Řḥard wiss tnayen n Ilihu x mammec ittegg Arebbi řebda s řḥeqq
34
1 Iṭṭef Ilihu ɛawed deg wawař, inna: 2 Sřem-dd ɣar wawařen inu, a imiɣisen,
wcem ayi amezzuɣ, a kenniw, ayt n tussna.
3 Maɣar amezzuɣ inebbec deg wawařen,
am mammec ittqasa waneɣ macca. ■
4 Jjem aneɣ ad nixḍar jar aneɣ min iǧan nican,
jjem aneɣ ad nessen jar aneɣ min iǧan d aṣebḥan.
5 Maɣar Ayub inna: ‘Necc d amsegged,
Arebbi ikkes ayi tasɣart inu! ■
6 Waxxa ɣari řḥeqq, waxxa amenni ttbaneɣ am ijj n bu-ixarriqen!
Ayezzim n fřitca i dayi iǧa,
war izemmar ad ittwasgenfa am war din iǧi uɛeddi.’ ■
7 Man wen iǧan d aryaz am Ayub,
wenni isessen astehzi am waman?
8 Netta iggur deg webrid am ittɛacar inni itteggen řmuɛṣiyyet,
iggur ak-d iryazen iɛeffanen.
9 Maɣar inna: ‘War ineffeɛ walu i bnadem,
mařa netta d amarḍi ɣar AREBBI.’
10 S uyenni sřem-dd ɣari,
kenniw iryazen i di teǧa řefhamet:
‘Iggʷej x Arebbi maḥend ad yegg tuɛeffna
uřa x Umzemmar x kuřci maḥend ad yegg min ifarɣen.’ ■
11 Maɣar Netta ixřef zi bnadem ɛlaḥsab timegga nnes,
u am mammec iǧa webrid n weryaz,
ammu t i ɣa yaf. ■
12 S tidett, ɛemmarṣ war ittegg Arebbi tuɛeffna,
Amzemmar x kuřci war issfarriɣ ccreɛ.
13 Man wen t iwekkřen x temmurt,
man wen issarsen marra ddunect?
14 Mařa Netta ad xas issneqřeb uř nnes,
mařa ad ɣares dd-yawi ɛawed buḥbeř nnes d nnefs nnes, ■
15 marra bnadem d řmař ad ssuffɣen buḥbeř,
u bnadem ad iɛqeb ɣar ucař. ■
16 Mařa dayek řefhamet, seř xenni i man aya,
ewc amezzuɣ nnek i řḥess n wawařen inu.
17 Ma izemmar wenni icarrhen řḥeqq ad iḥkem,
niɣ texsed cek ad tedɛid x wenni iǧan d Amsegged ameqqran? ■
18 Ma ad inin i ujeǧid: ‘Cek war tsekkʷid walu!’
u i tarwa n taṣiřet: ‘Kenniw d iɛeffanen!’?
19 Mammec xenni i Wenni war issizwiřin řḥukkam,
u war ittriḥ ak-d bu-wagřa x umezřuḍ,
maɣar marra nitni d řxedmet n ifassen nnes. ■
20 Mmuten deg wermac n wabřiwen, deg wezyen n ǧiřet.
Ttwanhezzen nitni, řgens nni, uca hellken.
Inni ɣar teǧa ṣṣulṭa ttwaɛarrnen ɣar uɣezdis,
břa ma iḥada ten ufus n bnadem.
21 Maɣar tiṭṭawin nnes xezzarent ɣar ibriden n mkuř ijj,
Netta ittwařa mliḥ marra iṣuraf nsen. ■
22 War teǧi tubbarcent u war teǧi tiři n řmewt,
mani zemmaren ad nnuffaren inni itteggen řɣar. ■
23 War d as ittxeṣṣi ad ixzar di bnadem aṭṭas n řweqt,
qbeř ma i dd ɣa yadef ɣar ddeɛwet zzat i uɣembub n Arebbi.
24 Iřebbez jjwaḥeř břa aseqsi,
uca igga inneɣni deg wemcan nsen.
25 Maɣar Netta issen timegga nsen,
issneqřab i-ten di ǧiřet uca ttwařebzen.
26 Iccat i-ten jar iɛeffanen,
deg ijj wemcan mani ttbeddan iwdan ttwařan,
27 minzi nitni ḥeyyden xas,
war ttḥekkiren marra ibriden nnes, ■
28 maḥend ad xas issiweḍ tɣuyyit n imezřaḍ,
u maḥend ad istajeb i iɣuyyan n řmusakin.
29 Mařa Netta yiwi-dd řhudnet, man wen dayes i ɣa iggen řɛib?
Mařa issnuffar aɣembub nnes, wi t ɣa iẓaren?
Iḥekkem řa x řgens am x bnadem,
30 ḥima war iḥekkem uřa d ijj n bnadem i itteggen s tnayen n wudmawen,
u ḥima war ttiřint ɛad txecfin i řgens.
31 Mři inna bnadem nni i Arebbi
‘Ssgeɛɛdeɣ ixef inu, war ttɛiwideɣ ad ssfesdeɣ.
32 Min war ttwiřiɣ, sɣar ayi t Cek!
Mařa ggiɣ min war iseggden, war t tteggeɣ ɛad.’
33 Ma ittxeṣṣa ad ixřef Netta am mammec t texsed cek?
Aqa tesseḥqared t!
Maɣar texsed ad tixḍared s yixef nnek, necc maca lla!
Mařa ittɣiř ac aqa tessned tt, ini tt!
34 Iryazen s řefhamet ad ayi inin,
am qaɛ aryaz amiɣis ittesřa-dd ɣari,
35 aqa Ayub war issiweř s tussna,
aqa awařen nnes břa řefhamet i yeǧan.
36 Iwa, ejj Ayub ad ittwaqeǧeb ař aneggar,
minzi ittarra-dd am iryazen ccuren s řmuɛṣiyyet.
37 Maɣar i ddenb nnes yarenni ɛad aɛeddi,
jar aneɣ iccat camxa s ifassen,
u ttmarenyen wawařen nnes ḍidd i Arebbi.