Řḥarḍ n Ayub x tiɣit
28
1 S tidett, aqa din amcan mani tᵉttwaf nnuqart, uřa din amcan i wureɣ mani t ssizdigen.
2 Uzzař ttawyen t-i-dd zeg ucař,
u zeg weẓru ssfessyen nnḥas.
3 Igga bnadem qeṭṭu i taǧest,
netta yarezzu di mkuř amcan mani mma,
x weẓru i dd-itteffɣen zi tubbarcent d tiři n řmewt.
4 Yarzem ijj n wexjiḍ břa ma ad din yiři ḥed akides.
Ttwattun zeg iḍaren n yinni sennej nsen,
uyřen ttraḥen tasen-dd břa ma yarra asen-dd ḥed řbař.
5 Itteffeɣ-dd weɣrum zi temmurt,
am swadday nnes marra axmi s tmessi inneqřeb.
6 Iẓra nnes d amcan mani ttafen ṣaffir,
u dayes i teǧa uřa d taɛejjact n wureɣ.
7 Ajḍiḍ ittkeccaḍen war issin amesruq i ɣares iǧan,
u tiṭṭ n ujḍid amessɣuy amuqḍiɛ n tiṭṭawin ɛemmarṣ war t teḥḍi.
8 Iyraden imeẓyanen ineffxen war dayes uyuren,
uřa d ayrad izehharen war t ittcuqi.
9 Maca bnadem isarreḥ afus nnes ɣar sseǧaḥ iqesḥen,
issneqřab idurar kuřci.
10 Di řejruf iqqaz iɣezran,
u tiṭṭ nnes tᵉttwařa marra min iɣřan.
11 Iḥewweq-dd i iɣezran ařami aman war qqimen tteffɣen-dd,
u min dayes inuffaren ittawyi t-i-dd ɣar tfawt.
12 Tiɣit maca, mani tᵉttwaf?
U mani teǧa tzeddiɣt n řefhamet?
13 Bnadem war issin řqimet nnes,
war tᵉttwif tiɣit di temmurt n yinni iddaren.
14 Aman yuǧɣen qqaren: ‘Dayneɣ war teǧi ca!’,
řebḥar iqqar: ‘Ɣari war da teǧi ca!’ ■
15 War izemmar ad immewc wureɣ iqquren deg wemcan nnes,
u ssum nnes war zemmaren ad t weznen s nnuqart. ■
16 War zemmaren ad weznen ssum nnes s wureɣ iɣřan zi Ufir,
s weẓru n biril iɣřan d ṣaffir aziza.
17 War zemmaren ad mmquddan řqimet nnes ak-d wureɣ niɣ kristal,
niɣ ad tt beddřen s ict n řqecɛet n wureɣ ittwaṣeffan.
18 War tteɛqiřen ɛad x tyaqutin d weẓru n ukristal,
maɣar twafit n tiɣit tuɛɛřa x twafit n řmarjan.
19 Řeɛqiq azeggwaɣ zi Kuc war dayes yarwis,
u war izemmar ad tᵉttwawzen tiɣit s wureɣ iṣfan iɣřan.
20 Manis dd-tusa xenni tiɣit,
u mani teǧa tzeddiɣt n řefhamet? ■
21 Aqa-tt tnuffar x tiṭṭawin n marra min iddaren,
tᵉttwařeḥḥef x ijḍaḍ n ujenna.
22 Ahellek d řmewt qqaren:
‘S imezzuɣen nneɣ nesřa xas řexbar!’ ■
23 AREBBI ifehhem abrid nnes,
Netta issen tazeddiɣt nnes,
24 maɣar ittwařa ɣares ař tineggura n temmurt,
iẓarr marra min iǧan sadu ijenwan.
25 Umi igga i uṣemmiḍ jjehd nnes,
umi iɛbar řeɛbar n waman, ■
26 umi igga i wenẓar qeṭṭu,
ijj n webrid i wassam n wajjajen,
27 xenni iẓra i-tt, issargeb i-tt,
uca issbedd i-tt deg wemcan nnes uca ibeqqec dayes,
28 uca inna i bnadem:
‘Xzar, tiggʷudi zi Sidi d tiɣit,
u abeɛɛed x min iǧan d aɛeffan d řefhamet.’ □ ■