Tamwarrit n Ayub x Bilad x usitem nnes di Arebbi
19
1 Yarra-dd Ayub, inna: 2 Mecḥař ɛad i ɣa tekkem tceḍnem řeɛmar inu,
ad ayi třebzem s wawařen?
3 Řexxu ɛad wiss ɛecra n twařawin ttekkwarem ayi,
war tᵉttseḍḥim umi d ayi dd-tɣeṭṭřem awař.
4 Mařa s tidett weddareɣ,
ggur ad iqqim uweddar inu i ixef inu.
5 Mařa s tidett texsem ad xafi tessgeɛɛdem ixef nwem s cciki,
u ad ayi tessqenɛem s řefḍiḥet inu, □
6 ssnem xenni, aqa Arebbi inneqřeb xafi,
uca inneḍ ayi-dd s tracca nnes.
7 Xzar, sɣuyyeɣ: ‘Řexcunet!’, maca war xafi dd-yarri uřa d ijj,
ttřaɣiɣ i twiza, maca řḥeqq war din iǧi.
8 Abrid inu iqqen i-t, ařami war zemmareɣ ad ɛduɣ,
taǧest issu tt x imesraq inu.
9 Řɛezz inu ikecceḍ i-t zzayi,
u ttaj i iǧan x uzeǧif inu ikkes i-t.
10 Netta yarẓa ayi zi marra iɣezdisen, ad ttwahellkeɣ!
Iqřeɛ araji inu am ict n tcejjart. □
11 Aɣḍab nnes yarɣa dayi,
uca Netta iḥesseb ayi am řɛedyan nnes. ■
12 Munent ffɣent-dd terbiḥin n řɛeskar nnes,
sswejdent-i-dd abrid nsent ɣari,
uca quwwarent i tqiḍunt inu.
13 Aytma issiggʷej i-ten xafi,
inni d ayi issnen dewřen d midden xafi. ■
14 Inni d ayi itteɛnan jjin ayi,
inni d ayi issnen ttun ayi.
15 Imsexxaren n taddart inu d tiyyawin inu
ḥessben ayi d řbarrani,
necc d aɣrib jar tiṭṭawin nsen.
16 Řaɣiɣ i umsexxar inu, maca war xafi dd-yarri,
tuɣa ittxeṣṣa ad t ḥeccmeɣ s uqemmum inu.
17 Řeɛwin n temwarrit n nnefs inu issɛiff tamɣart inu,
arṣuḍeɣ i aytma.
18 Ɛad iḥramen imeẓyanen sseḥqaren ayi.
Mařa kkareɣ beddeɣ, ttemɛarran xafi s wawařen nsen. ■
19 Marra immeddukkař inu iɛizzen carrhen ayi,
inni ttexseɣ, nnqeřben xafi. ■
20 Ɣar teřmect d weysum inu řessqen iɣsan inu.
Necc nejmeɣ ak-d tiřmect n teɣmas inu waha. ■
21 Ḥinnem xafi, ḥinnem xafi, a kenniw, imeddukkař inu!
Maɣar afus n Arebbi iřqef ayi.
22 Mayemmi i d ayi tḍaffarem amecnaw Arebbi,
u mayemmi war ttjiwinem aysum inu?
23 Mři uran awařen inu,
mři ttwazemmemen wawařen inu deg ijj n wedlis!
24 Mři ttwaneqcen s pluma n wuzzař u s řexfif,
di jjarf i řebda.
25 Necc ssneɣ: ‘Amefdi inu iddar,
u Netta ad dd-ikkar d Aneggar zeg ucař.’
26 U awarni řami i ɣa tᵉttwařbez teřmect inu ammu,
ad ẓareɣ Arebbi zi arrimet inu.
27 Ad t ẓareɣ zzati,
tiṭṭawin inu ad t ẓarent,
war iǧi midden.
Ɣares i ttmeẓrent tiẓẓař inu ɣar daxeř inu. □
28 Waxxa amenni kenniw ad tinim: ‘Mammec i nzemmar ad t neḍfar?’
maɣar aẓwar n tmesřact ittwaff dayi.
29 Ggʷedem zi ssif,
maɣar lɣaḍab ad dd-yas x ddnub n ssif,
maḥend ad tessnem aqa ad yiři řḥukm.