1 Hallilu-Yah, maɣar azehhed i AREBBI nneɣ d aṣebḥan,

minzi icna, ittas-dd akides ad as nṣebbeḥ. ^■  

2 SIDI ibenna Urcalim,

issmun immeneɛraq n Israil.

3 Netta issgenfa inni ɣarsen uř yarẓen,

ittcedda iyezzimen nsen itteqsen. ^■  

4 Iḥesseb qedda n itran,

ittřaɣa-dd xasen marra s yisem. ^■  

5 Siditneɣ d ameqqran u jjehd nnes imɣar.

Řeɛqeř nnes war ɣares bu řeɛbar.

6 SIDI ittsenned imwaḍɛen,

isshekkwa iɛeffanen ař tammurt.

7 Qadam SIDI s uɣennej,

zehhdem i AREBBI nneɣ s řgambri.

8 Netta d wenni iddařen ajenna s iseynuten,

d wenni issewjaden anẓar i temmurt,

d wenni issɣemmayen arrbiɛ x idurar. ^■  

9 d wenni itticen i řmař macca nnes,

i tarwa n ibaɣřiwen xmi i ɣa sɣuyyen.

10 Netta war d as itteɛjib jjehd n uyis,

war yareṭṭi s iḍaren n weryaz.

11 Yareṭṭa as i SIDI inni t itteggʷeden,

inni issitmen di tmexsiwt nnes icewwaren.

12 A Urcalim, ṣebbeḥ i SIDI,

a Ṣihyun, ṣebbeḥ i AREBBI nnem.

13 Maɣar Netta issemḥed zzekrunat n tewwura nnek,

ibarek iḥenjiren nnek di řwest nnek,

14 Netta iwca řehna i iymiren nnek,

issyiwen i cek s min iṣebḥen qaɛ n yirden.

15 Netta issekka tiwařin nnes ɣar temmurt,

awař nnes ittazzeř aṭṭas. ^■  

16 Ittic adfeř am tḍuft,

izzuzzara nnda igersen am iɣɣeḍ.

17 Issekka adfeř nnes d ibquqen,

wi izemmaren ad iqqim ibedd zzat i tesmuḍi nnes?

18 Issekka awař nnes uca ittarra ten ad fesyen,

Netta ittejja asemmiḍ nnes ittṣuḍ, xenni ttucruren waman.

19 Netta ibarreḥ i Yaɛqub awařen nnes,

i Israil tiweṣṣa nnes d lfarayiḍ nnes.

20 Uřa i yijj n řgens nneɣni war d as iggi ammu,

u nitni war ssinen ca lfarayiḍ nnes. Hallilu-Yah! ^■