Akemmeř n řhard wiss arebɛa n Ilihu: řemɣaret n Arebbi di ṭṭabiɛa
37
1 Wah, s uya ittarjij wuř inu, ineṭṭu zeg wemcan nnes.
2 Sřem mliḥ i zzhir n tmijja nnes,
i wejdab n wajjaj i dd-ittekken zeg uqemmum nnes. ■
3 Issekk i-t sadu marra ajenna,
u tafawt nnes ař ineggura n temmurt.
4 Awarni as izehhar s tmijja ijehden,
ihemhem s tmijja n lɛaḍama nnes,
u war imenneɛ assamen, mařa tᵉttwaseř tmijja nnes.
5 Arebbi iddardiḥ s tmijja nnes s tebridt n řeɛjeb,
ittegg řeḥwayej timeqqranin, neccin war asent nfehhem. ■
6 Maɣar iqqar i wedfeř: ‘Wḍa ɣar temmurt!’,
u amenni i iqqar uřa i wenẓar.
Xenni iccat wenẓar d iɣezran. ■
7 Netta ittcemmeɛ afus n mkuř bnadem,
ḥima marra iwdan ad ssnen řxedmet nnes.
8 Řewḥuc ttnuffaren di řemrageḥ
u ttɣiman deg ifran nsen.
9 Tettas-dd tḥaryaḍt zeg wexxam nnes n daxeř,
u ak-d usemmiḍ n ccamal tᵉttas-dd uřa d tesmeḍ.
10 S uṣuḍi n nnefs nnes ittawi-dd Arebbi ajris,
jemden waṭṭas n waman. ■
11 Wah, ittɛemmar iseynuten s tuffet,
ittbezzeɛ aseynu n tfawt nnes.
12 Wanita ittraḥ ittas-dd,
mammec t ineddeh Netta,
ḥima ad ggen marra min i d asen yumur,
x wudem n temmurt, x temmurt.
13 Niɣ am weɛmud niɣ i řefḍeř n temmurt,
niɣ am wescan n tmexsa icuwwaren,
ijja i-t ad ihwa. ■
14 Ewc amezzuɣ i man aya, a Ayub,
bedd, sqar, u ḥḍa x řeɛjayeb n Arebbi.
15 Ma tessned mammec i xasen idebbar Arebbi,
mammec issruɣa tfawt n useynu nnes?
16 Ma tessned mammec tteḥraran iseynuten,
ma tessned řeɛjayeb n wenni ɣar teǧa tussna tmun.
17 Cek, wenni umi iḥemma warruḍ,
mařa Netta issarsa tammurt s arriḥ n ljanub,
18 ma tbezzɛed akides řqubbet n ujenna,
tenni din ibedden am ict n tisit ifesyen? ■
19 Sargeb aneɣ cek min i d as ɣa nini, i Arebbi,
maɣar neccin war nzemmar ad nfessar walu mliḥ zi ssibbet n taǧest.
20 Ma ad as hajan, aqa ssiwřeɣ ammu?
Mařa ca n yijjen ad tt yini, ad ittwaṣarḍ nican. □
21 Řexxu war ittwiři bnadem tafawt,
tenni yareqqen deg iseynuten,
maca mařa iɛdu usuḍi n usemmiḍ, aqa ifarreḍ i-ten.
22 Zi ccamal ittas-dd wureɣ,
tissiqt issaggʷaden tarsa x Arebbi.
23 Amzemmar x kuřci i war nzemmar ad t naf,
wenni d ameqqran di jjehd,
netta war ittdeǧi řḥeqq d tsegda tameqqrant. ■
24 S uya tteggʷeden zzayes iwdan,
Netta war ixezzar ɣar yenni iḥessben ixef nsen d imiɣisen n wuř.