1 Ḥizqiya idweř d ajeǧid umi tuɣa ɣares xemsa u-ɛicrin n iseggʷusa. Netta iḥkem tesɛa u-ɛicrin n iseggʷusa di Urcalim. Yemmas qqaren as Abiya, yeǧis n Zakariyya. 2 Netta igga min iǧan nican di tiṭṭawin n SIDI, nican am mammec t igga babas Dawud. 3 Deg useggʷas amezwaru n řeḥkamet nnes, deg uyur amezwaru, yarzem tiwwura n Taddart n SIDI uca iɛdeř i-tent. 4 Issidef ikehhanen d Ilawiyyen uca issmun i-ten x wazzay ɣar uɣezdis n ccarq. 5 Inna asen: “Sřem-dd ɣari, a Ilawiyyen. Sqeddsem ixef nwem uřa d Taddart n SIDI, AREBBI n ibabaten nwem u kksem marra min ixemjen zi Zzawect Iqeddsen. 6 Maɣar ibabaten nneɣ tuɣa aten d iɣeddaren u ggin min iǧan d aɛeffan di tiṭṭawin n SIDI, AREBBI nneɣ. Nitni ḥeyyden xas uca nnqeřben udmawen nsen zi Tzeddiɣt n SIDI uca arrin s weɛrur ɣar SIDI. 7 Ɛad uřa d tiwwura n wesqif n wadaf n Zzawect bellɛen tent, ssxesyen řefnarat u war ssarɣen řa d řebxur u war ssgeɛɛden ɛad taɣarṣt n wecmaḍ i AREBBI n Israil di Zzawect Iqeddsen. 8 S uya yusa-dd uduqqez ameqqran n weɣḍab n SIDI x Yahuda d Urcalim uca isellem i-ten i unexřeɛ u i wareddeǧ u i usemẓi, am mammec tᵉttwařam kenniw s tiṭṭawin nwem. 9 Xzarem, x uya wḍan ibabaten nneɣ s ssif u iḥenjiren nneɣ d tḥenjirin nneɣ d temɣarin nneɣ aqa aten di řeḥbes x uya.

10 Řexxu aqa-tt ɣari deg wuř inu maḥend ad ggeɣ ijj n řɛahd ak-d SIDI, AREBBI n Israil, ḥima řḥaduq n weɣḍab nnes ad xaneɣ ibeɛɛed.

11 A iḥenjiren inu, war arexxum, minzi SIDI ifarz i kenniw, aqa ad tbeddem zzat i wudem nnes ḥima ad as tsexxarem u ḥima kenniw ad as tiřim d imsexxaren nnes u ad as tqeddmem řebxur.”

12 Xenni kkaren Ilawiyyen: Maḥat, mmis n Ɛamasay, d Yuwil, mmis n Ɛazarya, zeg iḥenjiren n Quḥat. Zeg iḥenjiren n Marari, Qis, mmis n Ɛabdi, d Ɛazarya, mmis n Yahlayil. Zeg iḥenjiren n Jarcun, Yuwax, mmis n Zimma, d Ɛidan, mmis n Yuwax.

13 Zeg iḥenjiren n Iliṣafan, Cimri d Yaɛiyil, u zeg iḥenjiren n Asaf, Zakariyya d Mattanya.

14 Zeg iḥenjiren n Hayman, Yaḥiyil d Cimɛi, u zeg iḥenjiren n Yadutun, Cmaɛya d Ɛuzziyil.

15 Nitni ssmunen aytmatsen uca ssqeddsen ixef nsen, ɛlaḥsab řumur n ujeǧid wenni iɛemmden x wawařen n SIDI, ḥima ad ssizedgen Taddart n SIDI.

16 Udfen ikehhanen ɣar Taddart n SIDI ḥima ad tt ssizedgen uca ssuffɣen marra řexmej i ufin di Zzawect Tameqqrant ɣar řemraḥ n Taddart n SIDI uca Ilawiyyen ksin t ḥima ad t awyen ɣar barra, ɣar teɣzart n Qidrun.

17 Deg wass amezwaru n uyur amezwaru bdan ad qeddsen Taddart uca deg was wiss tmenya n uyur iwḍen nitni ɣar wesqif n wadaf n Zzawect n SIDI uca ammu i ssqeddsen Taddart n SIDI di tmenya n wussan. Deg wass wiss seṭṭac n uyur amezwaru tuɣa kemmřen řxedmet.

18 Nitni udfen ɣar ujeǧid Ḥizqiya, nnan: “Neccin nessizdeg marra Taddart n SIDI, aɛalṭar n wecmaḍ ak-d marra dduzanat nnes d ṭṭabřa s weɣrum n wescan ak-d marra dduzanat nnes.

19 Marra řeqcuɛ i inḍar ujeǧid Aḥazya zi řeɣdar nnes deg wussan n tgelda nnes, neɛdeř i-ten u nessqeddes i-ten. Aqa aten zzat i uɛalṭar n SIDI.”

