Ayub issiweř x řemḥayem nnes n yiḍa
30
1 Řexxu maca tuɣa ḍeḥḥcen xafi iḥudriyyen nni iǧan d imeẓyanen xafi deg wussan, inni babatsen war ɣari sekkwin
maḥend ad ten ggeɣ ɣar yiṭan i iǧan x wuǧi inu.
2 Min ɣa yegg xenni s jjehd n ifassen nsen?
Aqa ifna jjehd nsen zi ssibbet n tewsar.
3 Zi řqiǧet u zi řaẓ dewřen isriwen,
ttmeɣzazen di řwaṭa yuẓɣen
di tubbarcent teccur s ureddeǧ d urebbej.
4 Nitni řeqqḍen řebzar ameǧaḥ jar cbarq,
iẓewran n uzezzu d aɣrum nsen.
5 Uẓẓřen xasen zi tmunet n iwdan,
kkwaren ten am ixewwanen,
6 ḥima ad zedɣen di teɣzurin issaggʷaden,
deg ifran n ucař u di řejruf.
7 Sɣuyyun jar cbarq,
sadu tizeggwarin ssmunan.
8 Tarwa n ibuhařiyyen d tarwa břa isem,
inni uẓẓřen xasen zi temmurt s uzeǧaḍ.
9 Řexxu maca aqa ayi deg izři nsen n tẓawart,
dewřeɣ asen i texbarjit. □ ■
10 Carrhen ayi, ttaggʷajen xafi,
war ttseḍḥin ca ad ssusfen x uɣembub inu. ■
11 Maɣar Netta issefsi asɣun n tqiḍunt inu uca issehwa ayi.
Nitni nḍaren ssrimet nsen zzati. □
12 Ɣar uɣezdis afusi inu kkaren-dd xafi iɣeddiwen n tarrawt,
ɛarrnen iḍaren inu,
ssgeɛɛaden xafi imesraq n arẓiyyet nsen.
13 Abrid inu arẓin t,
arennyen tamara x tamara inu
inni simant nsen war iǧi wi d asen ɣa iwcen afus.
14 Axmi dd-ttasen zeg ijj n unuqqib d miriw,
ttakkwaḍen am řemwaj yareddǧen.
15 Ttwakebben-dd xafi inexřiɛen,
am usemmiḍ ḍeffaren nitni ccan inu,
iḍwa zzhar inu am ijj n useynu.
16 S uya ifessi řexxu řeɛmar inu dayi,
ussan n řeɣben mennɛen ayi.
17 Di ǧiřet issnuqqub ayi ixsan inu i dayi iǧan,
řeḥriq i d ayi ittɣezzan war yaressi.
18 Ittwabeddeř warrud inu s jjehd ameqqran
ařami war xafi tteɛqiřen ɛad,
u Netta icarf ayi am tma i innḍen
i warzem n yiri deg warruḍ.
19 Inḍar ayi deg ubeǧaɛ,
dewřeɣ am ucař d yiɣɣeḍ.
20 Sɣuyyuɣ-dd ɣarek, maca Cek war xafi tᵉttarrid,
necc beddeɣ da, maca war d ayi tḥeṭṭid.
21 Cek tdewřed ayi am ijj n bu-řexcunet,
tᵉttdarraced xafi s ufus nnek ijehden.
22 Cek tessgeɛɛaded ayi u tneddhed ayi deg usemmiḍ,
tessefraɣed qaɛ addud inu.
23 Maɣar necc ssneɣ aqa Cek ad ayi tnedhed ɣar řmewt,
ɣar taddart mani ttmunen marra inni iddaren. ■
24 Ma war ineṭṭar bnadem afus nnes mařa iwḍa,
ma war isɣuyyu walu qaɛ ɣar arẓiyyet nnes?
25 Ma war ruɣ x wenni tuɣa ɣar iǧa wussan n tamara,
ma war icḍin buḥbeř inu x umezřuḍ? ■
26 Umi ssitmeɣ ɣar min iṣebḥen, aqa yusa-dd min iǧan d aɛeffan,
umi rajiɣ tafawt, tusa-dd taǧest.
27 Ttnennan adanen inu, war arsin,
iwḍen-dd wussan n tamara ɣari.
28 Tuɣa uyureɣ deg wecḍan, břa řehmu n tfuct.
Kkareɣ-dd deg wegraw n řgens uca qqimeɣ sɣuyyuɣ deg ujenna.
29 I wuccanen n řexřa dewřeɣ d umatsen zzaysen,
i yessis n nnɛamet d amɛacar. ■
30 Tiřmect inu tedweř xafi d akarkuc abarcan,
zi tmessi cemmḍen ixsan inu. ■
31 Tedweř tirart n řgambri inu i wecḍan,
tamja inu i řḥess n imeṭṭawen.