1 Awarni i temsarin-a d wescan-a n řaman, yusa-dd Sanḥarib, ajeǧid n Accur. Netta yudef ɣar Yahuda uca inneḍ i tneddam ifaryen, ittɣiř as ad tent iṭṭef i yixef nnes. 2 Iẓra Ḥizqiya, aqa Sanḥarib yusa-dd uca inwa ad imneɣ x Urcalim. 3 Netta imcawar ak-d řḥukkam d ayt n bu-teɣruḍt nnes maḥend ad netyen tařawin n waman barra i tendint u nitni wcin as afus. 4 Iwyen-dd aṭṭas zi řgens uca netyen marra tařawin uřa d teɣzart i d ittazzřen di řwest n temmurt, nnan: “Mayemmi i dd ɣa yasen ijeǧiden n Accur uca ad afen aṭṭas n waman?” 5 Netta issejhed tandint uca iɛdeř marra řḥiḍ i tuɣa ittwarẓen d iwetwiten uca yarra i-t ad igeɛɛed ɣares ař ṣṣumɛat u ɣar barra iɛdeř ɛad ijj n řḥiḍ nneɣni. Netta issejhed lqelɛa di tendint n Dawud uca igga aṭṭas n lansat d tseddariyin n uɛeskari. 6 Netta igga ikumandaren n řɛeskar x řgens uca issmun i-ten ɣares deg wazzay n tewwart n tendint uca issiweř ařami daysen igga uř, inna: 7 “Iřim d iryazen u iřim tmeḥḍem, war ttnexřiɛem zzat i wudem n ujeǧid n Accur uřa zzat i wudem n marra řɣaci nni ɣares iǧan, maɣar wenni ɣarneɣ aqa-t deg waṭṭas x wenni ɣares. 8 Ɣares ijj n uɣiř n weysum n bnadem, maca ɣarneɣ SIDI, AREBBI nneɣ, ḥima ad aneɣ iwc afus u ḥima ad imneɣ amenɣi nneɣ.” Uca řgens ittecceř x wawařen n Ḥizqiya, ajeǧid n Yahuda. ^■  

9 Awarni i man aya, am tuɣa netta simant nnes zzat i Laxic d marra řḥukkam nnes akides, issekk Sanḥarib, ajeǧid n Accur, imsexxaren nnes ɣar Urcalim ɣar Ḥizqiya, ajeǧid n Yahuda, u ɣar marra řgens n Yahuda nni iǧan di Urcalim, inna:

10 “Ammu i inna Sanḥarib, ajeǧid n Accur: ‘Min xef tᵉttecřem kenniw, zeɛma kenniw tzemmarem ad teqqimem di Urcalim am tᵉttwaḥṣarem?

11 Ma war yarezzu Ḥizqiya ad kenniw iɣwa, ḥima ad kenniw isellem i řmewt zi řaẓ d ufadi xmi iqqar: SIDI, AREBBI nneɣ, ad aneɣ issenjem zeg ufus n ujeǧid n Accur!?

12 Ma war ikkis Ḥizqiya nni uřa d řegɛudi nnes d iɛalṭaren nnes u ma war issiweř netta ak-d Yahuda d Urcalim, inna: Mɣir i yijj n uɛalṭar ad taḍarem u ad xas tawyem řebxur!?

13 Ma war tessinem kenniw min ggiɣ necc d ibabaten inu s marra řegnus n temmura? Ma ssnejmen irebbiten n řegnus n temmura nni tammurt nsen zeg ufus inu?

14 Man wen zi jar marra irebbiten n řegnus nni x qḍan ibabaten inu, tuɣa izemmar ad issenjem řgens nnes zeg ufus inu, ařami AREBBI nwem izemmar ad kenniw issenjem zeg ufus inu?

15 Xenni řexxu, war ttejjim Ḥizqiya ad kenniw icmet u war t ttejim ad kenniw issɣekkwi ammu. War tᵉttiqqam ca, maɣar uřa d ijj n arebbi zi man ma řgens niɣ tageldit tuɣa izemmar ad issenjem řgens nnes zeg ufus inu niɣ zeg ufus n ibabaten inu. Mecḥař qell ɛad AREBBI nwem ad kenniw issenjem zeg ufus inu!’?” ^□  

16 Uca imsexxaren nnes ssiwřen ɛad ktar ḍidd i SIDI AREBBI u ḍidd i umsexxar nnes Ḥizqiya.

17 Netta yura ɛawed tibratin ḥima ad isseɛqar SIDI, AREBBI n Israil, u ḥima ad xas issiweř daysent, uca inna: “Am mammec irebbiten n řegnus n temmura, inni war izemmaren ad ssnejmen řgens nsen zeg ufus inu, ammu war izemmar AREBBI n Ḥizqiya ad issenjem řgens nnes zeg ufus inu!”