20 Xenni ikkar ujeǧid Ḥizqiya zic uca issmun imeqqranen n tendint uca igeɛɛed ɣar Taddart n SIDI. 21 Nitni iwyen-dd sebɛa n iyenduzen d sebɛa n icarriyyen d sebɛa n izmaren d sebɛa n imuyan ad iřin d taɣarṣt n ddenb i tgeldit, řa i Zzawect Iqeddsen uřa i Yahuda uca netta inna i iḥenjiren n Harun, ikehhanen, ḥima ad ten qeddmen x uɛalṭar n SIDI. 22 Ɣarṣen i ifunasen uca sseřqan ikehhanen i idammen uca ruccen ten x uɛalṭar. Nitni ɣarṣen uřa d icarriyyen uca zeǧɛen idammen x uɛalṭar. Ɣarṣen uřa i izmaren uca zeǧɛen idammen x uɛalṭar. 23 Nitni iwyen-dd imuyan i tɣarṣt n ddenb zzat i wudem n ujeǧid d wegraw n řgens uca ssarsen xasen ifassen nsen. 24 Ikehhanen ɣarṣen asen u s idammen nsen ssizedgen aɛalṭar zi ddenb ḥima ad fdan i marra Israil, maɣar ajeǧid tuɣa igga taɣarṣt n wecmaḍ d tɣarṣt n ddenb nni i marra Israil. 25 Netta issbedd Ilawiyyen di Taddart n SIDI s taǧunin n wuzzař d řgambriyat d lharpat, ɛlaḥsab řumur n Dawud d Jad, amwařaw n ujeǧid, d unabi Natan, minzi řumur-a tuɣa i dd-yusa zi SIDI s uqemmum n inabiyyen. 26 Ayt n Lawi bedden din ak-d dduzanat n lmusiqa n Dawud u ikehhanen ak-d řɣayṭat.

27 Xenni yumur Ḥizqiya ad awyen taɣarṣt n wecmaḍ x uɛalṭar. Di tsaɛɛet i di tebda tɣarṣt n wecmaḍ, ibda uřa d azehhed i SIDI s řɣayṭat u s dduzanat n lmusiqa n Dawud, ajeǧid n Israil. 28 Marra agraw n řgens yuḍar ɣar temmurt, am ttɣennajen u ttṣuḍan di řɣayṭat. Man aya marra ikka ɣares ařami tᵉttwakemmeř tɣarṣt n wecmaḍ. 29 Umi ikemmeř usiweḍ n tɣarṣt n wecmaḍ, ibbendeq ujeǧid d marra inni tuɣa ɣares iǧan uca uḍaren. 30 Awarni i uya inna ujeǧid Ḥizqiya d imeqqranen i Ilawiyyen, ad ssɛuǧan SIDI s wawařen n Dawud u n umwařaw Asaf. Ssɛuǧan ařami dd-tusa řefraḥet uca ssqewsen izeǧifen nsen uca uḍaren.

31 Ḥizqiya yarra-dd, inna: “Řexxu kenniw tᵉttwařeqqmem d ikehhanen i SIDI. Asettiw-dd uca awyem-dd tiɣarṣa d tewhibin n uqadi i Taddart n SIDI.” Xas uca yiwi-dd wegraw n řgens tiɣarṣa d tewhibin n uqadi u marra inni i ɣar tt tuɣa di řxadar nsen iwyen-dd tiɣarṣa n wecmaḍ. 32 Řqedd n tɣarṣa n wecmaḍ i dd-yiwi wegraw n řgens, aqa-t di sebɛin n ifunasen d mya n icarriyyen d mitayen n izmaren. Nitni marra ttwawyen-dd d taɣarṣt n wecmaḍ i SIDI. 33 Tiwhibin iqeddsen aqa atent di setta-mya n ifunasen d teřt-ařaf n wuǧi. 34 Maca aqa din drus n ikehhanen u nitni war zemmaren ad ssarxun tiřmect n marra tiɣarṣa n wecmaḍ. S uya ɛawnen ten aytmatsen Ilawiyyen, ařami kemmřen řxedmet u ařami ikehhanen nneɣni tuɣa ssqeddsen ixef nsen, minzi Ilawiyyen tuɣa seggden deg wuř ktar ḥima ad ssqeddsen ixef nsen zeg ikehhanen. 35 Tuɣa din ɛawed aṭṭas n tɣarṣa n wecmaḍ, ak-d tadunt n tewhibin n uqadi d tewhibin n useyyeb i tɣarṣa n wecmaḍ. Ammu i tᵉttwaɛdeř tsexxart n Taddart n SIDI. 36 Ḥizqiya d marra řgens farḥen x min tuɣa issewjed AREBBI i řgens, maɣar tamesřact tᵉttwagg břa ma ad as ggen řeḥsab.