1 Awarni i uya issekk Ḥizqiya ireqqasen ɣar marra Israil d Yahuda u yura řa d tibratin i Ifrayim d Manassa, ḥima ad dd-asen ɣar Taddart n SIDI di Urcalim ad ɛeyyden Řɛid n Tɣarṣt n Useɛdu i SIDI, AREBBI n Israil. 2 Maɣar imcawar ujeǧid ak-d imeqqranen nnes d marra agraw n řgens di Urcalim, ḥima ad ggen Řɛid n Tɣarṣt n Useɛdu deg uyur wiss tnayen, 3 maɣar nitni war zemmaren ad t ggen di řweqt nnes ittwaggen, minzi tuɣa war ttwaqeddsen ca aṭṭas n ikehhanen u řgens war tuɣi imun ɛad di Urcalim. 4 Tamesřact-a tuɣa-tt nican di tiṭṭawin n ujeǧid u di tiṭṭawin n marra agraw n řgens. 5 Nitni ggin, ad barrḥen di marra Israil zi Dan ɣares ař Bi’r-Sebɛa, ḥima ad dd-asen ad ggen Řɛid n Tɣarṣt n Useɛdu i SIDI, AREBBI n Israil, di Urcalim, maɣar tuɣa war tt ggin aṭṭas n wussan am mammec tuɣa tura.

6 Ireqqasen n tazřa kkin s tebratin n ujeǧid deg ufus x marra Israil d Yahuda u barrḥen am mammec t yumur ujeǧid, nnan: “Kenniw, ayt n Israil, dewřem-dd ɣar SIDI, AREBBI n Ibrahim, Isḥaq d Israil, xenni Netta ad dd-idweř ɣar yenni innejmen zeg ufus n ujeǧid n Accur, ɣar yenni i ɣarwem iqqimen. 7 War ttiřim am ibabaten nwem d aytmatwem, inni idewřen ɣdaren SIDI, AREBBI n ibabaten nsen, ařami ten isellem Netta ɣar wareddeǧ, am mammec tᵉttwařam s yixef nwem. 8 War sseqsaḥem řexxu irawen nwem , iřim amecnaw ibabaten nwem. Wcem afus i SIDI u asem-dd ɣar Zzawect nnes Iqeddsen tenni issqeddes Netta i řebda. Sexxarem i SIDI, AREBBI nwem, xenni ad xawem iḥeyyed řḥaduq n weɣḍab nnes. 9 Mařa kenniw tdewřem-dd ɣar SIDI, ad afen aytmatwem d iḥenjiren nwem arreḥmet zzat i wudem n yinni i-ten iḥebbsen ařami dd-dewřen ɣar temmurt-a. Maɣar SIDI, AREBBI nwem, d bab n uḥinni d arreḥmet u Netta war xawem issḥeyyid ca udem mařa kenniw tdewřem-dd ɣares.”

10 Ammu i uyuren ireqqasen n tazřa zi tendint ɣar tendint, kkin x temmurt n Ifrayim d Manassa ɣares ař Zabulun, maca ḥeccen xasen u kkwaren ten iwdan.

11 Maca ca n yeryazen zi Acir, Manassa d Zabulun sswaḍɛen ixef nsen uca usin-dd ɣar Urcalim.

12 Uřa di Yahuda indeh ufus n SIDI, aqa nitni s wuř d ijjen ad ḍfaren řumur n ujeǧid u n řḥukkam nni ittwaggen ɛlaḥsab awař n SIDI.

13 Munen waṭṭas n yewdan zi řgens di Urcalim ḥima ad ɛeyyden Řɛid n Weɣrum břa Antun deg uyur wiss tnayen. Ammu i tuɣa din ijj n wegraw n řgens d ameqqran aṭṭas.

14 Nitni kkaren u kksen iɛalṭaren nni iǧan di Urcalim. Kksen uřa d marra iɛalṭaren n řebxur uca nḍaren ten di teɣzart n Qidrun.

15 Deg wass wiss arbeɛṭac n uyur wiss tnayen ɣarṣen nitni i Tɣarṣt n Useɛdu. Ikehhanen d Ilawiyyen iwḍen ad sseḍḥan u tuɣa bdan ad ssqeddsen ixef nsen uca iwyen tiɣarṣa n wecmaḍ ɣar Taddart n SIDI.

16 Nitni bedden deg wemcan nsen am mammec i teggur ɣarsen ɛlaḥsab Ccariɛa n Musa, aryaz n AREBBI. Ikehhanen zeǧɛen idammen nni ksin zeg ifassen n Ilawiyyen.

17 Minzi aṭṭas deg wegraw n řgens tuɣa war ssqeddsen ixef nsen. S uya ttwaggen Ilawiyyen x tɣarṣt n izmaren n Tɣarṣt n Useɛdu i marra inni war izdigen, ḥima ad ten ssqeddsen i SIDI.

18 Maɣar azyen ameqqran n řgens, zzaysen aṭṭas zi Ifrayim d Manassa d Issakar d Zabulun, tuɣa war ttwasizedgen ixef nsen. Nitni ccin Taɣarṣt n Useɛdu war iǧi am mammec tura. Maca Ḥizqiya iẓẓuǧ i nitni, inna: “SIDI icna, iři Netta ad xasen ifdi, ^□  

19 x kuř ijj wenni inwan ad yarzu s marra uř nnes x AREBBI, SIDI, AREBBI n ibabaten nnes, waxxa war iǧi s usizdeg i ittřiqen i Zzawect Iqeddsen.” 20 Isřa SIDI ɣař Ḥizqiya uca issgenfa řgens.

21 Ammu i ɛeyyden ayt n Israil, inni tuɣa innyarwen di Urcalim, sebɛa n wussan n Řɛid n Weɣrum břa Antun s řefraḥet tameqqrant. Ayt n Lawi d ikehhanen ssɛuǧan SIDI ass x wass am ttiraren s jjehd s dduzanat n lmusiqa i SIDI. 22 Issiweř Ḥizqiya ɣar wuř n marra Ilawiyyen inni ɣar teǧa řefhamet icnan n tussna n SIDI. Ccin sebɛa n wussan zi tɣarṣa di řweqt ittwaggen n řɛid, am tuɣa iwyen tiwhibin n uqadi u qadan SIDI, AREBBI n ibabaten nsen. 23 Umi imcawar wegraw n řgens marra maḥend ad t ggen ict n twařa nneɣnit i sebɛa n wussan, arnin nitni ɛad sebɛa n wussan ccuren s řefraḥet, 24 maɣar Ḥizqiya, ajeǧid n Yahuda, tuɣa iwca ařef n iyenduzen d sebɛa-ařaf n wuǧi uca řḥukkam tuɣa wcin ařef n iyenduzen d ɛecra-ařaf n wuǧi. Ikehhanen tuɣa ssqeddsen ixef nsen s waṭṭas zzaysen.

25 Ifarḥ marra wegraw n řgens n Yahuda, uřa d ikehhanen d Ilawiyyen d marra agraw n řgens n yinni dd-yusin zi Israil, uřa d ibarraniyyen nni dd-yusin zi Israil d yenni izeddɣen di temmurt n Yahuda. 26 Tuɣa din řefraḥet d tameqqrant di Urcalim, maɣar zeg wussan n Suliman, mmis n Dawud, ajeǧid n Israil, tuɣa war imsar am uya di Urcalim. 27 Xenni bedden ikehhanen n Ilawiyyen uca barken řgens. Tmijja nsen tᵉttwaseř, maɣar taẓaǧit nsen tudef ɣar Tzeddiɣt Tamqeddest nnes deg ujenna.