛ,

tissiqt nnes tařeqq x temmurt d ijenwan. ^■  

14 Netta issgeɛɛed icc n řgens nnes,

aṣebbeḥ n marra imtiqqan nnes, n ayt n Israil,

n řgens i dd as yudsen. Hallilu-Yah! ^■