Ayub yarenni deg wawař nnes i Ṣufar
13
1 Xzar, qaɛ man aya teẓra i-t tiṭṭ inu, isřa i-t umezzuɣ inu, ifhem as mliḥ.
2 Min tessnem kenniw, ssneɣ t uřa d necc,
war weṭṭiɣ ca deg usemquddi akidwem.
3 Maca necc xseɣ ad ssiwřeɣ ɣar Umzemmar x kuřci,
meẓreɣ ad wteɣ tamesřact inu zzat i Arebbi.
4 Maca kenniw tessuffuɣem ixarriqen,
marra kenniw d iḍbiben ixwan. ■
5 Ax, mři tesseɣdem kenniw marra!
Aya ad tiři d tiɣit i kenniw. ■
6 Sřem xenni mammec i ɣa wteɣ x yixef inu,
ḥekkarem x umcarraɛ n iyencicen inu!
7 Ma texsem ad tinim řɣecc i řefḍeř n Arebbi,
ma texsem ad tessiwřem ixarriqen di tizi nnes? ■
8 Ma tzemmarem ad tewtem tamesřact di ṭṭweɛ nnes?
Ma texsem ad tcarrɛem i Arebbi?
9 Ma mliḥ i kenniw mařa Netta ad kenniw iqeǧeb?
Ma texsem ad zzayes testehzam
am mammec stehezzan iwdan zeg ijj n bnadem?
10 Netta ad kenniw iwebbex,
mařa kenniw tᵉtteggem s wudmawen di tnuffra.
11 Ma war kenniw issnexřiɛ uɛuǧi nnes,
ma war dd xawem tweṭṭi tiggʷudi zzayes?
12 Awařen nwem i řidaret aqa aten d řemtuř zi tɛejjact,
řegɛudi nwem d řegɛudi n ubeǧaɛ.
13 Seɣdem zzati, maḥend necc ad ssiwřeɣ,
ejj ad xafi dd-yas min ma dd i ɣa yas.
14 Mayemmi i ɣa ṭṭfeɣ aysum n arrimet inu jar teɣmas inu,
mayemmi i ɣa ṭṭfeɣ tudart inu deg ufus inu?
15 Xzar, Netta ixs ad ayi ineɣ, necc ad t rajiɣ,
maca ad wteɣ x ibriden inu zzates. ■
16 D wa i d ayi ɣa idewřen d asenjem,
maca amnafeq war dd-ittis zzat i uɣembub nnes. □
17 Sřem mliḥ ɣar řhard inu,
u s imezzuɣen yarezmen ɣar ucarreḥ inu.
18 Xzar, necc iwyeɣ ddeɛwet s usettef,
ssneɣ ad ttwaseggdeɣ.
19 Man wen izemmaren ad kidi imcarrɛen?
Xenni ad seɣdeɣ deɣya, ad ssuffɣeɣ buḥbeř.
20 Mɣir war d ayi ttegg tnayen n řeḥwayej,
xenni war zzayek ttnuffariɣ: ■
21 Afus nnek siggʷej i-t xafi,
war d ayi ttessnexřiɛ s uhuddi nnek!
22 Řaɣa Cek, u necc ad xak dd-arreɣ,
niɣ necc ad ssiwřeɣ u Cek ad xafi dd-tarred!
23 Mecḥař xafi n řmuɛṣiyyet d ddenb?
Scen ayi axeṭṭu inu d ddenb inu.
24 Mayemmi tessnuffared aɣembub nnek,
uca tḥessbed ayi d řeɛdu nnek? ■
25 Ma texsed ad tessenxeřɛed ict n tfarct i iɛarren uṣemmiḍ ssa ɣar da,
ma texsed ad teḍfared iɣeǧ yuẓɣen?
26 Maɣar tᵉttarid xafi timesřayin timarzagin,
u tbeṭṭid ayi ddnub n temẓi inu. ■
27 Tessrusid iḍaren inu deg ukeccuḍ,
uca tḥeṭṭid marra imesraq inu.
Tḥeṭṭid tiřeqqa n iḍaren inu, ■
28 n wenni iggin am ukeccuḍ, ccin t ikeccawen, xenni yarecca,
am warruḍ icca i-t tcinda.