1 Awarni řami kemmřen s man aya marra, ffɣen-dd marra ayt n Israil nni tuɣa din iǧan ɣar tneddam n Yahuda u arẓin imayḍuten iqeddsen uca hedmen tirebbin n cwarti uca kksen řegɛudi d iɛalṭaren zi marra Yahuda d Binyamin, u ammu i ggin di Ifrayim d Manassa ařami tt kemmřen. Awarni i uya ɛeqben marra ayt n Israil, kuř ijj ɣar wagřa nnes, marra nitni ɣar tneddam nsen.

2 Ḥizqiya issbedd tarbiɛin n ikehhanen d Ilawiyyen, ɛlaḥṣab tirbiɛin nsen, kuř ijj ɛlaḥsab tasexxart nnes, ikehhanen d Ilawiyyen i tɣarṣt n wecmaḍ u i tɣarṣa n uqadi, ḥima ad sexxaren u ad qadan u ad ssɛuǧan di tewwura n řemrageḥ n řɛeskar n SIDI.

3 Netta iwca uřa d tasɣart n ujeǧid zeg wagřa nnes i tɣarṣa n wecmaḍ, i tɣarṣa n wecmaḍ ɣar tuffut u ɣar tmeddit, uřa d tiɣarṣa n wecmaḍ i wussan n ssebt u i uyuren imaynuten u i řeɛyudat ittwaggen, am mammec ittwari di Ccariɛa n SIDI. 4 Netta inna i řgens, i imezdaɣ n Urcalim, ad wehhben tasɣart n ikehhanen d Ilawiyyen, ḥima ina zemmaren ad iřin jehden di tɣuri n Ccariɛa n SIDI. 5 Umi dd-iffeɣ wawař nni, iwyen-dd ayt n Israil s ufeyyeḍ zeg usuffeɣ amezwaru n imendi, n binu n jdid d zzect d tamment u zi marra řɣiǧet n yeyyar. Iwyen uřa d řeɛcur zi marra s ufeyyeḍ. 6 Tarwa n Israil d Yahuda, inni izedɣen di tneddam n Yahuda, iwyen uřa d řeɛcur zeg ifunasen u zeg wuǧi uřa d řeɛcur n tewhibin iqeddsen nni tuɣa ssqeddsen i SIDI, AREBBI nsen, uca ggin ten d issbedd i-ten s usettef. 7 Deg uyur wiss třata bdan nitni ad ssarsen isbedditen zi tisi s usettef u deg uyur wiss sebɛa kemmřen tt. 8 Umi Ḥizqiya d řḥukkam usin-dd u ẓrin isbedditen nni, barken SIDI d řgens nnes Israil. 9 Isseqsa Ḥizqiya ikehhanen d Ilawiyyen x isbedditen nni.

10 Ɛazarya, akehhan ameqqran zi taddart n Ṣaduq yarra-dd xas, inna: “Zeg wami dd-nekkar ad nawi tawhibt n usgeɛɛed ɣar Taddart n SIDI, aqa ɣarneɣ min ɣa necc ař tyawant uca ɛad iqqim aṭṭas iceṭṭ, maɣar SIDI ibarek řgens nnes, ařami iqqim řqedd-a n waṭṭas iceṭṭ.”

11 Xenni inna Ḥizqiya, ad sswejden ixxamen n Taddart n SIDI, u nitni sswejden ten.

12 Nitni ssidfen tawhibt n usgeɛɛed d řeɛcur d tewhibin iqeddsen din s řmanet. Kunanya, Alawi, ameḥday, d umas Cimɛi, wenni d wiss tnayen, tuɣa aten x man aya marra.

13 Yaḥiyil, Ɛazazya, Naḥat, Ɛasayil, Yarimut, Yuzabad, Iliyil, Yismaxya, Maḥat, Banaya tuɣa aten d iweqqafen sadu ufus n Kunanya d Cimɛi, umas, x řumur n ujeǧid Ḥizqiya u n Ɛazarya, ameqqran n Taddart n AREBBI.

14 Quri, mmis n Yimna, Alawi, aɛessas n tewwart ɣar uɣezdis n ccarq, tuɣa ittwagg x tewhibin n řxaḍar n AREBBI, ḥima ad ibḍa tawhibt n usgeɛɛed n SIDI d tewhibin iqeddsen qaɛ.

15 Ɛadan, Minyamin, Yecuɛa, Cmaɛya, Amarya d Cakunya bedden ɣar uɣezdis nnes ɛlaḥṣab tarbiɛin nsen ḥima ad wezzɛen di tneddam n ikehhanen i aytmatsen, am i imeqqranen am i imeẓyanen,

16 maca war iǧi i yenni ittwazemmemen di lista n jjadira n yeryazen i ɣar iǧa třata n iseggʷusa sennej, aqa marra inni dd-yusin ɣar Taddart n SIDI i řxedmet n kuř ass i wass nni, i řxedmet nsen di tsexxart, ɛlaḥsab tarbiɛin nsen.

17 Azemmen di lista n jjadira n ikehhanen tuɣa-t ɛlaḥṣab taddart n ibabaten nsen, maca n Ilawiyyen zi ɛicrin n iseggʷusa sennej, ɛlaḥsab tasexxart nsen, ɛlaḥsab tirbiɛin nsen.

18 Nitni wezzɛen i yenni ittwazemmemen di lista n jjadira ak-d marra tarwa nsen d temɣarin nsen d iḥenjiren nsen d tḥenjirin nsen zi marra agraw n řgens, maɣar nitni tuɣa ssqeddsen ixef nsen s tidett i tewhibin iqeddsen.

19 Jar iḥenjiren n Harun, ikehhanen, deg iyyaren n ddmani n tneddam nsen, di kuř tandint, tuɣa din iryazen nni ittwazemmemen s ismawen nsen ḥima ad wcen tasɣart i marra awtem jar ikehhanen u i marra inni ittwazemmemen di lista n jjadira jar Ilawiyyen.

20 Ammu i igga Ḥizqiya di marra Yahuda. Netta igga min iǧan nican zzat i wudem n SIDI, AREBBI nnes. 21 Marra řxedmet i ibda di ṭṭweɛ n tsexxart n Taddart n AREBBI u di ṭṭweɛ n Ccariɛa d tewṣeyyet ḥima ad yarzu ammu AREBBI, igga i-tt s marra uř nnes uca ifřeḥ.