Arebbi issiweř ak-d Ayub x wexřaq n marra min iǧan
38
1 Awarni as yarra-dd SIDI x Ayub zi tḥaryaḍt, inna: 2 Man wen issbarrcnen acawar,
s wawařen břa tussna? ■
3 Byes xenni tijɛinnatin nnek am weryaz.
Necc xseɣ ad cek sseqsiɣ u cek arr-dd xafi!
4 Mani cek tuɣa umi ggiɣ Necc dsas n tammurt?
Ini t mařa ɣarek řefhamet s tidett. ■
5 Man wen iggin řeɛbar nnes, wah cek tessned tt, ma war iǧi amenni?
Niɣ man wen xas imeḥḍen afiřu n řeɛbar?
6 Min xef hwan dsusa nnes,
niɣ man wen issarsen aẓru n teɣmart nnes,
7 umi itran n ṣṣbeh ɣennjen jmiɛ s řefraḥet,
umi sřiwřewen marra arrawen n AREBBI?
8 Man wen ibellɛen řebḥar s tewwura,
umi dd-idduqqez uca iffeɣ-dd zeg uɛeddis n yemmas, ■
9 umi d as ggiɣ iseynuten d arruḍ nnes,
d useynu ibbumbes d amendiř maḥend ad dayes t ssehnunnḍeɣ,
10 umi d as arẓiɣ afray inu am weḥfur yuǧɣen,
u umi d as ggiɣ zzekrun d tewwura,
11 uca nniɣ: ‘Ař da i dd ɣa tased, war ɛeddu.
Danita ad tᵉttwasbedd nnfaxet n řemwaj nnek.’
12 Ma tumured cek ateffu n ṣṣbeḥ deg wussan nnek?
Ma tesscaned i tfawt n řefjar amcan nnes
13 maḥend ad tᵉṭṭef afriwen n temmurt,
u ad zzayes tezzerz iɛeffanen?
14 Ad tedweř temmurt am tarrist sadu ṭṭabeɛ,
u ad tᵉṭṭef addud n warruḍ.
15 Iɛeffanen ad asen tᵉttwakkes tfawt nsen,
u aɣiř ittwasgeɛɛden ad ittwarẓ.
16 Ma tiwḍed ɣar řɛunṣarat n řebḥar,
ma tuyured x wudem n temmurt n waman yuǧɣen?
17 Ma ttwaɛarrant tewwura n řmewt i cek,
ma teẓrid tiwwura n tiři n řmewt?
18 Ma tᵉttawi-dd tmeẓra nnek ař uneggaru n temmurt?
Ini t mařa tessned aya marra.
19 Mani iǧa webrid ɣar tzeddiɣt n tfawt?
U taǧest, mani teǧa tzeddiɣt nnes,
20 ḥima ad tzemmared ad tt tnedhed ɣar wemcan nnes,
u xenni ad tessned mliḥ imesraq ɣar taddart nnes?
21 Cek aqa tessned man aya niɣ, minzi cek tuɣa txeřqed, niɣ lla?
U ma war iǧi řqedd n wussan nnek d aṭṭas!?
22 Ma tudfed ɣar ixxamen n řexzen n wedfeř,
ma teẓrid řehrit n tebruri,
23 nni x ceṭṭareɣ i řweqt n řeḥṣaret,
i wass n garra d umenɣi?
24 Mani iǧa webrid ittbeṭṭan tifawt,
uřa d abrid ittbezzɛen aṣemmiḍ n ccarq x temmurt?
25 Man wen ifeǧeq řmizab i řḥemřet n wenẓar,
uřa d abrid i wassam n wajjajen,
26 ḥima ad issekk anẓar x temmurt nni di war izdiɣ ḥed,
x řexřa i war di izdiɣ uřa d ijj,
27 ḥima ad issarwa jjwayeh ixřan u ittwaxřan,
u ḥima ad isseɣmi arrbiɛ d ṭṭri? ■
28 Ma anẓar ɣares ca n babas,
niɣ man wen i dd-ittejjan tuddimin n nnda?
29 Zi man aɛeddis i zi dd-iffeɣ wejris,
u nnda ijersen n ujenna wi i-t-i-dd-yurwen?
30 Ddakkwařen waman am weẓru,
uca ijars wudem n waman yuǧɣen.
31 Ma tzemmared ad tcedded Agraw n Sebɛa n Yetran,
niɣ tfessyed snaseř n yetran n Uriyun? ■
32 Ma tzemmared ad dd-tessuffɣed itran n Zudyak ɣar řḥař nsen,
uřa d Ddub Ameqqran ak-d tarwa nnes?
33 Ma tessned izerfan n ujenna,
ma tzemmared ad tdebbared x uqarri nsen di temmurt? ■
34 Ma tzemmared ad tessgeɛɛded ɣar iseynuten tmijja nnek,
ařami cek i ɣa tdeř ict n řḥemřet n waman?
35 Ma tzemmared ad tessekked assamen maḥend ad qeǧqen,
u ad ac inin: ‘Aqa-neɣ da!’?
36 Man wen issarsen tiɣit di daxeř n bnadem?
Niɣ man wen iwcin řefhamet i řeɛqeř? ■
37 Man wen ifarrzen iseynuten s řeɛqeř,
u iɣarrafen n waman n ujenna wi ten ittzeǧaɛen,
38 ařami ittwafsiy ucař, idweř d abeǧaɛ,
uca řesqen ibursa n temmurt?
39 Ma tzemmared ad tᵉṭṭfed zzardet i tayradt,
niɣ ad tesseřhud řaẓ n wayraden imeẓyanen, ■
40 řami nuffaren deg ifran nsen,
u ttḥaman zi řemrageḥ nsen?
41 Man wen issewjaden i ubaɣeř macca nnes,
xmi sɣuyyun imeẓyanen nnes ɣar Arebbi,
xmi ttemhafan nhřa macca? ■