Řḥarḍ wiss třata n Ilihu: tasegda n bnadem war tneffeɛ zzat i Arebbi
35
1 Yarra-ddf Ilihu ɛawed awař uca inna: 2 Ma ittɣiř ac aya nican,
aqa teqqared: ‘Tasegda inu ktar x tenni n Arebbi!’?
3 Maɣar tennid: ‘Man řefḍeř ɣarek?
Min d ayi dd ɣa ikkaren aqa necc war tteggeɣ ddnub?’ ■
4 Ad xak dd-arreɣ,
uřa x imeddukkař nnek akidek.
5 Xzar ajenna, u xẓar,
ḥekkar iseynuten tiwa nnek qaɛ!
6 Mařa texḍid, min i d as tᵉttegged s man aya?
Mařa iɛeddiyen nnek d aṭṭas, min zzayes ɣa tawyed?
7 Mařa cek d amsegged, min i d as tᵉtticed s uya,
niɣ min itteṭṭef Netta zeg ufus nnek? ■
8 Aqa tuɛeffna nnek třeqqef aryaz am cek waha,
u tasegda nnek tᵉttiři di ṭṭweɛ n ijj n mmis n bnadem waha.
9 Sɣuyyun zeg waṭṭas n řeḥṣarat,
ttřaɣan ɣar twiza zi ssibbet n uɣiř n ayt n bu-ṣṣulṭa.
10 Maca uřa d ijjen ma iqqar: ‘Mani iǧa Arebbi, wenni d ayi iggin,
wenni itticen izřan n uṣebbeḥ di ǧiřet,
11 wenni d aneɣ isseřmaden s řmař n temmurt,
d wenni d aneɣ itteggen d imiɣisen s ijḍaḍ n ujenna?’
12 Dinni sɣuyyun nitni, maca Netta war dd-ittarri,
zi ssibbet n nnfaxet n iɛeffanen. ■
13 S tidett, Arebbi war ittesři ɣar iɣuyyan ibeṭṭřen,
Amzemmar x kuřci war kides iřehhi.
14 Cek teqqared, aqa cek war t tᵉttwiřid,
waxxa amenni tamesřact aqa-tt zzat i wudem nnes.
Raja t xenni.
15 Mařa řexxu axeyyeq nnes war iccit ɛad,
ma xenni Netta war issin walu x zzɛamet? ■
16 Ayub icarreg aqemmum nnes baṭeř,
ittegg awařen imeqqranen nhřa tussna.