1 Deg wass wiss třata, imsar, aqa Istir tyarḍ arruḍ igellden uca truḥ tekkar deg wazzay n daxeř n taddart n ujeǧid, nican qibař i ujemmaḍ n taddart n ujeǧid. Tuɣa ajeǧid iqqim x řɛarc nnes di taddart igellden arendad n tewwart n taddart. 2 Umi iẓra ujeǧid tajeǧidt Istir tbedd deg wazzay, imsar, aqa tufa arḍa di tiṭṭawin nnes, ařami isseřqa ujeǧid taɣɣarct nnes n wureɣ i tuɣa ɣares deg ufus nnes i Istir uca tqarreb-dd Istir, tḥada tixeft n teɣɣarct. 3 Xenni inna as ujeǧid: “Min cem yuɣin, a tajeǧidt Istir, niɣ min teɛna tutra nnem? Ad am temmewc waxxa teǧa d azyen n tgeldit!” 4 Tenna Istir: “Mařa tusa as-dd i ujeǧid s řxaḍar, aqa netta ad dd-yas ass-a ak-d Haman ɣar zzardet i d as sswejdeɣ.”

5 Xenni inna ujeǧid: “Arrem Haman ad iqeǧeq ad igg am mammec tenna Istir.” Řami dd-yusa ujeǧid ak-d Haman ɣar zzardet nni i tessewjed Istir, 6 inna ujeǧid i Istir umi swin binu: “Min dayem iǧan d meẓri? Ad am immewc. Min iǧan d tutra nnem? Ad ɣarem tiři waxxa d azyen n tgeldit.” 7 Xenni tarra-dd xas Istir, tenna: “Meẓri inu d tutra inu, 8 mařa xenni necc ufiɣ arḍa di tiṭṭawin n ujeǧid u mařa tusa as-dd i ujeǧid s řxaḍar ḥima ad issiweḍ meẓri inu d tutra inu, aqa ad dd-yas ujeǧid ak-d Haman ɣar zzardet inu nni d as i ɣa sswejdeɣ, xenni tiwecca ad ggeɣ ɛlaḥsab awař n ujeǧid.”

9 Iffeɣ Haman deg wass nni, ifarḥ u tuɣa-t ɣar řxadar nnes aṭṭas, maca umi iẓra Haman Murdaxay iqqim di tewwart n ujeǧid, war ikkar, war ɣares inhezz, xenni isɛar Haman s waṭṭas.

10 Maca Haman itebbet simant nnes u umi yiweḍ ɣar taddart, ijja ad dd-asen imeddukkař nnes d Zarac, tamɣart nnes.

11 Issiweř Haman akidsen x uɛuǧi n wagřa nnes u x iḥramen nnes i ɣares iǧan s waṭṭas u x marra min zi i d as icenneɛ ujeǧid u d mammec i-t issgeɛɛed sennej i řḥukkam d imsexxaren n ujeǧid.

12 Ɛawed inna Haman: “Uřa d tajeǧidt Istir war tejji ḥed ad dd-yas ak-d ujeǧid ɣar zzardet i tessewjed, mɣir necc, uca aḥeqqa uřa d tiwecca ttwaɛarḍeɣ ak-d ujeǧid.

13 Maca man aya marra war d ayi icqi min ɣa kkeɣ ttwařiɣ Murdaxay, Uday, iqqim di tewwart n ujeǧid.”

14 Xenni tenna Zarac, tamɣart nnes, jmiɛ ak-d imeddukkař nnes: “Ejj ad ssbedden ict n tḥenact mani t ɣa ayřen, ad yiři řuɛřa nnes xemsin n iɣiřen uca ɣar ṣṣbeḥ ad tinid i ujeǧid, ḥima ad ɣares ayřen Murdaxay u xenni ad tuyured s řefraḥet ɣar zzardet ak-d ujeǧid.” Ittɣiř as i Haman aqa man aya d ijj n ccwar icna uca ssbedden taḥnact n wayař.