39
1 Ma tessned meřmi ttarwent tɣaydin n tṣuḍar? Ma tḥeṭṭid tirwa n tudadin? ■
2 Ma tzemmared ad tḥesbed iyuren n tkessit nsent,
ma tessned řḥař n tirwa nsent?
3 Nitenti tteqwisent, ttarwent imeẓyanen nsent,
řewjeɛ n tarut nsent ssuffuɣen ten.
4 Meḥḍen imeẓyanen nsent , meqqaren di řexřa,
tteffɣen ɣar barra u war ɣarsent ttɛiqqiben.
5 Man wen yarxun i weɣyuř n řexřa,
u tisarrifin n weɣyuř n řexřa, man wen tent ifesyen?
6 Necc wciɣ as tanezruft d taddart,
řewḍa ameǧaḥ d tizeddiɣin nnes. ■
7 Netta iḍeḥḥec x řɣaci inhewřen n tendint,
war ittesři iɣuyyan n yinni izeyyaren isemɣan.
8 Jjwayeh n idurar d ddmani nnes n tarewsa,
yarezzu daysen x qaɛ min iǧan d aziza.
9 Ma ad ixs iɣayḍ ak-d yijj-n-yicc ad xak isexxar?
Ma ad issens ɣar řmedwed nnek?
10 Ma tzemmared ad tmenɛed iɣayḍ ak-d yijj-n-yicc
s wesɣun nnes ɣar uɛeyyed n wecraz?
Ma ad icarz tiysarin awarni ac?
11 Ma tᵉttcařed xas, minzi netta ijhed aṭṭas,
ma ad as tejjid řxedmet nnek?
12 Ma ad xas tᵉttecřed ad ɣarek dd-yarr zzariɛet nnek netta,
ad tt yawi ɣar unedrar nnek?
13 Afriwen n nnɛamet ccaten s řxaḍar.
War din ahawař s wafriwen d warric nnes, □
14 maca tᵉttejja timeǧařin nnes deg ucař n temmurt,
tᵉttejja i-tent tteḥmant deg ijdi.
15 Tᵉttᵉttu aqa ijj n uḍar izemmar ad tent iřbez,
aqa řewḥuc n řexřa zemmaren ad xasent ɛefsen.
16 Nettat tqesseḥ deg imeẓyanen nnes axmi war ǧin nnes.
Baṭeř i tᵉttegg tizemmar nnes, maɣar nettat war tkessi s wemnus,
17 maɣar Arebbi ijja i-tt ad tᵉttu tiɣit,
war d as iwci bu tesɣart di řefhamet.
18 Maca mařa teksi deg uḍar nnes, tessgeɛɛad ixef nnes,
tḍeḥḥec x uyis d wenni xas inyin.
19 Ma tzemmared ad tewced jjehd i uyis?
Ma tzemmared ad tessyarḍed ijiman nnes s ssbib?
20 Ma tzemmared ad t yarr ineṭṭu am uburxes?
Řɛezz n usneḥneḥ nnes issaggʷad aṭṭas.
21 Xebbcen iysan s iḍaren nsen am ttrajan di řewḍa n teɣzurt,
ifarḥ uyis s jjehd nnes,
itteffeɣ maḥend ad immeřqa ak-d řɛeskar yarḍen arruḍ n wuzzař.
22 Iḍeḥḥec x marra min issaggʷaden, war ittnexřiɛ zi walu,
u war iddikkwiř ɣar ḍeffar zi ssif.
23 Ittqarqub weqrab n fřitcat sennej nnes,
lansa d fřitca ttissiqen.
24 S ddriz n tceḍyin d zzɛamet iṣarreḍ netta tammurt,
war izemmar ad ittwasbedd ɣar uṣuḍi n uyicc n icarri.
25 Ɣar tmijja n uṣuḍi deg uyicc n icarri issneḥniḥ: ‘Heheh!’
Ittaca ak-d umenɣi zi řaggʷaj,
zzga n izeǧifen n řɛeskar d iɣuyyan n umenɣi.
26 Ma iṭṭaw řbaz zi řefhamet nnek,
aqa ittbezzaɛ afriwen nnes ɣar ljanub?
27 Ma issgeɛɛad ugidar ixef nnes ammu sennej qaɛ s řumur nnek,
u ittegg řɛucc nnes di řuɛřa? ■
28 Izeddeɣ u issnusa x jjarf,
x ucenqub n jjarf, aqa-t d lburj nnes.
29 Ssenni iḥeṭṭa zzardet,
tiṭṭawin nnes xezzarent-i-dd zi řaggʷaj.
30 Imeẓyanen nnes sekkfen idammen,
u mani ǧan inni ittwanɣen, aqa-t din i yeǧa. ■