Ilihu yarenni di řḥarḍ amezwaru nnes
33
1 Seř řexxu ɣar řharḍ inu, Ayub, ewc amezzuɣ i wawařen inu marra.
2 Xzar, arzmeɣ aqemmum inu,
issawař yiřes inu sadu waneɣ inu.
3 Tteffɣen wawařen inu zi řeṣfayet n wuř inu,
tussna teqqur ad xas harrden iyencicen inu.
4 Arruḥ n Arebbi igga ayi,
aṣuḍi n nnefs n Umzemmar x kuřci iwca ayi tudart.
5 Mařa tzemmared, arr-dd xafi.
Sars ayi tamesřact, bedd zzati!
6 Xzar, necc am cek zzat i Arebbi,
uřa d necc ttwaggeɣ zeg ubeǧaɛ. ■
7 Xzar, ahuddi inu war cek issiggʷid ca,
war xak ttzeyyareɣ ca aṭṭas.
8 S tidett, aqa tennid t deg imezzuɣen inu,
sřiɣ i řḥess n wawařen-a: ■
9 ‘Necc d amezdag, břa ddenb,
d afurri i ǧiɣ u war dayi ca n řmuɛṣiyyet.
10 Xzar, yarezzu ssibbet ḥima ad zzayi icetca,
iḥesseb ayi d řeɛdu nnes. ■
11 Iḍaren inu iqqen i-ten ɣar ukeccuḍ,
iḥeṭṭa marra imesraq inu.’ ■
12 Xzar, ad ac iniɣ, war teǧid ca d amsegged deg uya,
maɣar Arebbi d ameqqran x bnadem.
13 Min xef kides tᵉttemɛarrid?
Aqa Netta war ittegg řeḥsab i marra timegga nnes!
14 Maɣar Arebbi issawař ict n twařa niɣ tnayen n twařawin,
maca bnadem war iḥeṭṭi:
15 di tirja, s ict n tmeẓriwt di ǧiřet,
xmi dd-iweṭṭa yiḍes yuǧɣen x iwdan,
deg unudem di rectu.
16 Yarezzem Netta amezzuɣ n iwdan,
ittcemmeɛ s ucemmiɛ nnes x uweddeb nsen,
17 ḥima ad issḥeyyed bnadem x tmeggit nnes taɛeffant,
ḥima ad issbedd nnfaxet x weryaz.
18 Netta imenneɛ řeɛmar n bnadem zeg uweṭṭu deg wenḍeř,
tudart nnes zeg uhellek s lansa.
19 Ijeyyeḥ i-t řeḥriq di qama nnes,
uřa d amenɣi řebda deg ixsan nnes.
20 Tudart nnes tarra i-t ittɛiffa aɣrum,
u řeɛmar nnes yarra i-t ittɛiffa macca iṣebḥen aṭṭas. ■
21 Iqeṭṭa weysum nnes zeg wudem nnes,
ixsan nnes nni war ttwaẓaren ɛemmarṣ, aqa ttbanen řexxu.
22 Ittqarrab řeɛmar nnes ɣar wenḍeř,
tudart nnes ɣar ijarrayen n řmewt.
23 Mařa xenni din ijj n Lmalak ibedd as-dd ɣar uɣezdis, ijj n Řɛadeř,
ijjen zeg wařef,
ḥima ad isscen i bnadem tasegda nnes,
24 xenni ad xas iḥinn, ad yini:
‘Fekk i-t, ařami netta war ihekkwi deg wenḍeř,
aqa Necc ufiɣ aṣřaḥ xas!’
25 Xenni ad tneɛneɛ arrimet nnes ktar zi ṭṭri n temẓi,
ad dd-idweř ɣar wussan n temẓi nnes.
26 Netta ad ittar Arebbi s tutra yuǧɣen u Netta ad xas yarḍa,
ařami wanita ad iẓar udem nnes deg usřiwřew n řefraḥet,
u ammu i ɣa yarr Netta i bnadem tasegda nnes. ■
27 Ad iɣennej i yewdan, ad yini:
‘Necc xḍiɣ, ssfarɣeɣ min iseggden,
maca Netta war zzayi tt yexřif.
28 Ifekk Arebbi řeɛmar inu zeg wenḍeř,
tudart inu txezzar ammu d wammu di tfawt.’
29 Xzar, marra aya ittegg i-t Arebbi,
tnayen niɣ třata n twařawin ak-d weryaz,
30 ḥima ad isseɛqeb řeɛmar nnes zeg wenḍeř,
ḥima ad t yarr yareqq s tfawt n tudart. ■
31 Ḥḍa, Ayub! Seř-dd ɣari!
Sqar, xenni necc ad ssiwřeɣ.
32 Mařa ɣarek awařen wejden, arr-dd xafi,
siweř, maɣar ɣari s řxaḍar ad xak barriɣ.
33 Mařa lla, seř-dd ɣari!
Sqar, u ad ac ssɣareɣ tiɣit.