1 Umi yargeb Murdaxay x marra min ittwaggen, icarreg tcamir nnes, yarḍ ict n txancet issuyes iɣɣeḍ x uzeǧif nnes uca iẓwa di řwest n tendint uca tuɣa issɣuyyu ict n tɣuyyit tejhed tarzeg. 2 Yiweḍ-dd ař tawwart n ujeǧid, minzi war izemmar ḥed ad yadef ɣar tewwart n ujeǧid am yarḍ txancet n wecḍan. 3 Di kuř lɛamala d kuř tandint mani yiweḍ řumur n ujeǧid, iřqef Udayen ijj n wecḍan d ameqqran d uẓummi d imeṭṭawen d iɣuyyan, uca qqimen aṭṭas zzaysen ẓẓřen di txancet d iɣɣeḍ.

4 Timesexxarin tibřiɣin n Istir d imsexxaren nnes icenɛen usin-dd maḥend ad tt xebbaren s uya uca teḥzen tjeǧidt aṭṭas. Tessekk tcamirat i Murdaxay maḥend ad tent yarḍ, ad ikkes taxancet nnes, maca netta war tent iqbiř. 5 Xenni třaɣa Istir i Hatax, ijj zeg imsexxaren icenɛen n ujeǧid, wenni tuɣa i d as igga ujeǧid d amsexxar, uca tumur i-t x Murdaxay maḥend ad ixzar min t yuɣin d mayemmi igga ammu. 6 Iffeɣ Hattax ɣar Murdaxay, ɣar wazzay i iǧan zzat i tewwart n ujeǧid 7 uca Murdaxay iɛawed as marra min d as imsaren d cḥař n nnuqart i iwaɛed Haman ad t iwzen i ixxamen n txubay n ujeǧid, i Wudayen, maḥend ad ten yareddeǧ. 8 Netta iwca as ict n tiřemt n tira n uzerf i ittwassuffɣen di Cucan maḥend ad ten areddǧen ḥima ad tt isscen i Istir u ad as yini u ad as yumur maḥend ad traḥ ɣar ujeǧid ad as tzawg u maḥend ad as tᵉttar zzat i wudem nnes di ṭṭweɛ n řgens nnes. 9 Yudef Hatax uca iɛawed awařen n Murdaxay i Istir.

10 Tessiweř Istir i Hatax uca tumur i-t ad yini i Murdaxay:

11 “Marra imsexxaren n ujeǧid d marra řgens di lɛamalat n ujeǧid ssnen mliḥ belli marra wi i ɣa yadfen ɣar ujeǧid deg wazzay n zzat, am war dd-ittwařaɣa, d aryaz niɣ d tamɣart i iǧa, aqa din xas ijj n řeḥkam waha, d řmewt, mɣir mařa ajeǧid isswiẓẓeḍ as taɣɣarect nnes n wureɣ, ḥima ad iqqim iddar. Třatin n wussan-a i iɛdun war xafi dd-iřaɣa ḥed maḥend ad dd-aseɣ ɣar ujeǧid.”

12 Ɛawden nitni awařen n Istir i Murdaxay.

13 Xenni inna Murdaxay, ad inin i Istir ɛawed: “War txemmam, aqa cem tzemmared ad tarewřed di taddart n ujeǧid ktar x marra Wudayen nneɣni.

14 Minzi mařa cem tesseɣded s tidett di řweqt-a, ad din tiři řefsaset d usellek i Wudayen zeg webrid nneɣni, maca cem d taddart n babam ad areddǧen. Wi issnen ma teksid aweqqar igellden ɣar ict n řweqt am tanita?” ^□  

15 Xenni inna Istir, ittxeṣṣa ad dd-arren x Murdaxay:

16 “Uyur, smun marra Udayen i izeddɣen di Cucan uca ẓummem ayi i necc, war tᵉttem, war tsessem třata n wussan, ǧiřet d wass. Uřa d necc d temsexxarin tibřiɣin inu ad ẓumment ammu, uca xenni ad adfeɣ ɣar ujeǧid min war icuwwar ɛlaḥsab azerf. Mařa fniɣ, xenni fniɣ!”

17 Xenni iffeɣ Murdaxay uca igga am mammec marra min x i d as tumur Istir.