Ajeǧid Axazya ittwaneɣ s ufus n Yahu
22
1 Imezdaɣ n Urcalim ggin Aḥazya, mmis amaẓuẓ, d ajeǧid deg wemcan nnes, maɣar marra aytmas imeqqranen tuɣa ttwanɣen zeg ict n bandiyya i tuɣa dd-tudef ak-d Weɛraben ɣar řmargeⱨ n řɛeskar. Ammu i idweř Aḥazya, mmis n Yahuram, d ajeǧid n Yahuda. 2 Axazya tuɣa ɣares tnayen u-rebɛin n iseggʷusa, umi idweř d ajeǧid. Netta iḥkem ijj n useggʷas di Urcalim. Yemmas qqaren as Ɛatalya, yeǧis n Ɛumri. 3 Netta yuyur deg ibriden n taddart n Axab, maɣar yemmas d tamcawart nnes di marra tuɛeffna i igga. 4 Netta igga min iǧan d aɛeffan di tiṭṭawin n SIDI, amecnaw taddart n Axab, maɣar awarni i řmewt n babas tuɣa inni n taddart n Axab d imcawaren nnes ařami ikka x uzeǧif. 5 Netta iḍfar ccwar nsen uca iffeɣ ak-d Yuram, mmis n Axab, ajeǧid n Israil, i umenɣi ak-d Ḥazayil, ajeǧid n Aram, ɣar Ramut di Jilɛad uca Iramiyyen ɣeřben x Yuram. 6 Xenni yareggʷeḥ maḥend ad yarzu di Yazraɛil agenfu zeg iyezzimen nni i d as tuɣa ggin ayt n Aram umi imneɣ di Ramut ak-d ujeǧid nsen, Ḥazayil, ajeǧid n Aram. Ihwa-dd Ɛazarya, mmis n Yuram, ajeǧid n Yahuda, ɣar din, ḥima ad issijj x Yuram, mmis n Axab, di Yazraɛil, umi tuɣa ihřec. 7 Areddeǧ n Aḥazya tuɣa zi AREBBI umi dd-yusa ɣar Yuram. Umi dd-yiweḍ din, iffeɣ ak-d Yuram x Yahu, mmis n Nimci, wenni i tuɣa idhen SIDI maḥend ad iqḍa x taddart n Axab. 8 Umi iqḍa Yahu x řḥukm n taddart n Axab, imsar, aqa yufa řḥukkam n Yahuda d iḥenjiren n aytmas n Aḥazya, inni i tuɣa ittsexxaren i Aḥazya, uca inɣa i-ten. 9 Xenni yarzu x Aḥazya. Nitni ṭṭfen t am tuɣa innuffar di Samarya uca iwyen t ɣar Yahu. Nɣin t u neḍřen t, minzi nnan: “Netta d mmis n Yahucafaṭ, wenni yarezzun x SIDI s marra uř nnes.” Ammu war iqqim i taddart n Aḥazya uřa d ijj n wenni di iǧa jjehd ḥima ad iḥkem am ujeǧid.
Yuwac iqqim iddar umi tsizzeř Atalya idammen n aytmas
10 Umi Ɛatalya, yemmas n Aḥazya teẓra, aqa mmis immut, tekkar, tᵉteḥḥa marra tarwa n ujeǧid n taddart n Yahuda. □
11 Maca Yahucabɛat, yeǧis n ujeǧid, teksi Yuwac, mmis n Aḥazya, uca texḍef i-t zi jar ihenjiren n ujeǧid nni ittwanɣen uca tessidef i-t ak-d tenni t issuḍuḍen deg ijj n wexxam n yiḍeṣ. Ammu i tegga Yahucabɛat, yeǧis n ujeǧid Yahuram, tamɣart n ukehhan Yahuyadaɛ — maɣar nettat d učmas n Aḥazya — tessnuffar i-t i Ɛatalya u tanita war t tenɣi ca.
12 Setta n iseggʷusa iqqim innuffar ɣarsen di Taddart n AREBBI u tuɣa Ɛatalya tḥekkem x temmurt.