Ayub issiweř ak-d Ṣufar x řmewt
14
1 Bnadem i dd-ittwaxeřqen zi temɣart, aqa ussan n tudart nnes udrusen, u netta iccur s řeḥweř. ■
2 Netta iɣemmi am tnewwact, xenni ittwaqḍeɛ.
Ittrakkwař am tiři, war ittɣimi. ■
3 Waxxa amenni tarezmed tiwa nnes tiṭṭawin nnek,
uca tᵉttawyed ayi-dd di ddeɛwet akidek. ■
4 Man wen izemmaren ad issuffeɣ ijj n umezdag zeg umexmuj?
Uřa d ijj! ■
5 Mara ussan nnes urin,
řqedd n iyuren nnes aqa ittwassen ɣarek,
uca teggid as řeḥdud nnes nni war d as iɛeddeř ad ten iɛdu, ■
6 neqřeb xenni xas maḥend ad yareyyeḥ,
xenni izemmar ad yarr meẓri am ijj n ucewwař deg wass nnes. ■
7 Maɣar i tcejjart aqa din ɛad asitem!
Mařa tᵉttwaqess, ad tessuffeɣ ɛawed řefruɛ,
u řefruɛ nnes war ttbeddin zeg uɣemmi.
8 Waxxa iwsar weẓwar nnes di temmurt,
immut jjdeɛ nnes deg ucař,
9 ad teɣmi tcejjart ɛawed xmi i ɣa taca ak-d waman,
ad tessuffeɣ ɛawed řefruɛ amecnaw ict n tcejjart ẓẓun tt beḥřa.
10 Maca mařa immut ijj n weryaz ijhed, ifenna,
mařa iffeɣ as buḥbeř i bnadem, mani iǧa xenni?
11 Aman tteffɣen-dd zi řebḥar,
u iɣzar ittaẓeɣ u ixekkwa.
12 Izzeř bnadem din, war ittekkar ɛad.
Ař war ttiřin ɛad ijenwan, war d ttfiqin,
war ttwasekkaren zeg iḍes nsen.
13 Ax, mři d ayi ɣa tarred ɣar řaxart,
ad ayi tessnuffared ař ɣa iḥeyyed weɣḍab nnek,
mři d ayi turid ijj n řmijař imten uca xenni idar ayi!
14 Mařa ijj n weryaz immut, ma ad dd-idweř ɣar tudart?
Xenni ad qqimeɣ ttrajiɣ marra ussan n umenɣi inu,
ɣares ařami dd-yusa ufekki inu.
15 Mařa xenni Cek třaɣid, necc ad Cek dd-arreɣ,
uca Cek ad temmeẓřed ɣar řxedmet n ifassen nnek.
16 Maca řexxu tḥessbed iṣuraf inu,
war tmennɛed lɣaḍab nnek x ddnub inu. ■
17 Axeṭṭu inu ittwacemmeɛ di tcemmust,
u ɣar řmuɛṣiyyet inu tarnid dayes ktar.
18 Wah, adrar iweṭṭan, ifessi,
uca iḥruǧed jjarf zeg wemcan nnes,
19 aman tteddzen iẓra,
iɣezran nnes ttekksen acař n temmurt,
ammu i tareddǧed asitem n bnadem.
20 Cek tarennid dayes i řebda, xenni yuyur.
Tᵉttbeddařed udem nnes uca tessekked t.
21 Mařa iḥenjiren nnes ṭṭfen ccan, netta war t issin,
mařa ten deǧen, war kidsen ittici.
22 Maca arrimet nnes tᵉttnezbar di ṭṭweɛ n yixef nnes waha,
u řeɛmar nnes ittecḍin di ṭṭweɛ nnes.