Ayub iceffeɛ belli war dayes bu řɛib
31
1 Necc ggiɣ řɛahd ak-d tiṭṭawin inu, mammec xenni i ɣa xzareɣ di teɛzarect?
2 Maɣar min iǧan tasɣart n Arebbi zi sennej,
niɣ tasɣart di řwart n Umzemmar x kuřci zeg ijenwan yuɛřan?
3 Ma war iǧi aḍeyyeɛ ikkar-dd i uɛeffan,
arẓiyyet i yenni itteggen řmuɛṣiyyet?
4 Ma war ittwiři Netta ibriden inu,
ma war iḥesseb Netta řqedd n marra iṣuraf inu? ■
5 Mařa tuɣa uyureɣ di řexdeɛ,
niɣ iqeǧeq uḍar inu ɣar řɣecc,
6 ejj SIDI ad ayi iwzen xenni di řmizanat iseggden,
ařami i ɣa issen Arebbi řeṣfayet inu.
7 Mařa iṣuraf inu ffɣen zeg webrid,
uř inu iḍfar tiṭṭawin inu,
uca xenni iřṣeq řɛib deg ifassen inu,
8 xenni ad zarɛeɣ necc, maca ijjen nneɣni ad icc,
u min ɣari dd-iɣemmayen ad ittwaqřeɛ!
9 Mařa uř inu ittwaɣwa ɣar ict n temɣart,
niɣ tuɣa ttḥamiɣ ɣar tewwart n wajjar inu, ■
10 ejj xenni tamɣart inu ad teḥri imendi i yijjen nneɣni,
u jjem inneɣni ad xas aḍaren.
11 Maɣar aya d řefḍiḥet,
d ict n ljarima i xas i ɣa wten řquḍat.
12 Maɣar aya d timessi tᵉttett ař qeṭṭu,
tqeǧeɛ marra řɣiǧet inu.
13 Mařa ssḥeqqareɣ řḥeqq n umsexxar inu d tayya inu,
řami tuɣa ttemcubbucen akidi,
14 min i ɣa ggeɣ xenni, mařa SIDI ikkar,
mařa Netta iqeǧeb ayi,
min xas dd ɣa yarreɣ xenni? ■
15 Wenni d ayi iggin deg uɛeddis n yemma, ma war t iggi uřa d netta?
Ma war iǧi d Ijj wenni d aneɣ dd-ixeřqen deg uɛeddis n yemmatneɣ? ■
16 Mařa qemmḥeɣ ameẓri n imezřaḍ,
niɣ ssruɣ tiṭṭawin n tajjač,
17 mařa mɣir necc waha cciɣ ařeqquz n weɣrum inu,
ayujiř maca war zzayes yecci,
18 - maɣar zi temẓi iyma netta ɣari am iyma ɣar babas,
zeg uɛeddis n yemma nedheɣ tt -
19 mařa ẓriɣ ijjen ittwahellek minzi war ɣares iǧi warruḍ,
niɣ minzi war din iǧi dduri i umezřuḍ,
20 mařa ɛemmarṣ war d ayi barkent tejɛinnatin nnes,
minzi igga ad issiḥma ixef nnes s tḍuft n icarriyen inu,
21 mařa afus inu ihudd x uyujiř,
minzi ẓriɣ aqa din twiza i necc ɣar tewwart n tendint, □
22 ejj xenni ad ayi tewḍa teɣruḍt inu zeg ijiman,
u ad ayi yarẓ uɣiř inu zeg yiɣes!
23 Maɣar iwḍa-dd xafi unexřiɛ ameqqran,
ict n řmuṣibet zi ɣar Arebbi,
war zemmareɣ ad ggeɣ walu zzat i Uɛuǧi nnes.
24 Mařa ggiɣ necc ureɣ d atecři inu,
niɣ nniɣ i wureɣ iɣřan aṭṭaṣ: ‘Cek d řaman inu!’, ■
25 mařa farḥeɣ, umi imɣar wagřa inu,
umi afus inu iṭṭef aṭṭas d agřa, ■
26 mařa ẓriɣ tafawt n tfuct xmi tᵉttwesseg,
niɣ taziri xmi teggur di tissiqt nnes, ■
27 uca ittwaɣwa wuř inu di tnuffra,
uca ssudmeɣ tent s ufus deg uqemmum inu,
28 xenni iři uřa d man aya d řmuɛṣiyyet ad tt wcen i řquḍat,
maɣar xenni ggureɣ ad nkareɣ Arebbi nni iǧan sennej.
29 Mařa farḥeɣ i arẓiyyet n wenni d ayi icarrhen,
farḥeɣ umi t iřqef řɣar! ■
30 Necc maca war jjiɣ aneɣ inu ad ixḍa,
umi kkwareɣ řeɛmar nnes s nneɛřet! ■
31 Mařa iryazen nni iǧan deg uqiḍun inu war qqaren:
‘Man wen xenni zeg yenni iksin zeg weysum inu war ttwasjiwnen?!’
32 Uřa d ijj n řbarrani maca war issens di barra x webrid,
maɣar i umsebrid arzmeɣ tiwwura inu.■
33 Mařa necc, am Adam, dřiɣ axeṭṭu inu,
umi ssnuffareɣ řmuɛṣiyyet inu deg weḥsin inu, □
34 minzi ggʷedeɣ zi řɣaci ameqqran,
niɣ issnexřeɛ ayi useḥqar n řwacun inu,
ařami qqimeɣ sseɣdeɣ, war ffiɣeɣ ɛad zi tewwart ɣar barra ...
35 Mři ɣari ijjen wenni d ayi ɣa isřen.
Xzar, acemmiɛ inu - Amzemmar x kuřci ad xafi dd-yarr -
uřa d adlis ittwannḍen nni t yura weryaz nni kidi ittemcubbucen.
36 Maɛlik ufiɣ ma war t arebbuɣ x tɣarḍt inu,
ad t qqneɣ i uzeǧif inu am ijj n ttaj.
37 Iwa, ad as iniɣ řqedd n iṣuraf inu,
ad ɣares dd-qarrbeɣ am ijj n řḥakem.
38 Mařa řeɛraṣi inu isɣuyy xafi,
iɛeyyaden nnes ad run ak-d wayawya marra,
39 mařa cciɣ ṣṣabet nnes nhřa axeǧeṣ,
u ggiɣ řeɛmar n ixemmasen nnes iḍřeq i buḥbeř,
40 ejj xenni ad iɣmi cbarq ak-d isennanen deg wemcan n yirden,
uřa d řeɛcub yarṣuden deg wemcan n imendi.
Aqa da i qḍan wawařen n Ayub.