1 Manassa tuɣa ɣares tenɛac n iseggʷusa umi idweř d ajeǧid. Netta iḥkem xemsa u-xemsin n iseggʷusa di Urcalim. 2 Netta igga min iǧan d aɛeffan di tiṭṭawin n SIDI, am jjɛayef n řegnus nni tuɣa issuffeɣ SIDI zi zzat n wudem n ayt n Israil zi řwart nsen. 3 Netta ibda ad iɛdeř řegɛudi nni tuɣa ihdem babas Ḥizqiya. Netta issbedd iɛalṭaren i Baɛal uca igga tirebbin n cwarti uca yuḍar zzat i marra řɛeskar n ujenna uca isexxar asen. 4 Issbedd ɛawed iɛalṭaren di Taddart n SIDI i x inna SIDI: “Di Urcalim ad ssmetneɣ Isem inu.” 5 Netta ibna ɛawed iɛalṭaren i marra řɛeskar n ujenna di tnayen n řemraḥat n Taddart n SIDI. 6 Netta ijja ad kken iḥenjiren nnes di tmessi di teɣzurt n mmis n Hinnum, issexdem tabezgiwt d tgezzant d tseḥḥart, u yiwi-dd inni issawařen ak-d imettan d igezzanen. Igga aṭṭas min iǧan d aɛeffan di tiṭṭawin n SIDI maḥend ad t isɛar. 7 Issbedd ijj n řexyař ineqcen nni igga di Taddart n AREBBI, i x tuɣa inna AREBBI i Dawud u i mmis Suliman: “Di Taddart-a u di Urcalim, tenni farzeɣ zi marra tiqebbař n Israil, ad ssmetneɣ Isem inu i řebda 8 u Necc war ttejjiɣ aḍar n Israil ad iffeɣ ɛad barra i temmurt nni uriɣ i ibabaten nwem, mařa nitni mɣir ad ḥḍan marra min i d asen umureɣ ad t ggen ɛlaḥsab marra Ccariɛa d marra tiweṣṣa d marra lfarayiḍ nni d asen immewcen s ufus n Musa.” 9 Manassa ijja Yahuda d imezdaɣ n Urcalim ad weddaren, ařami ggin d aɛeffan x řegnus i x tuɣa SIDI iqḍa zzat i wudem n ayt n Israil.

10 Iwa SIDI tuɣa issiweř i Manassa u i řgens nnes, maca nitni war d as wcin ca taynit.

11 SIDI issekk ɣarsen ikumandaren n řɛeskar n ujeǧid n Accur. Nitni ḥebbsen Manassa s tsennarin uca carfen t s tnayen n ssnaseř n nnḥas uca nedhen t ɣar Babil.

12 Umi t iḥṣar Netta ammu, izaweg wanita zzat i wudem n SIDI, AREBBI nnes, u isswaḍeɛ ixef nnes ař ṭṭarf zzat i wudem n AREBBI n ibabaten nnes,

13 iẓẓuǧ ɣares uca AREBBI ijja ad issarḍa ixef nnes zzayes s tẓaǧit yuǧɣen nnes u yarra i-t-i-dd ɣar Urcalim. Xenni issen Manassa, aqa SIDI d AREBBI.

14 Awarni i uya ibna řḥiḍ n barra i tendint n Dawud, ɣar uɣezdis n ccarq n Jiḥun di teɣzurt, u ibna i-t ɣares ař Tawwart n Iseřman, iquwwar řḥiḍ uřa d Ɛufil uca issgeɛɛed Manassi řḥiḍ aṭṭas. Igga uřa d ikumandaren n řɛeskar di marra tineddam ifaryen n Yahuda.

15 Netta ikkes irebbiten iɣriben d řexyař n ṣṣanam zi Taddart n SIDI uřa d marra iɛalṭaren nni tuɣa ibna x wedrar n Taddart n SIDI di Urcalim uca immenḍar i-ten barra i tendint.

16 Netta issbedd aɛalṭar n SIDI uca iqeddem xas tiwhibin n řehna d tewhibin n uqadi uca inna i ayt n Yahuda ad ɛebden SIDI, AREBBI n Israil.

17 Maca řgens yarni ɛad yiwi-dd tiɣarṣa x řegɛudi, maca mɣir i SIDI, AREBBI nsen, waha.

18 Imezruyyen iqqimen n Manassa d tẓaǧit nnes ɣar AREBBI nnes uřa d awařen n imwařawen, inni ɣares issiwřen deg Yisem n SIDI, AREBBI n Israil, xzar, man aya marra ittwazemmem deg wedlis n imezruyen n ijeǧiden n Israil.

19 Taẓaǧit nnes d mammec ijja AREBBI ad ittwaseṣřeḥ ixef nnes s tẓaǧit yuǧɣen nnes, uřa d marra ddnub nnes d řeɣdar nnes d imucan mani ibna řegɛudi u issbedd tirebbin n cwarti d řexyařat ineqcen qbeř ma ittwaswaḍeɛ, xzar, man aya marra ittwazemmem deg wawařen n imwařawen. 20 Manassa ittwassars deg wenḍeř jar řejdud nnes. Neḍřen t di taddart nnes. Mmis Amun idweř d ajeǧid deg wemcan nnes.

21 Amun tuɣa ɣares tnayen u-ɛicrin n iseggʷusa umi idweř d ajeǧid. Netta iḥkem tnayen n iseggʷusa di Urcalim. 22 Netta igga min iǧan d aɛeffan di tiṭṭawin n SIDI, nican am mammec t igga babas Manassa. Amun iqeddem tiɣarṣa i marra řexyařat ineqcen i tuɣa igga babas Manassa uca isexxar asen. 23 Netta war isswaḍeɛ ixef nnes zzat i wudem n SIDI, am mammec isswaḍeɛ babas Manassa ixef nnes, maca Amun wanita yarni waha deg umarwas. 24 Imsexxaren nnes ggin xas ict n tmeɛmuč uca nɣin t di taddart nnes. 25 Řgens n temmurt maca nɣin marra inni tuɣa iggin tameɛmuč x ujeǧid Amun. Řgens n temmurt ggin mmis Yuciya d ajeǧid deg wemcan nnes. ^□