Ayub issiweř x mammec tuɣa tudart nnes qbeř
29
1 Uca yarni Ayub di řhard n lmatal nnes, inna: 2 Mři ǧiɣ am deg uyenni n iyuren iɛdun aṭṭas zeg wami,
am deg wussan uyenni řami d ayi tuɣa iḥeṭṭa Arebbi,
3 řami igga řefnar nnes ad yareɣ x uzeǧif inu,
u tuɣa ggureɣ di taǧest s tfawt nnes.
4 Mři ǧiɣ am deg wussan n temẓi inu,
umi amuni di řaman ak-d Arebbi tuɣa ibedd x tqiḍunt inu,
5 umi Amzemmar x kuřci tuɣa-t ɛad akidi,
u iḥenjiren inu ɛad nnḍen ayi-dd,
6 umi iṣuraf inu tuɣa ɛummen di trussi,
u taṣḍart tuɣa tᵉttzeǧaɛ zzati tiɣezratin n zzect!
7 Umi dd-ffɣeɣ ɣar tewwart n tendint,
jjiɣ ssbedden ayi řkursi inu deg wazzay,
8 nnufaren iḥudriyyen řami d ayi ẓrin,
u imeccaybuten kkaren, qqimen bedden.
9 Imeqqranen menɛen awařen nsen,
uca ssarsen afus x uqemmum nsen,
10 tmijja n řḥukkam tesqar,
iřseq iřes nsen ɣar waneɣ nsen.
11 Mařa isřa ayi umezzuɣ, issemɣar ayi,
mařa teẓra ayi tiṭṭ, teched x řxaḍar inu.
12 Maɣar ssnejmeɣ řmeskin nni isɣuyyen,
ayujiř nni war ɣares tuɣi wenni t i ɣa iɛawnen. ■
13 Řxaḍar n wenni ihellken, yusa-dd xafi,
uř n tajjač ggiɣ t isřiwřew s řefraḥet.
14 Yarḍeɣ tasegda u tasegda tessyarḍ ayi.
Tuɣa ccreɛ inu am useřham u am areẓẓet. ■
15 Tuɣa ayi d tiṭṭawin i idarɣařen,
uřa d iḍaren i iqiḍaren.
16 Tuɣa ayi d babatsen i imezřaḍ,
uca ddeɛwet n wenni war ssineɣ, beqqceɣ tt.
17 Arẓiɣ tiɣmas n teɣmart n wenni iggin min war iseggden,
uca kkseɣ zzardet i teɣmas nnes.
18 Nniɣ: ‘Ad ssuffɣeɣ buḥbeř inu x řɛucc inu,
ad ddareɣ tudart tazirart am ujḍid n funiks.’
19 Iẓewran inu bezzɛeɣ ten ɣares ař aman,
u di ǧiřet iqqim nnda x řefruɛ inu.
20 Tuɣa řɛezz inu ittneɛniɛ dayi řebda,
řqews inu isheř deg ufus inu řebda.
21 Sřin-dd ɣari, rajan,
sqaren di ṭṭweɛ n ccwar inu.
22 Awarni i wawař inu war ssiwřen twařa nneɣni,
awařen inu udumen xasen.
23 Nitni rajan ayi am rajan anẓar,
arzmen aqemmum nsen am t arezmen ɣar wenẓar n tefsut.
24 Mařa sfarnineɣ ɣarsen, war zemmaren ɛad ad ttiqqen,
maca tafawt n uɣembub inu war zmiren ad kides mmɛařan.
25 Ixḍareɣ asen abrid uca beddeɣ asen ɣar uzeǧif,
zedɣeɣ am ujeǧid jar řɛeskar,
am wenni ittɛezzan inni iceḍnen.