Řḥarḍ wiss arebɛa n Ilihu x ujarreb d weɛqab ɣar Arebbi
36
1 Yarni Ilihu deg wawař, inna: 2 Ṣbar cwayt akidi, xenni necc ad ac ssecneɣ,
aqa din ɛad řesbab ktar di ṭṭweɛ n tmesřact n Arebbi.
3 Necc ad dd-awyeɣ tussna inu zi řaggʷaj,
ad neɛmeɣ tasegda n wenni d ayi dd-ixeřqen.
4 Maɣar s tidett, awařen inu war ǧin d ixarriqen,
aqa zzatek wenni d bu-tussna tameqqrant.
5 Xzar, Arebbi imɣar aṭṭas, maca war isseḥqiri ḥed,
imɣar jjhed n řefhamet nnes. ■
6 Aɛeffan war t ittejji ad iddar,
maca i imezřaḍ ittaɣ asen tasɣart nsen.
7 Netta war issḥeyyid tiṭṭawin nnes x umsegged,
maca issɣimi ten i řebda x řɛarc ak-d ijeǧiden,
uca ammu i ɣa ttwasuɛřan. ■
8 Mařa ttwawten nitni di řegyuḍ,
ttwaḥebbsen di ssnaseř n řeɣben,
9 xenni isscen asen timegga nsen tiɛeffanin d iɛeddiyen nsen,
aqa mɣaren aṭṭas.
10 Yarezzem amezzuɣ nsen i uwebbex,
iqqar asen ad dd-dewřen zi řmuɛṣiyyet nsen.
11 Mařa sřin u sexxaren as,
xenni ad ssqefřen deg wefřaḥ ussan nsen,
u di zzhar iseggʷusa nsen.
12 Maca mařa war sřin,
ad ttwahellken s lansa,
ad ssuffɣen buḥbeř am war ɣarsen teǧi bu tussna.
13 Nitni inni issniɛmiřen deg wuř nsen, ttsettafen aɣḍab,
war tᵉttaren aɛawen mařa Netta icarf i-ten.
14 Řeɛmar nsen ad immet umi nitni ɛad d iḥudriyyen,
maɣar ddaren jar imitleyyen. ■
15 Ad ifekk amezřuḍ di řeɣben nnes,
u di ddeǧ ad yarzem amezzuɣ nsen.
16 Ammu i cek iɛarren ɛawed zeg wuḍuf n řeḥṣaret,
ɣar ttasiɛ mani war ittiři ɛad unedqef,
u min dd ɣa ssarsen x ṭṭabřa nnek d macca teccur s tdunt. ■
17 Maca cek tennuɣed di ccreɛ ak-d uɛeffan,
maca ddeɛwet d tenfuč ttasent-i-dd ak-d wayawaya.
18 Ḥḍa aqa asɛar war cek ittɣarri i ustehzi,
u řqedd n ttaman n weṣřaḥ war cek issuffuɣ zeg webrid.
19 Ma iɣuyyan nnek ad cek ṣṣaren zi řeḥṣaret,
niɣ marra min tᵉttegged s marra tizemmar nnek?
20 War ttmeẓri di ǧiřet,
xmi i ɣa ttwakksen řegnus zeg wemcan nsen.
21 Ḥḍa ixef nnek, war ggur x uɣezdis mani ittwaff řɣecc,
aqa cek ad tixdared aya x waḍar.
22 Xzar, Arebbi issɛuǧa s jjehd nnes,
man wen iǧan d Amseřmad am Netta?
23 Man wen i d as isscanen abrid?
Niɣ man wen i d as innan: ‘Cek teggid řɣecc!’? ■
24 Ɛqeř ad tessɛuǧid řxedmet n ifassen nnes,
řxedmet nnes i zi ttɣennajen iwdan.
25 Kuř bnadem ittwařa tt,
zi řaggʷaj ttwařan tt iwdan.
26 Xzar, Arebbi d ameqqran, war nzemmar ad nefhem aya,
řqedd n iseggʷusa nnes war nzemmar ad dayes narzu. ■
27 Maɣar Netta ijebbed tuddimin n waman,
tinni dd-ittwakksen zi tayyut xenni dewřent d anẓar,
28 anẓar nni zi ttnesnisin iseynuten,
anẓar nni dd iweṭṭan s ufeyyeḍ x iwdan.
29 Man wen ittḥakan ɛemmarṣ deg ubezzeɛ n iseynuten,
uřa deg wajjajen zi Texzant nnes?
30 Xzar, ittbezzeɛ tafawt nnes tiwa n yixef nnes,
ittřeḥḥaf zzayes ṭṭřufa yuǧɣen qaɛ n řebḥar.
31 Maɣar s uya ittcarreɛ řegnus.
Itticc macca s waṭṭas. ■
32 Ittcurra ifassen nnes s tfawt,
iweṣṣa tt ad teřqef tandayt.
33 Aḍarḍeḥ n wassamen ittbarreḥ zzayes,
uřa d taḥimart, aqa Netta ad dd-yas.