Tamwarrit n Ayub x Ṣufar: řefřeḥ n weryaz aɛeffan
21
1 Xenni yarra-dd Ayub, inna: 2 Sřem mliḥ i wawařen inu,
ḥima ad awem iřin i usfewwej.
3 Ksim ayi, xenni ad ssiwřeɣ,
u awarni řami ssiwřeɣ, xenni tzemmarem ad tɛeffarem.
4 Xafi necc, ma acetci inu x ijj n bnadem?
Niɣ mayemmi war d ayi dd-ikkar ad yiři buḥbeř inu břa ttasiɛ n řxaḍar?
5 Qeřbem-dd ɣari uca jɛarem,
sarsem afus x uqemmum.
6 Mařa xemmeɣ waha deg uya, ttnexřiɛeɣ,
u tmenneɛ tarjijit arrimet inu.
7 Mayemmi ttɣiman iɛeffanen ddaren,
mayemmi ddakkwařen iwessura, ttmarnin ɛad di jjehd nsen? ■
8 Tarwa nsen ttɣiman bedden zzat i uɣembub nsen, aqa aten ɣarsen,
u iḥenjiren iɣedduten nsen zzat i tiṭṭawin nsen. □
9 Tudrin nsen aqa atent di řehna nhřa anexřiɛ,
aɛmud n Arebbi war ten iccit.
10 Afunas nnes ittarra u war ixeṭṭi,
tayenduzt nnes tᵉttaru u ɛemmarṣ war tɣeṭṭeř aɛeddis.
11 Ttejjan imeẓyanen nsen gguren am ict n tḥimart,
iḥenjiren nsen ttejjan ten neggzen.
12 Nitni ssgeɛɛaden tmijja nsen ɣar ubendir d řgambri,
uca farrḥen ɣar tmijja n temja.
13 Ssɛeddun ussan nsen di zzhar,
maca hekkwan ɣar řaxart deg wermac n wabřiwen.
14 Qqaren i Arebbi: ‘Ḥeyyed xaneɣ,
maɣar war d aneɣ iɛjib ad nessen ibriden nnek. ■
15 Man wen iǧan d Amzemmar x kuřci maḥend neccin ad as nsexxar?
Man lfayda i ɣarneɣ mařa nziyyar xas s tẓaǧit nneɣ?’ ■
16 Xzar, zzhar nsen war iǧi deg ufus nsen.
Ccwar n iɛeffanen iggʷej xafi. ■
17 Mecḥař n twařawin txessi i iɛeffanen s tidett tfawt nsen,
uca iřeqqef i-ten uḍeyyeɛ,
mecḥař n twařawin ibeṭṭa Netta xasen řeḥřiq deg weɣḍab nnes, ■
18 ařami i ɣa dewřen am uřum zzat i uṣemmiḍ,
am iɣeǧ texḍef i-t tḥaryaḍt?
19 Ma teqqarem: ‘Arebbi ittxemmeř lɛiqab i řmuɛṣiyyet nnes i iḥenjiren nnes!’ ?
Ejj i-t ad as tt ixeǧeṣ ař ɣa yaca netta simant nnes!
20 Ejj tiṭṭawin nnes ad ẓarent ahellek nnes,
ejj i-t ad isu s yixef nnek zeg wesɛar n Umzemmar x kuřci.
21 Maɣar mammec i ɣa ifarḥ ɛad di aytbab n taddart nnes awarni i řmewt nnes,
mařa tᵉttwagg ɛad qedda n iyuren nnes? □
22 Ma zemmaren ad ssřemden tussna i Arebbi,
wenni iḥekkmen x yenni iǧan deg ujenna yuɛřan? ■
23 Aqa din ijjen immut di zzhar imun,
am iddar ɛad qaɛ nhřa amnus u di řhudnet.
24 am ɛemmaren řemdawed nnes s uɣi,
u ittwabezzeg waduf n yexsan nnes.
25 Wenneɣni immut s řeɛmar d amarzag,
war dd-yiwi řiqqi i walu n řxar.
26 Munen zzřen nitni deg ucař,
u ikeccawen dřin ten. ■
27 Xzar, ssneɣ ixarriṣen nwem,
uřa d timeɛmač nni zi d ayi tdeřmem,
28 xmi teqqarem: ‘Mani teǧa taddart n bu-ṣṣulṭa,
u mani teǧa tqiḍunt n tzeddiɣin n uɛeffan?’
29 Ma ɛemmarṣ war tesseqsim imsebriden?
Aqa iceyyaren nsen ittqarran war tzemmarem ad ten tenkarem:
30 maɣar aɛeffan ad ittwaḥḍa deg wass n arẓiyyet,
deg wass n uduqqez n ufugem ad ttwawyen nitni di řaman. ■
31 Man wen i t ɣa issecnen abrid nnes deg uɣembub nnes?
Mařa igga ca n tuɛeffna, wi t i ɣa ixeǧṣen?
32 Netta maca ad ittwaksi ɣar wenḍeř nnes d ameqqran,
u ɣar tewrirt n wenḍeř nnes ittɛess netta s yixef nnes.
33 Ttɛejiben as ibursa n teɣzurt,
u ḍeffaren t marra iwdan,
u inni d as ittizwaren, war ggur ad ttwaḥesben.
34 Mammec texsem ad ayi tɛezzam s wawařen ixwan?
Zi temwarrit nwem war ittɣimi walu mɣir řeɣḍar waha.