Řḥarḍ wiss tnayen n Ilifaz x uɛeffan
15
1 Xenni yarra-dd Ilifaz, wenni dd-yusin zi Tayman, inna: 2 Ma ittarra-dd ijj n umiɣis s tussna ixwan?
Ma ad iccur aɛeddis nnes s usemmiḍ i dd-ittasen zi manis dd-tneqqar tfuct?
3 Ma ittcarraɛ s řharḍ war ineffɛen,
s wawařen nni war ittakkwaḍen?
4 Cek maca, tarẓid tiggʷudi n Arebbi,
u tekksed taẓaǧit zzat i wudem n Arebbi.
5 Maɣar aqemmum nnek issargeb řmuɛṣiyyet nnek,
aqa itteɛjib ac řhard s tḥraymect s yiřes nnek.
6 Aqemmum nnek ad cek iḥkem, war iǧi necc,
iyencicen nnek ad xak cehden.
7 Ma cek d bnadem d amezwaru nni dd-ittwaxeřqen?
Niɣ tᵉttwarwed-dd qbeř tiwririn?
8 Ma tessḥessed i wegraw n imcawaren imtiqqan n Arebbi,
ma tjebbded tiɣit ɣarek? ■
9 Min tessned cek, neccin war t nessin?
Min tfehhmed cek inqes arneɣ?
10 Uřa jar aneɣ d amcaybu d uwessar,
nitni d imɣaren deg wussan x babac. ■
11 Ma asfewwej n Arebbi drus ɣarek,
niɣ ijj n wawař ssiwřen t akidek s terɣeɣ?
12 Mayemmi cek issetlaɛ wuř nnek,
mayemmi qeǧɛent tiṭṭawin nnek,
13 aqa cek tessneqřabed buḥbeř nnek x Arebbi,
ařami tessuffuɣed marra awařen nni zeg uqemmum nnek?
14 Min iɛna bnadem aqa netta ad yiři d amezdag,
u min iɛna wenni dd-ittwaxeřqen zi temɣart,
aqa netta ad yiři d amsegged? ■
15 Xzar, imqeddasen nnes war xasen ittciř,
uřa d ijenwan war ǧin ṣfan di tiṭṭawin nnes. ■
16 Ahtat ɛad ijj n nnɛi n bnadem d bu-ufessad,
wenni isessen min war iḥřin am waman!
17 Necc xseɣ ad ac t ssecneɣ, seř-dd ɣari,
xenni ad ɛawdeɣ min ẓriɣ,
18 min ɛawden imiɣisen,
uca war t ssnuffaren n ibabaten nsen.
19 I nitni waha umi temmewc temmurt,
uřa d ijj n řbarrani war xas iɛdu.
20 Marra ussan i iddar uɛeffan, imarret ixef nnes,
u ittwagg aymir i řqedd n iseggʷusa i ittwaxemmřen i bu-řexcunet.
21 Yudef-dd řḥess n iɣuyyan issnexřaɛen ɣar imezzuɣen nnes.
Ɛad di řweqt n řehna ad xas iwḍa umteḥḥay. ■
22 Netta war ittriji ad dd-iɛqeb zi taǧest,
maca aqa netta ittwagg i ssif.
23 Netta ittemhafa da d diha x weɣrum. ‘A, mani i yeǧa?’
Netta issen aqa ittraja i-t wass d abarcan deɣya. ■
24 Ḍḍiqet d řeḥṣaret ssaggʷadent netta,
arnin nitni am ijj n ujeǧid iwjed i umenɣi.
25 Maɣar ɣar Arebbi isswiẓẓaḍ netta afus nnes,
u ak-d Umzemmar x kuřci imenneɛ taɣennant tameqqrant.
26 S yiri imeḥḍen ittazzeř ɣares,
s ibuṭunen igdaren x tseddart nnes n uɛeskari.
27 Maɣar iřeḥḥef i uɣembub nnes s tadunt,
igga tadunt i tejɛinna nnes.
28 Izeddeɣ di tneddam ittwahedmen,
u di tudrin war daysent izeddeɣ ɛad uřa d ijjen,
tinni yuran maḥend ad dewřent d řxirbat.
29 Netta war iddikkwiř d bu-wagřa u agřa nnes war ittɣimi,
mařa min dd-ikseb war yarenni x temmurt.
30 Netta war inejjem i taǧest,
aceɛɛař n tmessi ad yecc řefruɛ nnes,
ad ifna s řeɛwin n uqemmum nnes.
31 Ejj i-t war ittciři x min ibeḍřen,
maɣar xenni uřa d řmunet nnes ad tebḍeř.
32 Mintřa war dd-yusi ɛad wass nnes, ad ittwakemmeř,
maɣar taseṭṭa n tini nnes war tzeyziw. ■
33 Ad isseɣḍeř aḍiř war issnedyen nnes am tzayart,
ad immenḍar nnuwar nnes am tzitunt. □
34 Maɣar abarru n imnafqen aqa-t břa řɣiǧet,
u timessi tᵉttett iqiḍan i iccuren s řɣecc. □
35 Aqa aten s ddeyset zi tamara, tturwen řɣecc,
u řexdeɛ aqa-t deg uɛeddis nsen. ■