1 SIDI iḥekkem, ejj ad arjijen řegnus.

Netta iqqim sennej i ikiruben, tammurt tebda ad tenhezz. ^□  

2 SIDI d ameqqran di Ṣihyun,

Netta yuɛřa aṭṭas x marra řegnus.

3 Ejj i-ten ad qadan Isem nnek ameqqran issaggʷaden,

ad inin: “Aqa Netta d amqeddas!”

4 Jjehd n ujeǧid aqa netta ittexs řḥeqq.

Cek teggid amcan imten i tsegda,

teggid řḥeqq d tsegda di Yaɛqub.

5 Sɛuǧem SIDI, AREBBI nneɣ,

aḍarem zzat i tnebdat n iḍaren nnes.

Aqa Netta d amqeddes!

6 Musa d Harun tuɣa aten zeg ikehhanen nnes,

Camwil tuɣa zeg inni iřaɣan Isem nnes.

Nitni řaɣan ɣar SIDI uca Netta isřa asen.

7 Issiweř akidsen zeg uqellij n useynu.

Nitni ḥḍan cchadat nnes,

uřa d tiweṣṣa nnes nni d asen iwca.

8 A SIDI, AREBBI nneɣ, Cek tesřid asen.

Cek d ijj n AREBBI iɣeffaren,

maca uřa d umtaqem x tmegga nsen.

9 Sɛuǧem SIDI, AREBBI nneɣ,

aḍarem zzat i wedrar nnes iqeddsen,

maɣar SIDI, AREBBI nneɣ, d amqeddes i iǧa.