1 Aḥaz tuɣa ɣares ɛicrin n iseggʷusa, umi idweř d ajeǧid. Netta iḥkem seṭṭac n iseggʷusa di Urcalim. Netta war iggi min iǧan nican di tiṭṭawin n SIDI, AREBBI nnes, am mammec igga babas Dawud. 2 Netta yuyur deg ibriden n ijeǧiden n Israil. Ɛawed igga řexyařat ifesyen i ibaɛlen. ^□   3 Netta tuɣa ittawi-dd řebxur di teɣzurt n Bin-Hinnum u issecmeḍ iḥenjiren nnes di tmessi u igga ɛlaḥsab jjɛayef nni ggin marra řegnus i xef yuẓẓeř SIDI zzat i wudem n ayt n Israil. 4 Netta yiwyi-dd tiɣarṣa d tewhibin n řebxur x řegɛudi u x tewririn u sadu marra azɣar aziza. 5 SIDI, AREBBI nnes, iwca i-t deg ifassen n ujeǧid n Aram. Nitni wtin t u ḥebbsen zzaysen ijj n ubarru imɣar u iwyen ten ɣar Dimacq. Immewc Aḥaz deg ifassen n ujeǧid n Israil, wenni d as iwtin ict n tecti d tameqqrant. ^□   6 Faqaḥ, mmis n Ramalya, inɣa mya u-ɛicrin-ařef n yeryazen deg ijj n wass di Yahuda, marra nitni d ayt n umenɣi, umi ḥeyyden x SIDI, AREBBI n ibabaten nsen. 7 Zikri, ijj n bu-teɣruḍt zi Ifrayim, inɣa Maɛasiya, mmis n ujeǧid, d Ɛazriqam, aweqqaf n Taddart, d Ilqana, wenni d wiss tnayen awarni i ujeǧid. 8 Nedhen ayt n Israil zeg aytmatsen mitayen-ařef n temɣarin d iḥenjiren d tḥenjirin di tmeḥbast u ṭṭfen zzaysen ict n tkeccaḍt d tameqqrant. Iwyen takeccaḍt nni ɣar Samarya.

9 Dinni iǧa ijj n unabi n SIDI, qqaren as Ɛudid. Wanita iffeɣ ɣar řɛeskar i dd-iɛeqben ɣar Samarya, inna asen: “Xzarem, minzi SIDI, AREBBI n ibabaten nwem, tuɣa isɛar x Yahuda, igga i-ten deg ufus nwem u kenniw tenɣim ten s ijj n wesxeḍ yiweḍ ař ajenna.

10 U řexxu ttɣiř awem kenniw ad teggem ayt n Yahuda d Urcalim d isemɣan d tsemɣin nwem. Ma war kenniw iḍfar xenni umarwas ɣar SIDI, AREBBI nwem?

11 Sřem-dd řexxu ɣari u arrem imeḥbas nni tḥebbsem zeg aytmatwem, maɣar řḥaduq n weɣḍab n SIDI xawem i dd-yusa.”

12 Xenni ssbedden yeryazen-a zeg izeǧifen n iḥenjiren n Ifrayim ixef nsen zzat i yenni dd-yareggʷeḥen zi řɛeskar: Ɛazarya, mmis n Yuḥanan, Baraxya, mmis n Macillimut, Ḥizqiya, mmis n Callum, d Ɛamasa, mmis n Hidlay.

13 Nitni nnan asen: “War tzemmarem ad tessidfem imeḥbas danita, maɣar nitni ad xaneɣ dd-arenyen amarwas zzat i SIDI. Ma ittɣiř awem nzemmar ad narni ɛad di ddnub nneɣ d umarwas nneɣ, waxxa ɛad ɣarneɣ aṭṭas n imerwusa u řḥaduq n weɣḍab n AREBBI aqa-t x Israil?”

14 Xenni semḥen yeryazen iḥezzmen s řesnaḥ deg imeḥbas d tkeccaḍt zzat i imeqqranen d marra agraw n řgens.

15 Iryazen, inni ittwasemman qbeř s ismawen nsen, kkaren uca thellan deg imeḥbas, ssyarḍen marra inni i tuɣa iǧan d iɛaryanen s warruḍ zi tkeccaḍt. Ssyarḍen ten s warruḍ d tsiřa u wcin asen ad ccen, ad swen. Ɛawed dehnen ten uca ssɣimen inni i tuɣa gguren ttenqarḍen x yeɣyař u ammu iwyen ten ɣar aytmatsen ɣar Ariḥa, Tandint n Tini. Awarni man aya ɛeqben nitni simant nsen ɣar Samarya.

16 Di řweqt nni issekk Aḥaz ireqqasen ɣar ijeǧiden n Accur, ḥima ad as wcen afus.

17 Uřa d ayt n Idum usin-dd uca wtin Yahuda u nedhen ten di tmeḥbast.

18 Ifilisṭiniyyen hejmen x tneddam n Temmurt Iwaṭan d ljanub n Yahuda uca ṭṭfen Bayt-Cams, Ayyalun, Jadirut, Suku d tneddam i ɣares dd-iqqnen, Timna d tneddam i ɣares dd-iqqnen d Jimzu d tneddam i ɣares dd-iqqnen uca zedɣen dinni.

19 Maɣar SIDI issehqar Yahuda di ssibbet n Aḥaz, ajeǧid n Yahuda, minzi netta iffucceḥ di Yahuda u iɣdar SIDI. 20 Tiɣlat-Filnasir, ajeǧid n Accur, yusa-dd ɣares. Netta igga xas bezzez u war t issejhed. 21 Maɣar waxxa Aḥaz iksi agřa zi Taddart n SIDI u zi taddart n ujeǧid u n řḥukkam, iwca aya i ujeǧid n Accur, waxxa amenni war infiɛ di ca.

22 Di řweqt i di ittwaḥṣar, yarni ujeǧid Aḥaz ɛad di řɣedran nnes zzat i SIDI. 23 Netta iqeddem tiɣarṣa i irebbiten n Dimacq, inni xas iɣeřben, inna: “Maɣar irebbiten n ijeǧiden n Aram wcin asen afus, uřa d necc ad asen wehhbeɣ ḥima ad ayi wcen afus ɛawed.” Maca nitni dewřen i uweṭṭu nnes u i marra Israil. 24 Aḥaz issmun řeqcuɛ zi Taddart n AREBBI uca yarẓa řeqcuɛ n Taddart n AREBBI di iwetwiten uca ibelleɛ tiwwura n Taddart n SIDI uca igga i yixef nnes iɛalṭaren di kuř taɣmart n Urcalim. 25 Igga uřa d řegɛudi di kuř tandint n Yahuda ḥima ad awyen řebxur i irebbiten nneɣni. Ammu i isɛar SIDI, AREBBI n ibabaten nnes.

26 Imezruyen iqqimen d marra ibriden nnes, imezwura d ineggura, xzar, aqa ttwazemmemen deg wedlis n ijeǧiden n Yahuda d Israil. 27 Aḥaz ittwassars deg wenḍeř jar řejdud nnes. Neḍřen t di tendint, di Urcalim, maca war t ssarsen ca deg imeḍřan n ijeǧiden n Israil. Mmis Ḥizqiya idweř d ajeǧid deg wemcan nnes.