SIDI issiweř ak-d Ayub
40
1 Yarni yarra-dd SIDI x Ayub, inna: 2 Ma ixs wenni ittemcarraɛen ak-d Umzemmar x kuřci ad t iwebbex ɛad?
Ejj wenni ixsen ad idɛa Arebbi, ad dd-yarr!
3 Xenni yarra-dd Ayub x SIDI, inna:
4 Xzar, necc drus, min zemmareɣ ad xak dd-arreɣ?
Necc ad ggeɣ afus inu x uqemmum inu. ■
5 Aqa ssiwřeɣ ict n twařa, maca war dd-ttarriɣ ɛad.
twařa wiss tnayen war d as arenniɣ!
Arebbi ikemmer awařen nnes i Ayub
6 Xas uca yarni yarra-dd SIDI x Ayub zi tḥaryaḍt, inna:
7 Byes xenni tijɛinnatin nnek am weryaz.
Necc xseɣ ad cek sseqsiɣ u cek arr-dd xafi!
8 Ma texsed s tidett ad tarẓed řḥukm inu?
Ma texsed ad ɣari dd-tarred řɛib, maḥend ad tbaned cek d amsegged? ■
9 Ma ɣarek aɣiř am Arebbi?
Ma tzemmared ad teddardḥed am wajjaj s tmijja nnek?
10 Qqen xenni ixef nnek s lɛaḍama d uɛuǧi,
arḍ s tissiqt d řɛezz.
11 Ejj aduqqez n ufugem nnek ad izeǧeɛ,
xzar ɣar kuř bu nnfaxet,
uca sehwa i-t!
12 Xzar mliḥ ɣar mkuř bu-nnfaxet uca sehwa i-t,
řbez iɛeffanen deg wemcan nsen.
13 Ffar i-ten marra am munen deg ucař,
belleɛ x iɣembab nsen deg wenḍeř.
14 Xenni uřa d Necc ad cek ssemɣareɣ,
minzi afus nnek afusi issenjem i cek.
15 Xzar maca Řweḥc, ‘Bhimut’,
wenni ggiɣ am mammec cek ggiɣ.
Ittett arrbiɛ am ufunas.
16 Xzar maca jjehd nnes di tejɛinnatin nnes,
řɛezz n iẓewran nnes n uɛeddis!
17 Mařa ixs, ad igg akennas nnes am tcejjart n tengelt,
iẓewran n tmeṣṣaḍin nnes meḥḍen mmuden.
18 Ixsan nnes tteggen am iqudas n nnḥas,
am barrat n wuzzař iḍaren d iɣaǧen nnes.
19 Netta d amezwaru n ibriden n Arebbi.
Wenni t yeggin, iwca as ssif nnes.
20 Iwa, idurar ttawyen as-dd arrbiɛ,
marra řewḥuc n yeyyar ttiraren dinni.
21 Ibbuzzeř sadu i tcejjura itteggen tiři,
deg udurri n uɣanim, di ssebxet.
22 Ad xas dduryent tcejjura i itticen tiři, kuř ict s tiři nnes,
tinemrač n tɣezratin ttennḍent as-dd.
23 Xzar, mařa ihaj yeɣzar, war ittarjiji,
ittɣima yarsa mařa řḥemřet n L'Urdun tudef as-dd ɣar uqemmum.
24 Ma izemmar bnadem ad t iṭṭef xenni zzat i tiṭṭawin nnes,
ad as issnuqqeb tinzart s tesɣunin?
25 Ma tzemmared ad tjebded ‘Liviyatan’ s tsennart n weymar,
niɣ ad tessehwid iřes nnes deg ufiřu n weymar?
26 Ma tzemmared ad as tegged txadent n uɣanim di tenzart nnes,
niɣ ad tessnuqqbed aɣesmir nnes s uɣanču?
27 Ma ad zzayek ittar aḥinni?
Ma ad issiweř akidek s wawařen imiziḍen?
28 Ma ad yegg akidek řɛahd?
Ma tzemmared ad t teksid d ismeɣ i řebda?
29 Ma tzemmared akides tᵉttirared am ak-d ijj n ujḍiḍ,
niɣ ad t teqqned i teḥramin nnek?
30 Ma zemmaren ineymaren ad dayes sebbeben?
Ma zemmaren ad t bḍan jar Ikenɛaniyyen?
31 Ma tzemmared ad tejjud tiřmect nnes s fřitcat,
niɣ s lansa n iseřman azeǧif nnes?
32 Sars xas maca afus nnek,
xemm ɣar umenɣi, war t tteggid ɛemmarṣ ɛad.