66
1 I umeqqran n imeɣnajen. Izři. Azehhed. Sřiwřewem i AREBBI, marra tammurt!
2 Zehhdem i uɛuǧi n Yisem nnes,
issɛuǧa t i uṣebbeḥ nnes.
3 Inim i AREBBI: “Mammec ssaggʷadent tmegga nnek!”
Zi řemɣaret n jjhed nnek ad xak ssniɛmiřen řɛedyan nnek.
4 Marra tammurt, wah ad ac aḍaren u ad zehhden,
ad zehhden i Yisem nnek. Silah.
5 Asem-dd, xzarem timegga n AREBBI.
Min igga Netta, issaggʷad tarwa n bnadem.
6 Netta yarra řebḥar d řbar.
Nitni ẓwan iɣzar x iḍaren.
Dinni i zzayes nfarreḥ. ■
7 S jjehd nnes iḥekkem i řebda.
Tiṭṭawin nnes ttɛessent x řegnus.
Ɣarwem ad tejjem ad mmɛařan inni ittɣewwɣen. Silah. ■
8 Barkem AREBBI nneɣ, kenniw a řegnus,
ggem ad ittwaseř řḥess n uṣebbeḥ nnes.
9 Netta d wenni d aneɣ itticen tudart,
u war ijji aḍar nneɣ ad ifarɣ.
10 Minzi Cek, a AREBBI, tqeǧbed aneɣ,
Cek tessizedged aneɣ amecnaw xmi ssizdagen nnuqart.
11 Cek tnedhed aneɣ di tracca n řfex.
Tessarsed xaneɣ ijj n ddqeř x teɛjinna nneɣ.
12 Cek tejjid iwdan ad nyen x izeǧifen nneɣ,
aqa nedweř ɣar tmessi d waman,
maca Cek tessuffɣed aneɣ s ijj n řqedd ifeyyeḍ.
13 Necc ad dd-adfeɣ ɣar Taddart nnek s tɣarṣa n wecmaḍ,
ad ac xeǧṣeɣ lwuɛud inu,
14 lwuɛud nni zzaysen neṭqen iyencicen inu,
nni zzaysen issiweř uqemmum inu,
řami tuɣa ayi di řeḥṣaret.
15 Tiɣarṣa n wecmaḍ n řmar iṣeḥḥen ad ac tent-i-dd-awyeɣ
ak-d řebxur n icarriyyen.
Necc ad ac sswejdeɣ ifunasen d iɣayḍen. Silah.
16 Marra kenniw i itteggʷden AREBBI, assettiw-dd, sřem,
necc xseɣ ad awem ɛawdeɣ min i d ayi igga di řeɛmar inu.
17 Ɛad iřaɣa xas uqemmum inu,
xenni aqa Netta ittwassemɣar sadu yiřes inu.
18 Mři tuɣa nwiɣ řmuɛṣiyyet deg wuř inu,
xenni aqa Sidi inu war d ayi ittesři ca.
19 AREBBI maca aqa isřa ayi,
aqa Netta iwca taynit i tmijja n tẓaǧit inu.
20 Ad ittwabarek AREBBI wenni war inḍaren taẓaǧit inu,
war d ayi ikkis tamexsiwt nnes icewwaren.