1 Buḥbeř inu yarjef,

ussan inu ineggura xesyen,

mɣir imeḍřan d ayi iqqimen.

2 S tidett, inni istehzan aqa aten ɣari,

u tiṭṭ inu tessɛeddu ǧiřet jar ixarriṣen nsen imarzagen!

3 Egg ixef nnek d aḍman i necc din ɣarek.

Man wen xenni i ɣa iwten afus nnes deg ufus inu i man aya?

4 Maɣar Cek tekksed marra řefhamet x wuř nsen,

x uyenni Cek war ten tessɛuǧid ca.

5 Wi i ɣa iɣdaren imeddukkař nnes di ṭṭweɛ n tkeccaḍt,

tiṭṭawin n iḥenjiren nnes ad nɛedment.

6 Netta igga ayi d lmatal jar řegnus,

ařami dewřeɣ am ijjen ssusufen as x uɣembub. ^■  

7 S uya i teɛmec tiṭṭ inu zeg wecḍan,

marra iɣezdisen inu aqa aten am tiři.

8 Inni igguren nican ttnexřaɛen zi man aya,

u amezdag ittneqřab x umnafeq.

9 Amsegged imenneɛ deg webrid nnes,

wenni ɣar iǧa ifassen imezdagen, yarenni di jjhed.

10 S uya marra kenniw, dewřem-dd, asettiw-dd da,

maɣar war ufiɣ uřa d ijj n umiɣis jar awem. ^■  

11 Ɛdun wussan inu,

ttwaqeḍɛen inwayen inu,

marra meẓri n wuř inu. ^■  

12 Ǧiřet tteggen tt d ass,

qqaren: aqa tafawt tᵉttades-dd xmi dd ɣa tewḍa taǧest.

13 Mařa ssitmeɣ ɛad, ssitimeɣ aqa řaxart ad tiři d taddart inu,

ad bezzɛeɣ tassut inu di taǧest.

14 Ɣar wenḍeř řaɣiɣ: ‘Cek d baba!’,

ɣar ikecca: ‘Yemma!’ d: ‘Učma!’

15 Mani iǧa xenni řayas inu?

Řayas inu, man wen izemmaren ad t iẓar?

16 Ihwa ɣar ṭṭrufa n řaxart,

maɣar mařa nmum deg ucař, aqa din arraḥet. ^■