1 Xenni ssbedden třata n yeryazen nni maḥend ad dd-arren x Ayub, minzi tuɣa d amsegged jar tiṭṭawin n yixef nnes. 2 Xas uca yarɣa uxeyyeq n Ilihu, mmis n Baraxyil, zi temmurt n Buz, zi řaǧ n Ram. Yarɣa uxeyyeq nnes x Ayub minzi igga wanita ixef nnes d amsegged x AREBBI. 3 Yarɣa uxeyyeq nnes uřa x třata n imeddukkař nnes, maɣar nitni, waxxa war ufin min zi xas i dd ɣa yarren, amenni arrin řɛib di Ayub.

4 Ilihu maca tuɣa iraja s wawařen qibač i Ayub, minzi nitni tuɣa mɣaren xas. 5 Umi iẓra Ilihu, aqa třata n yeryazen nni war ufin min zi dd ɣa yarren ɛad, yarɣa uxeyyeq nnes. 6 Uca iṭṭef Ilihu, mmis n Baraxil, zi Buz, deg wawař, inna:

Necc d ameẓyan deg iseggʷusa u kenniw d imeccaybuten.

S uyenni rajiɣ u bburrneɣ

maḥend ad awem ssecneɣ tussna inu. ^■  

7 Necc nniɣ: ‘Ejj inni imɣaren deg wussan ad ssiwřen,

ejj řqedd ameqqran n iseggʷusa n umeccaybu ad issargeb tiɣit.’

8 S tidett, buḥbeř izdeɣ di bnadem,

aṣuḍi n nnefs n Umzemmar x kuřci ittic asen řefhamet. ^■  

9 Inni imɣaren deg iseggʷusa war daysen teǧi tiɣit,

u iwessura war fehhmen i ccreɛ. ^■  

10 S uyenni qqareɣ: ‘Sřem-dd ɣari,

xenni uřa d necc ad ssecneɣ tussna inu.’

11 Xzar, rajiɣ awařen nwem,

ssḥesseɣ ɣar řefhamet nwem,

am tuɣa tarezzum x wawařen iseggmen.

12 Necc ḥḍiɣ kenniw mliḥ,

aqa da, uřa d ijjen ma tuɣa izemmar ad isseqneɛ Ayub,

uřa d ijjen zzaywem war izemmar ad dd-yarr x wawařen nnes.

13 S uya war qqarem: ‘Neccin nufa tiɣit!

Arebbi i izemmaren ad t inḍar, war iǧi bnadem.’

14 War ǧin wawařen nnes xafi,

u s wawařen nwem war xas dd-arriɣ.

15 Ttwarnan nitni, war dd-ttarrin ɛad,

awařen ttwakksen zzaysen.

16 Řajiɣ, maca war ssiwřen,

maɣar ssbedden awař, war dd-ttarrin ɛad.

17 Uřa d necc xseɣ ad ssiwřeɣ di nnubet inu,

uřa d necc ad ssecneɣ tussna inu.

18 Maɣar ccureɣ s wawařen,

iḥessar ayi buḥbeř di daxeř inu.

19 Xzar, aɛeddis inu ittegg am tziyyat n binu war yarzimen ɛad,

am txuncay n yiřem n jdid aqa netta ittegg axmi ggur ad idduqqez.

20 Ad ssiwřeɣ ḥima ad fsuseɣ,

ad arzmeɣ iyencicen inu, ad dd-arreɣ.

21 War tteggiɣ s wudmawen ak-d uřa d ijj,

war ssiwřeɣ uřa ak-d ijj n bnadem s wawařen imiẓiden.

22 Maɣar war zemmareɣ ad ggeɣ s wawařen imiziḍen,

maɣar xenni ad ayi ikkes Wenni i d ayi iggin.