116
1 Necc ttexseɣ, maɣar SIDI isřa i tmijja inu, aḥeccem inu,
2 maɣar Netta iwca ayi ameẓẓuɣ nnes.
Ad as řaɣiɣ marra ussan n tudart inu.
3 Iseɣwan n řmewt nnḍen ayi-dd,
tewḍa-dd xafi tiggʷuda n řaxart.
Necc ufiɣ aqa ayi ttwaḥṣareɣ u ceḍneɣ. ■
4 Řaɣiɣ x Yisem n SIDI, nniɣ:
“A SIDI, fekk řeɛmar inu!”
5 SIDI d aḥnin d amsegged,
AREBBI nneɣ dayes řeḥnunect.
6 SIDI iḥeṭṭa uřawen n iḥafiyyen.
Necc tuɣa ayi am uneɛḍab, maca Netta issenjem ayi.
7 Hna ɛawed, a řeɛmar inu,
maɣar SIDI igga ac min iṣebḥen. ■
8 Maɣar Cek, a SIDI, teḥḍid řeɛmar inu zi řmewt,
tiṭṭawin inu zeg imeṭṭawen, aḍar inu zeg uneqraḍ.
9 Ad uyureɣ zzat i wudem n SIDI,
di temmura n yinni iddaren.
10 Necc umneɣ, s uyenni nniɣ:
“Necc ttwaḥṣareɣ aṭṭas!” ■
11 Di tiggʷudi inu nniɣ: “Marra iwdan d ayt n bu-ixarriqen!” ■
12 Mammec i ɣa xeǧṣeɣ SIDI,
x marra řxar i d ayi igga?
13 Ad ssgeɛɛdeɣ řkas n usenjem ameqqran,
ad řaɣiɣ x Yisem n SIDI.
14 Necc ad kemmřeɣ lwuɛud inu i SIDI,
qibač i marra řgens nnes.
15 Aqa iɣřa di tiṭṭawin n SIDI,
řmewt n imtiqqan nnes.
16 A SIDI, aqa necc d amsexxar nnek,
nnec d amsexxar nnek, mmis n tayya nnek.
Cek tessarxud xafi iceddiyen inu.
17 Necc ad Cek dd-awyeɣ tawhibt n uqadi,
ad řaɣiɣ x Yisem n SIDI.
18 Necc ad ssqefřeɣ lwuɛud inu i SIDI,
qibač i marra řgens nnes.
19 di řemraḥat n Taddart n SIDI,
di řwest nnem, a Urcalim! Hallilu-Yah.