Řḥarḍ n Ayub x iɛeffanen
27
1 Yarni Ayub di řhard n lmatal nnes, inna: 2 S tidett am iddar Arebbi nni i d ayi ikksen tasɣart inu,
Amzemmar x kuřci nni issarzagen řeɛmar inu,
3 min ɣa yekk nnefs ɛad dayi,
u arruḥ n Arebbi ɛad deg wenzaren inu,
4 war qqaren iyencicen inu řɣecc,
u iřes inu war iqqar ixarriqen!
5 D řefḍiḥet i necc mařa ggiɣ kenniw di tseyyarest n tidet.
Ař ɣa ssuffɣeɣ buḥbeř inu,
war ttejjiɣ ad xafi kksen asegged inu.
6 Ad ṭṭfeɣ di tsegda inu, war zzayes arexxuɣ ca.
Uř inu war d as yarexxu uřa x ijjen zeg wussan inu.
7 Mři dd-iban řeɛdu inu d aɛeffan,
wenni akidi ittmenɣan d mmis n řmuɛṣiyyet.
8 Maɣar man asitem n umnafeq,
xmi i ɣa tᵉttwaqḍeɛ tudart nnes,
xmi zzayes i ɣa iqřeɛ Arebbi řeɛmar nnes? ■
9 Ma ad iseř Arebbi i iɣuyyan nnes,
xmi xas dd ɣa iwḍa řḥeṣran? ■
10 Ma ad ifarḥ ɣar Umzemmar x kuřci?
Ma ad iřaɣa x Arebbi meřmi ma?
11 Necc ad awem ssřemdeɣ x ufus n Arebbi,
min iɛewweř Umzemmar x kuřci, war t ssnuffareɣ.
12 Xzar, kenniw marra idwem teẓrim t.
Mayemmi tarennyem tessuffuɣem min ixwan, teqqarem:
13 “Ta d tasɣart n bnadem aɛeffan ɣar SIDI,
tasɣart n ayt n bu-řexcunet nni i ɣa ṭṭfen zeg Umzemmar x kuřci: ■
14 Xmi i ɣa mmarenyen iḥenjiren nnes, i ssif umi urin.
Iɣedduten nnes war ttyawanen aɣrum, □ ■
15 wi zzayes i ɣa iqqimen ad ttwaneḍřen s ṭṭaɛun,
u tijjař nnes war ttrunt ca. ■
16 Waxxa ijarruw nnuqart anect n ucař,
u issewjad arruḍ anect n ucař,
17 iwa ad t issewjed, maca amsegged ad zzayes yarḍ,
u amezdag ad ibḍa nnuqart. ■
18 Ad ibna taddart nnes am tcinda,
amecnaw tanwalt i issbedda uɛessas i yixef nnes.
19 Ad dayes iṭṭes d bu-wagřa, maca war yarenni deg wagřa nnes.
Mařa yarzem tiṭṭawin nnes, war din ittɣimi ɛad walu. ■
20 Inexřiɛen ad t arenyen am iɣezran n waman,
taḥaryaḍt ad t i-dd teqḍeɛ s ǧiřet. ■
21 Aṣemmiḍ zi ccarq ad t iksi, iwa dinni ittraḥ,
ad t i-dd iqřeɛ zeg wemcan nnes.
22 Arebbi ad issiweḍ marra aya x uzeǧif nnes u war xas issɛizzi ca.
Ad yarweř deɣya zi tecti n ufus nnes.
23 Iwdan ad xas wwten deg ifassen nsen am zzayes sthezzan
uca ad xas dd-ṣeffaren zeg wemcan n tzeddiɣt nnes.”