18 Nitni sɣuyyen s jjehd s yiřes n Tyahudect ɣar řgens n Urcalim nni ibedden x řḥiḍ ḥima ad ten ssiggʷiden u ad ten ssxarewḍen, maḥend zemmaren ad ṭṭfen tandint.

19 Nitni ssiwřen x AREBBI n Urcalim amecnaw x irebbiten n řegnus n marra tammurt, inni iǧan mɣir řxedmet n iwdan waha.

20 Ajeǧid Ḥizqiya d unabi Icaɛya, mmis n Amuṣ, ẓẓuǧen x man aya, řaɣan ɣar ujenna. 21 Uca issekk-dd SIDI Lmalak, wenni iqḍan x marra ayt n bu-teɣruḍt imeḥḍen d řḥukkam d imeqqranen n řɛeskar n ujeǧid n Accur. Xenni idweř-dd netta ɣar temmurt nnes s řeḥya x uɣembub u umi dd-yusa ɣar taddart n arebbi nnes, aqa inni dd-iffɣen zi arrimet nnes, nɣin t s ssif. 22 Ammu i issenjem SIDI Ḥizqiya d imezdaɣ n Urcalim zeg ufus n Sanḥarib, ajeǧid n Accur, u zeg ufus n marra. Netta tuɣa issar i-ten. 23 Aṭṭas i dd yiwyen tiwhibin ɣar SIDI di Urcalim, uřa d řeqcuɛ iɣřan ɣar Ḥizqiya, ajeǧid n Yahuda. Ssenni tuɣa ɣares řewqar d ameqqran di tiṭṭawin n marra řegnus.

24 Deg wussan nni idweř Ḥizqiya ihřec s ijj n řeḥřac ineqqen ařami tuɣa iggur ad immet. Iẓẓuǧ ɣar SIDI u wanita issiweř-dd ɣares uca iwca as-dd ict n řeɛřamet. 25 Maca Ḥizqiya war iggi ɛlaḥsab tcuni i d as-dd ittwasecnen, maɣar uř nnes idweř dayes nnfaxet. X uya yusa-dd xas uduqqez d ameqqran n weɣḍab, d x Yahuda d Urcalim. 26 Ḥizqiya maca isswaḍeɛ ixef nnes di ssibbet n nnfaxet n wuř nnes, am netta am imezdaɣ n Urcalim, ařami aduqqez d ameqqran n weɣḍab n SIDI war xasen dd-yusi deg wussan n Ḥizqiya. 27 I Ḥizqiya immewc as wagřa d ccan s waṭṭas. Netta igga i ixef nnes ixxamen n txubay i nnuqart, i wureɣ, i yeẓra iɣřan, i řeɛṭur, i tseddariyin n uɛeskari u i marra min iǧan d řeqcuɛ iɣřan. 28 Igga uřa d tixubay i řɣiǧet n imendi, i binu n jdid d zzect, uřa d řkurit i marra řmař d řeɛraṣi ifaryen i tḥimriwin. 29 Netta igga tineddam i yixef nnes s yijj n wagřa d ameqqran n wuǧi d ifunasen d tfunasin, maɣar SIDI tuɣa iwca as ijj n wagřa imɣar aṭṭas. 30 Ḥizqiya wanita tuɣa ɛawed ibelleɛ uffuɣ n waman n teɣzart n Jiḥun i iǧan sennej qaɛ, u yarra aman nican ɣar wadday ɣar řɣarb n tendint n Dawud, maɣar Ḥizqiya tuɣa ifřeḥ di marra min igga. 31 Maca zi ssibbet n imsekkan n řḥukkam n Babil inni ɣares dd-ittwassekken ḥima ad sseqsan x řeɛřamet imɣaren tenni tuɣa di temmurt, aqa ijja i-t AREBBI ḥima ad t iqeǧeb, ḥima ad issen marra min iǧan deg wuř nnes. ^□  

32 Imezruyen iqqimen n Ḥizqiya d tmexsiwt nnes icewwaren, xzar, aqa man aya marra ittwazemmem di tmeẓriwt n unabi Icaɛya, mmis n Amuṣ, u deg wedlis n ijeǧiden n Yahuda d Israil. ^□   33 Ḥizqiya ittwassars deg wenḍeř jar řejdud nnes. Neḍřen t deg wenḍeř yuɛřan qaɛ n imeḍřan n iḥenjiren n Dawud. Marra Yahuda d imezdaɣ n Urcalim ssecnen as řewqar ɣar řmewt nnes. Mmis Manassa idweř d ajeǧid deg wemcan nnes.