1 I umeqqran n imeɣnajen. Azehhed n Dawud. Izři.

2 Zi řhudnet issdaḥeǧ i Cek uṣebbeḥ, aya, AREBBI, di Ṣihyun,

ittxeṣṣa ad ittwakemmeř lwaɛd i Cek.

3 Cek tesřid i tẓaǧit,

marra ddat ad ɣarek dd-yas.

4 Řmuɛṣiyyet tuɣa tejhed xafi,

maca Cek tᵉssᵉṣeřḥed ixeṭṭan nneɣ.

5 Sseɛd n wenni i tfarrzed Cek u tessqarrbed t-i-dd ɣarek,

ḥima ad izdeɣ di řemraḥat nnek.

Neccin ad nejjiwen s řxar n Taddart nnek,

s tqeddast n Zzawect nnek Tameqqrant.

6 Cek ad xaneɣ dd-tarred di tsegda s tmegga issaggʷaden,

a AREBBI n usenjem nneɣ.

Aqa Cek d řaman n marra inni iǧan ɣar tneggura n temmurt,

n yinni iǧan x jjwayeh yiggʷejen x ujemmaḍin n řebḥar.

7 Cek d wenni issrusan idurar s jjhed nnes,

Cek tbekksed s řemɣaret.

8 Cek d wenni i ittarran řehweř n řebḥur yaressa,

řehweř n řemwaj

d lharaj n ccuɛub.

9 Inni izeddɣen ɣar tneggura n temmurt

tteggʷeden zi řeɛřamat nnek,

aqa Cek tᵉttarrid řefjar n tuffut uřa d weṭṭu n tmeddit ad sřiweřwen.

10 Cek tarezzfed tammurt u tᵉttarrid iɣezran ad tt cuqqen,

aqa Cek tᵉttarrid tt-i-dd s řxir aṭṭas.

Iɣzar n AREBBI nni tt ittcuqq aqa ittccur s waman.

Cek tessewjaded imendi nsen,

maɣar i uya i tesswejded tammurt.

11 Cek tᵉttesawed mseqqem řatarat n wecraz,

tesshekkʷid ibuda nnes.

Tessarḍabed tammurt s inecnacen,

tᵉttbarked aɣemmuy nnes.

12 Cek tᵉttegged ttaj i useggʷas n řxar nnek,

řatarat n iṣuraf nnek ttudumen s tadunt.

13 Aqa ttudumen x ddmani n řexřa,

tiwririn bekksent s řefraḥet.

14 Ddmani n tarewsa ssun s wuǧi,

uřa d tiɣzurin dřint s imendi.

Nitni dduqquzen s usřiwřew, wah, ttɣennajen.