1 Xas uca yarra-dd Bildad, wenni dd-yusin zi Cuḥa, inna:

2 Ař meřmi ɛad tarezzum ad teggem tixecfin i wawařen n bnadem?

Mařa tfehmem, xenni awarni i uya ad nessiweř.

3 Mayemmi i d aneɣ ittwagg am řmař,

u nettwaḥṣar di buḥbeř di tiṭṭawin nwem?

4 Cek, a yaryaz wenni ittmezzqen ixef nnes deg uxeyyeq nnes!

Ma ad jjen temmurt di ssibbet nnek,

u ad ittwasmuṭṭi jjarf zeg wemcan nnes? ^□  ■  

5 Wah, tafawt n iɛeffanen ad texsi,

u aceɛɛař n tmessi nnes war ittegg tafawt ɛemmarṣ ɛad.

6 Tafawt di tqidunt nnes ad tebbarcen,

řefnar nnes tiwa nnes ad t ssxesyen.

7 Ttarjijen iṣuraf nnes ijehden,

ccwar n yixef nnes ad t iɣḍeř.

8 Maɣar s iḍaren nnes ad innaɣ deg uṣennaj,

ad yuyur x tracca, mmuden tt i tneymart.

9 Řfex ad t imneɛ zeg unirz,

tasɣunt n tjeyyaft tᵉṭṭef dayes. ^■  

10 Tennuffar tesɣunt n texceft nnes di temmurt,

taxceft nnes aqa-tt x webrid.

11 Ssiggʷeden t inexřiɛen zi marra iɣezdisen,

ḍeffaren t ɣar iḍaren nnes. ^■  

12 Izzuǧ dayes,

aḍeyyeɛ ittraja i-t ɣar uɣezdis nnes. ^■  

13 Arẓiyyet ad tecc marra iɣezdisen n arrimet nnes,

u iɣezdisen n arrimet nnes ad ten yecc ijj n řeḥřac ineqqen ař ṭṭarf.

14 Minxef tuɣa ittceř, ittwaqřeɛ-dd zi tqiḍunt nnes.

Tneddeh i-t arẓiyyet ɣar ujeǧid n inexřiɛen. ^■  

15 Iwdan nni war ǧin d yenni nnes, zeddɣen deg uqiḍun nnes,

řecbariyyet tᵉttwazuzzar x tzeddiɣt nnes.

16 Zi swadday ttaẓɣen iẓewran nnes,

zi sennej ttwaqessen řefruɛ nnes.

17 Řidaret nnes ad tᵉttwakkes zi temmurt,

war d as ittɣimi ɛad isem deg webriden. ^■  

18 Ad t ɛarnen zi tfawt ɣar taǧest,

ad sstewwjen zi ddunect. ^□  

19 War ɣares ittiři warraw niɣ jjadira di řgens nnes,

war ittɣimi uřa d ijj di tzeddiɣin nnes. ^■  

20 X wass nnes ad arjijen inni izeddɣen ɣar mani tɣeǧi tfuct,

inni izeddɣen ɣar manis i dd-tneqqar tfuct ad ten tᵉṭṭef tiggʷudi.

21 Wah, ammu i tᵉttemsar i tzeddiɣin n imeqjaḥen,

wa d amcan n yinni war issinen Arebbi.