Řḥarḍ wiss tnayen n Ṣufar x řefřeḥ d řḥukm
20
1 Xenni yarra-dd Ṣufar, wenni dd-yusin zi Naɛma, inna: 2 Ixarriṣen inu ttɣiman dekkwařen-dd ɣari,
zi ssibbet n uqeǧeq i war ittbeddin di řbař inu.
3 Sřiɣ ijj n uwebbex i d ayi issbehdařen,
maca buḥbeř ad xafi dd-yarr s řefhamet inu.
4 Iwa tessned aya, aqa-t din zeg wecḥař uya,
zeg wami ittwassars bnadem x temmurt,
5 aqa asřiwřew n iɛeffanen ittekk drus waha,
řefraḥet n umnafeq mɣir ict n tzeḥziḥt. ■
6 Waxxa tᵉttgeɛɛad nnfaxet nnes ař ijenwan,
waxxa ittḥada azeǧif nnes ař iseynuten,
7 am isufɣan nnes ad qḍan i řebda.
Inni t iẓrin, ad inin: ‘Mani iǧa netta?’
8 Am ict n tirja ad iḍuw, war ittwifi ɛad,
ad ittwassetleɛ am tmeẓriwt n ǧiřet.
9 Tiṭṭ i t iẓrin war t tẓarr ɛawed,
u amcan nnes war t iẓarr ɛemmarṣ.
10 Iḥenjiren nnes ad ssjiwnen imezřaḍ,
ammu i dd ɣa yarren ifassen nsen agřa nnes.
11 Ixsan nnes iccuren s temẓi,
ggur ad zzřen akides deg ucař.
12 Mařa řɣar deg uqemmum nnes d amiẓid,
mařa issnuffar i-t sadu iřes nnes,
13 mařa iḥḍa i-t, war ixs ad xas iḥeyyeḍ,
maca imenneɛ i-t deg waneɣ nnes,
14 xenni ad tbeddeř macca nnes deg uɛeddis nnes,
di daxeř nnes ad tedweř d arrhaj n trefsiwin.
15 Iṣarḍ agřa, maca ad t-i-dd-iɛuqq ɛawed.
Ad t-i-dd-inḍar Arebbi ɣar barra zeg uɛeddis nnes.
16 Arrhaj n trefsiwin ad t iṭṭeḍ,
iřes n ufiɣar ad t ineɣ.
17 War iẓarr iɣezran,
tiɣezratin d taryawin ittazzřent s tamment d uɣi.
18 Ad dd-yarr řefḍeř n umarret nnes, war t isseɣřay,
war ineggez s řefraḥet zi ssibbet n wagřa i dd-ikseb,
19 maɣar ideǧ imezřaḍ, ijja i-ten břa twiza,
yucar taddart nni war issbedd,
20 maɣar war issin řhudnet di daxeř nnes,
s uya war inejjem s marra min di tuɣa immeẓri ammu.
21 War ittceṭṭi walu i umerɛiq nnes,
s uyenni war ittɣimi zzhar nnes ibedd.
22 Mařa ɣares ɛad afeyyeḍ imun, ad ittwaḥsar,
ad xas yiři ufus n kuř řmeskin.
23 Aya ad yiři ḥima ad iccur aɛeddis nnes i tyawant:
Aqa Netta ad xas issekk řḥaduq n weɣḍab nnes,
ad t yarr ad xas iwwet am wenẓar xmi i ɣa icuqq di arrimet nnes.
24 Waxxa ad yarweř zi řesnaḥ n wuzzař,
ad t issnuqqeb řqews n nnḥas.
25 Ijebbed ijjen zzayes fřitca, aqa teffeɣ-dd zi arrimet nnes,
řmacam yareqqen itteffeɣ-dd zeg iẓi nnes,
wah inexřiɛen ad xas kken.
26 Taǧest tekmeř tᵉttḥama ɣar txubay nnes,
timessi war tt issiɣ uřa d ijj, ad t tecc,
ad tarr meẓri ak-d yenni iceṭṭen di tqiḍunt nnes.
27 Ajenna ad iɛarra řmuɛṣiyyet nnes,
u tammurt ad xas tɣewweɣ.
28 Řɣiǧet n taddart nnes ad traḥ,
ad tazzeř deg wass n weɣḍab nnes.
29 Wa d min i dd-ikkaren i iɛeffanen zi AREBBI,
tasɣart i d as inna Arebbi.