Řhard wiss třata n Ilifaz x ddenb d wedwař ɣar Arebbi
22
1 Xenni yarra-dd Ilifaz, wenni dd-yusin zi Tayman, inna: 2 Ma izemmar bnadem ad infeɛ Arebbi?
Wenni iggin s řeɛqeř ineffeɛ mɣir i yixef nnes.
3 Ma aqa-t d lfayda i Umzemmar x kuřci aqa cek tseggded,
niɣ d řefḍeř mařa cek teggured deg ibriden nnek s řeṣfayet?
4 Ma iwti i cek zi ssibbet n tiggʷudi nnek zzayes,
niɣ ad yadef akidek ɣar taddart n ccreɛ?
5 Ma war teǧi tuɛeffna nnek d tameqqrant,
u řmuɛṣiyyat nnek ma war ǧint nhřa asbeddi?
6 Maɣar tḥewwsed ddiyyet zeg aytmac baṭeř,
u tekksed i yenni s drus n werruḍ waha arruḍ nsen. ■
7 Wenni yuḥřen war d as tewcid ad isu,
wenni iǧuzen tqeḍɛed as aɣrum.
8 Maca mařa din aryaz s uɣiř ijhed, xenni tammurt aqa-tt i wanita,
uca ad dayes izdeɣ ca n weryaz n ccan.
9 Tijjař tsekked tent s ifassen xwan,
iɣaǧen n uyujiř ttwařebzen.
10 S uyenni nnḍent ac txecfin,
uca tewḍad-dd xak tiggʷudi.
11 Niɣ war tᵉttwiřid taǧest,
d řḥemřet n waman nni cek yedřin?
12 Ma war iǧi Arebbi yuɛřa deg ujenna?
Xzar itran nni iǧan sennej qaɛ, mammec ɛuǧen!
13 Maca teqqared: ‘Min issen Arebbi?
Ma izemmar ad iḥkem nican zeg useynu ibbumbsen?
14 Iseynuten d ařeḥḥef i Netta ařami war ittwiři,
u x řqubbet n ujenna iggur Netta.’
15 Ma texsed ad teḍfareḍ amesruq n wecḥař uya,
amesruq nni kkin yeryazen iccuren s řmuɛṣiyyet,
16 inni ittwakksen am war dd-yiwiḍ ɛad řmijař nsen,
umi tfeyyeḍ řḥemřet dsas nsen,
17 inni innan i Arebbi: ‘Aggʷej xaneɣ!’
Min izemmar Umzemmar x kuřci ad yegg ɛad i nitni? ■
18 Iwa, waxxa Netta iccur tudrin nsen s řxar!
Ccwar n iɛeffanen iggʷej xafi. ■
19 Ẓrin t imseggaden uca farḥen,
amezdag istehza zzaysen. ■
20 ‘Aɣrim nneɣ ittwakeḥḥeḍ,
u min zzaysen iqqimen tecca i-t tmessi.’
21 Qqen ɣares, ad ɣarek tiři řhudnet,
S uya ad ɣarek dd-yas min iṣebḥen.
22 Ksi xenni taɣuri zeg uqemmum nnes,
egg awařen nnes deg wuř nnek.
23 Mařa tdewřed-dd ɣar Umzemmar x kuřci, ad tᵉttwasbedded.
Siggʷej min war iseggden x tqiḍunin nnek. ■
24 Sars ureɣ iqquren deg ucař,
ureɣ zi Ufir jar iẓra n tɣezratin.
25 xenni Amzemmar x kuřci ad yiři d wureɣ iqquren nnek,
uřa d idurar nnek n nnuqart!
26 Maɣar xenni ad tfarḥeḍ zeg Umzemmar x kuřci,
u ɣar Arebbi ad tessgeɛɛded aɣembub nnek.
27 Ad as tᵉttared s tẓaǧit yuǧɣen
u Netta ad ac iseř u cek ad tkemmřed lwuɛud nnek.
28 Mařa tekksed awař, xenni ad ac dd-teffeɣ tmesřact,
u tafawt ad tareɣ deg ibriden nnek.
29 Mařa cek ssehwan nitni, ad tinid: ‘Sgeɛɛed azeǧif nnek!’,
Netta ad issenjem wenni isshekkwan tiṭṭawin nnes. ■
30 Netta ad issenjem wenni war iǧin břa řɛib,
minzi netta ad injem s tezdugi n ifassen nnek!