1 Xas uca yarra-dd Ayub, inna:

2 Mammec teggid twecid afus i wenni war ɣar iǧi jjehd,

mammec tbedded ɣar uɣiř n wenni war ɣar teǧi tzemmar!

3 Zeɛma aqa tewcid awessi isebḥen i wenni war ɣar teǧi tiɣit,

mammec i tessargbed aṭṭas n twařawin mummu n tmesřact!

4 I umi tɛawded řexxu awařen nnek?

Man nnefs dd-iffɣen zzayek?

5 Řexyařat n imettan fessyen

sadu waman d imezdaɣ nsen.

6 D aɛaryan tezzeř zzates řaxart,

war din teǧi tqebbart i řaǧaɣ n uhellek. ^■  

7 Ibezzeɛ ajenna di ccamal tiwa řxawi n wudem n waman,

yuyeř tammurt ɣar walu. ^■  

8 Netta ittcedda aman deg iseynuten nnes,

waxxa amenni war ittareẓẓi aseynu swadday.

9 Issdurruy udem n řɛarc nnes,

ittbezzaɛ xas aseynu nnes. ^■  

10 Yarcem taquract x wudem n waman,

ɣares ař tma n tfawt ak-d taǧest. ^■  

11 Ipilaren n ujenna ttarjijin,

ttnexřaɛen zeg uweddeb nnes.

12 S jjehd nnes isshaj řebḥar,

u s řefhamet nnes iřbez Rahab. ^■  

13 S Arruḥ nnes ittissiq ujenna am wudem n tenni war ittřeḥḥifen,

afus nnes issnuqqeb afiɣar itteḥřuǧuḍen s tazřa. ^■  

14 Xzar, man aya waha ixef n ibriden nnes,

nesřa mɣir taḥessect n ca n wawařen zzayes.

Wi izemmaren xenni ad issen ajjaj n jjhed nnes?