Ayub iřaɣa x Arebbi am dd-ittarra x Ilifaz
16
1 Xas uca yarra-dd Ayub, inna: 2 Manawya sřiɣ as aṭṭas,
kenniw marra idwem tessbeṭṭřem ayi afewwej. ■
3 Ma ad qḍan wawařen ixwan?
Niɣ min cek iɛarrnen ɛad ad dd-tarred awař?
4 Uřa d necc zemmareɣ ad ssiwřeɣ am kenniw,
mařa aqa kenniw deg wemcan inu.
Iři ad mudeɣ awařen xawem,
u ad xawem hezzeɣ azeǧif inu.
5 Ad kenniw ssmeḥḍeɣ s uqemmum inu,
u afewwej n iyencicen inu ad awem yawi řefsaset.
6 Mařa ssiwřeɣ war xafi ittejji řeḥřiq inu,
u mařa sseɣdeɣ, ma ad xafi iḥeyyed?
7 Řexxu maca issiḥeř ayi Netta.
Tessarjfed Cek marra tawacunt inu.
8 Cek tessdurryed ayi s teqcurt n teřmect, tenni d tacehhadt xafi,
uca ikkar xafi arrimet inu amusriw,
ittcetca zzayi deg uɣembub inu.
9 Aɣḍab nnes imezzeq uca iḍeffar ayi-dd.
Netta ittɣezza-dd ɣari tiɣmas.
Aɣrim inu issqeṭṭaɛ-dd ɣari tiṭṭawin. ■
10 Nitni ttcarragen aqemmum nsen xafi,
ccaten ayi s řḥegra ɣar uqabsi,
ttekkaren xafi ttmunen.
11 Isellem ayi Arebbi i yijj n mmis n řmuɛṣiyyet,
iɛarren ayi deg ufus n iɛeffanen.
12 Tuɣa ayi di řhudnet, maca Netta yarẓa ayi,
icebbar ayi deg ijiman, uca iřbez ayi.
Issbedd ayi d taḥjurt i Yixef nnes. ■
13 Imjebbaden nnes n řqews nḍen ayi-dd,
Netta issnuqqub ayi tiẓẓař břa ahaweř,
ittzeǧaɛ ɣar temmurt iẓi inu, □
14 yareẓẓa ayi treẓẓit awarni i treẓẓit nneɣni,
iɛref-dd xafi am bu-teɣruḍt.
15 Xeyyḍeɣ arruḍ n wecḍan i teřmect inu,
icc inu sswessxeɣ t s ucař. ■
16 Aɣembub inu izweɣ zeg imeṭṭawen,
tiři n řmewt aqa-tt x wabřiwen inu,
17 waxxa war yarsi lɛunf x ifassen inu,
u taẓaǧit inu teṣfa.
18 Uh tammurt, war ddař idammen inu,
war ttejji iɣuyyan inu ad afen amcan mani i ɣa arsan!
19 Xzar, uřa d řexxu, Acehhad inu deg ujenna,
Amcafeɛ inu x řegɛudi.
20 Imeddukkař inu sthezzan zzayi,
maca tᵉttru tiṭṭ inu ɣar Arebbi.
21 Ejj-i-t ad iwwet ddeɛwet x weryaz ɣar Arebbi,
am ijj n mmis n bnadem x umeddukkeř nnes. ■
22 Maɣar drus n iseggʷusa i-dd ɣa yasen ɛad,
qbeř i ɣa uyureɣ abrid war zzayes ttɛiqqibeɣ.